ސްރީ ލަންކާގައި އިއްޔެ ބޭއްވި ޕާލަމެންޓް އިންތިޚާބުގައި އާ ރައީސް އަނޫރާ ކުމާރަ ޑިސަނައިކަގެ ވާތުފިޔައިގެ ކޯލިޝަނުން ބޮޑު ކާމިޔާބެއް ހޯދައިފި އެވެ.

ރަސްމީ ނަތީޖާތައް ދައްކާ ގޮތުން ރައީސް ޑިސަނައިކަގެ ނޭޝަނަލް ޕީޕަލްސް ޕަވަ (އެންޕީޕީ) ކޯލިޝަނުން ވަނީ ޕާލަމެންޓުގެ ތިންބައިކުޅަ ދެބައި އަޣުލަބިއްޔަތު ހޯދައިފަ އެވެ. އެ ކޯލިޝަނުން ވަނީ 159 ގޮނޑި ކަށަވަރުކޮށްފަ އެވެ. 

ރައީސްގެ ކޯލިޝަނުން ވަނީ ވޯޓުގެ ގާތްގަނޑަކަށް 62 ޕަސެންޓް ކާމިޔާބުކޮށްފަ އެވެ. ތަމަޅައިންގެ އަޣުލަބިއްޔަތު އޮންނަ ޖަފްނާ ޕެނިންސުލާގެ އަޣުލަބިއްޔަތު ވެސް ވަނީ ހޯދައިފަ އެވެ. މިއީ 1948 ވަނަ އަހަރު އިނގިރޭސިންގެ ބާރުގެ ދަށުން ލަންކާ މިނިވަންވީ ފަހުން ތަމަޅައިންގެ ނޫން ބަޔަކަށް ޖަފްނާގެ އަޣުލަބިއްޔަތު ދިޔަ ފުރަތަމަ ފަހަރެވެ.

"އާ އުއްމީދަކަށް ވޯޓު ދެއްވި ހުރިހާ ބޭފުޅުންނަށް ވެސް ވަރަށް ބޮޑަށް ޝުކުރިއްޔާ،" އެކްސްގައި ޑިސަނައިކަ ކުރެއްވި ކުރު ޕޯސްޓެއްގައި ވިދާޅުވި އެވެ.

ތަޖްރިބާކާރުން ބުނާގޮތުގައި މިއީ ޒަމާނުއްސުރެ ލަންކާގެ ސިޔާސީ މަސްރަހުގައި ވަކި ހިއްޕާލާފައި އޮންނަ ވަކި އާއިލާތަކެއްގެ ނުފޫޒުން ގައުމު ސަލާމަތްވަމުންދާ ކަމުގެ ނިޝާނެކެވެ. 

މި ކާމިޔާބީއަކީ ކެމްޕޭނުގައި ރައީސް ޑިސަނައިކަ ވައުދުވެވަޑައިގެންނެވި ބަދަލުތައް ގެނައުމަށް ލިބުނު ވަރަށް ބޮޑު ހިތްވަރެކެވެ. ކޮރަޕްޝަން ނައްތާލާނެ ވައުދާ އެކު ވެރިކަމަށް ވަޑައިގެންނެވި ޑިސަނައިކަ ވަނީ އިގްތިސާދީ ބަދަލުތަކުގެ އިތުރުން ގާނޫނު އަސާސީ އަށް ވެސް ބައެއް ބަދަލުތައް ގެންނާނެ ކަމަށް ވިދާޅުވެފަ އެވެ. 

ނިމިގެންމިދާ ލަންކާ ޕާލަމެންޓުގައި ޑިސަނައިކަގެ ޕާޓީ ތަމްސީލު ކުރަނީ އެންމެ ތިން މެންބަރުންނެވެ. 

އުމުރުފުޅުން 55 އަހަރުގެ ރައީސް ކުރިން ވިދާޅުވެފައި ވަނީ މިފަހަރުގެ އިންތިޚާބު ވެގެންދާނީ ސްރީ ލަންކާ އަށް ބަދަލުތަކެއް ގެނުވާނެ އިންތިޚާބަކަށް ކަމަށެވެ.

ލަންކާގެ އިދިކޮޅު ކޯލިޝަން ލީޑް ކުރައްވަނީ ރިޔާސީ އިންތިޚާބުގައި ޑިސަނައިކަ ބަލިކުރެއްވި ސަޖިތު ޕްރެމަދާސަ އެވެ. އެ ޕާޓީއަށް މިފަަހަރު ލިބިފައި ވަނީ ތިރީހަކަށް ގޮނޑި އެވެ.

ވެރިކަމަށް ވަޑައިގެން ޑިސަނައިކަ ވަނީ ޕާލަމެންޓުގެ އާ އިންތިޚާބަކަށް ގޮވާލައްވައިފަ އެވެ. ސަބަބަކީ ރިޔާސީ އިންތިޚާބުގައި ވައުދުވެވަޑައިގެންނެވި ބަދަލުތައް ގެނައުމަށް ޕާލަމެންޓުގެ ތެރޭން ކަންކަން ފަހިކުރުމުގެ މަގު ތަނަވަސްކުރުމެވެ. 

"ރައްޔިތުން ބޭނުން ނުވާ ޕާލަމެންޓަކާ އެކު ކުރިއަށް ދިއުމަކީ މާނައެއް ހުރި ކަމެއް ނޫން،" އާ އިންތިޚާބަކަށް ގޮވާލައްވަމުން ޑިސަނައިކަ ވިދާޅުވި އެވެ. 

ޕާލަމެންޓުގައި ކުރިން ތިއްބެވި މެންބަރުންގެ ގާތްގަނޑަކަށް ތިންބައިކުޅަ ދެބައި ވަނީ އާ އިންތިޚާބުގައި ވާދަނުކުރަން ނިންމަވައިފަ އެވެ. އޭގެ ތެރޭގައި ކުރިން ވެރިކަން ކުރެއްވި ރާޖަޕަކްސާގެ ވަފާތެރި މެންބަރުން ވެސް ހިމެނެ އެވެ. 

ލަންކާ ޕާލަމެންޓުގައި ހިމެނޭ 225 ގޮނޑީގެ ތެރޭން 196 ގޮނޑި އަށް މެންބަރުން ހޮވާނީ ސީދާ އިންތިޚާބުންނެވެ. ބާކީ ޖާގަތަކަށް މެންބަރުން ހަމަޖައްސާނީ އިންތިޚާބުގައި ޕާޓީތަކަށް ވޯޓު ލިބުނު ނިސްބަތުން އެ ޕާޓީތަކުންނެވެ. މިއީ ޕްރޮޕޯޝަނަލް ރެޕްރެޒެންޓޭޝަނެވެ. 

މިފަހަރުގެ އިންތިޚާބުގައި ބަދަލަކަށް ވޯޓު ދިން މީހުންގެ އެންމެ ބޮޑު އުއްމީދަކީ ގައުމުގެ އިގްތިސާދީ ހާލަތު ރަނގަޅުވުމެވެ. ލަންކާ އަށް 2022 ވަނަ އަހަރު ކުރިމަތިވި އިގްތިސާދީ ހީނަރުކަމާ ގުޅިގެން އަސާސީ ތަކެތި ލިބުން ދަތިވެ ތަކެތީގެ އަގު އިންތިހާއަށް އުފުލުނެވެ. ނަތީޖާއަކަށް ވެގެން ދިޔައީ ރައްޔިތުން ނުކުމެ ގޯޓަބަޔާ ރާޖަޕަކްސާގެ ސަރުކާރު ވެރިކަމުން ބޭލުމެވެ.

ދެން ވެރިކަމާ ހަވާލުވެވަޑައިގެންނެވި ރަނިލް ވިކްރަމަސިންހަ ވަނީ އިންޓަނޭޝަނަލް މަނިޓަރީ ފަންޑް (އައިއެމްއެފް) އާ ވާހަކަ ދައްކައިގެން ތިން ބިލިއަން ޑޮލަރުގެ ބެއިލްއައުޓް ޕެކޭޖެއް ހޯއްދަވައިފަ އެވެ. ނަމަވެސް ސްރީ ލަންކާގެ ގިނަ ރައްޔިތުން އަދިވެސް ދަނީ އިގްތިސާދީ ބުރަ ތަހައްމަލް ކުރަމުންނެވެ. 

ފަގީރު ހާލަތުގައި ދިރިއުޅެން ޖެހިފައިވާ މީހުންގެ އަދަދު ވަނީ ވޭތުވެދިޔަ ހަތަރު އަހަރު ތެރޭ 25.9 ޕަސެންޓަށް އިތުރުވެފަ އެވެ. ވޯލްޑް ބޭންކުން އަންދާޒާ ކުރަނީ ލަންކާގެ އިގްތިސާދީ މި އަހަރު ކުރިއަރާނީ 2.2 ޕަސެންޓަށް ކަމަށެވެ. 

ރައީސް ޑިސަނައިކަގެ ކޯލިޝަނަށް ދެން ކުރިމަތިވާނެ އެންމެ ބޮޑު ޕްރެޝަރަކަށް ވާނީ ކެމްޕޭނުގައިވި ވައުދުތައް ހަގީގަތަކަށް ހެދުމެވެ. ޑިސަނައިކަ ވަނީ ގައުމުގެ ދަރަނި އަދާކޮށް، ލަންކާގެ ސިޔާސީ ސަގާފަތް ހެޔޮ ގޮތުގައި އިސްލާހުކޮށް ކުރީގެ ސަރުކާރުގައި ކޮރަޕްޝަން ހިންގި މީހުންނަށް އަދަބު ދެއްވާނެ ކަމަށް ވައުދުވެވަޑައިގެންފަ އެވެ. 

ލަންކާގެ އިގްތިސާދު އަދިވެސް އޮތީ ނާޒުކު ހާލަތެއްގަ އެވެ. އެންމެ ބޮޑު ސަމާލުކަމެއް އަދިވެސް ދޭންޖެހިފައި ވަނީ އަސާސީ ޚިދުމަތްތަކާއި ތަކެތި ރައްޔިތުންނަށް ފޯރުކޮށްދިނުމަށެވެ. މި ހާލަތުން ގައުމު ސަލާމަތް ކުރާނެ ގޮތަކީ އާ ސަރުކާރަށް ކުރިމަތިވާނެ ހަގީގީ ގޮންޖެހުމެވެ.