ޒަމާނީ ހުރިހާ ވަސީލަތްތަކަކާ އެކު، ޓަރޝަރީ ހޮސްޕިޓަލެއްގެ ގޮތުގައި ދަރުމަވަންތަ ހޮސްޕިޓަލް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރަސްމީކޮށް މިރޭ ހުޅުވައިފިއެވެ. 

ޓަރޝަރީ ހޮސްޕިޓަލެއްގެ ގޮތުގައި ހުރިހާ ޚިދުމަތެއް ޤާއިމްކޮށް ދަރުމަވަންތަ ހޮސްޕިޓަލް ރަސްމީކޮށް ހުޅުވުމަށް ނިންމަވާފައިވާކަން ރައީސުލްޖުމްހޫރިއްޔާ އިޢުލާންކުރެއްވީ ޖުމްހޫރީ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައެވެ.

އައިޖީއެމްއެޗާ އިންވެގެން އިމާރާތްކޮށްފައިވާ 25 ބުރީގެ ދަރުމަވަންތަ ހޮސްޕިޓަލްގެ ބޭނުން ނިމިދިޔަ ފަސް އަހަރު ތެރޭގައި އެންމެ އެދެވޭ ގޮތުގައި ހިފައިފައެއް ނުވެއެވެ. މީގެ ސަބަބުން އެތަނުގައި ހުރި މެޝިނަރީތައް ހަލާކުވެ، މަރާމާތަށް ވަރަށް ބޮޑު ހޭދައެއް ވެސް ކުރަންޖެހުނުކަމަށް ސަރުކާރުން ބުނެއެވެ.

ދަރުމަވަންތަ ހޮސްޕިޓަލް ރަސްމީކޮށް މިރޭ ހުޅުވާފައި މިވަނީ، މީގެކުރިން ނުލިބޭ ގިނަ ޚިދުމަތްތައް ލިބޭނެ ވަސީލަތްތައް ޤާއިމްކުރުމަށްފަހުގައެވެ.

ޓަރޝަރީ ހޮސްޕިޓަލު ހުޅުވުމަށް ބޭއްވި ރަސްމިއްޔާތުގައި ނެޝަނަލް ފަރޓިލިޓީ ސެންޓަރާއި ހައިބްރިޑް ކެތު ލެބް ވަނީ އިފްތިތާޙުކޮށްފައެވެ. އަދި މި ހޮސްޕިޓަލުގެ އީއާރު އަކީ ކުޑަކުދިންނަށް ޚާއްޞަ އީއާރުއެއްގެ ގޮތުގައި ވަނީ ކަނޑައަޅައިފައެވެ.

ދަރުމަވަންތަ ހޮސްޕިޓަލުގެ އިތުރުން ހުޅުމާލެ ހޮސްޕިޓަލްވެސް ޓަރޝަރީ ފެންވަރަށް ތަރައްޤީކުރުމަށް ސަރުކާރުން ވަނީ ނިންމަވައިފައެވެ.