އިންޑިއާގެ ބެންގަލޫރުގެ ހޮޓަލެއްގެ ތެރޭގައި ދިވެއްސަކު މަރުވެފައި އޮއްވާ ފެނިއްޖެއެވެ. 

މަރުވެފައި އޮއްވާ ފެނުނީ ހަސަން ސުހައިލް ނަމަކަށް ކިޔާ އުމުރުން 43 އަހަރުގެ ދިވެއްސެކެވެ. އޭނާގެ ހަށިގަނޑު ފެނިފައި ވަނީ މިދިޔަ ބުދަ ދުވަހު އެވެ.

އިންޑިއާގެ ފުލުހުން ބުނެފައިވާ ގޮތުގައި އޭނާ އިންޑިއާއަށް ގޮސްފައި ވަނީ މިދިޔަ އާދިއްތަ ދުވަހު އެވެ. އޭނާ މަރުވެފައި އޮއްވާ ފެނުނީ ހޮޓަލުން ޗެކްއައުޓް ވުމަށް ހަމަޖެހިފައިވާ ދުވަހު އެވެ.

ހޮޓަލުގައި މަސައްކަތްކުރާ މުވައްޒަފުންނަށް ސުހައިލް އެންމެފަހުން ފެނިފައި ވަނީ އަންގާރަ ދުވަހުގެ ހަވީރުގެ ވަގުތެއްގަ އެވެ. ބުދަ ދުވަހު ކޮޓަރިން ނުކުމެފައި ނުވާތީ އާއި ކާތަކެއްޗަށް އޯޑަރުނުކުރާތީ، އޭނާއަށް ގުޅުމަށް ހޮޓަލުގެ މުވައްޒަފުން މަސައްކަތްކުރި އެވެ. އެހެންނަމަވެސް ސުހައިލުގެ ހަބަރެއް ނުވުމުން ހޮޓަލުގެ ފަރާތުން އެކަން ފުލުުހުންނަށް ރިޕޯޓުކުރި އެވެ.

ކޮޓަރީގެ ދޮރު ހަލާކުކޮށްލައިގެން ފުލުހުން ވަތްއިރު ފެނުނީ އޭނާ ބިންމަތީގައި އޮތްތަން ކަމަށާއި އޮތީ ހޮޑުލެވިފައި ކަަމަށް އިންޑިއާގެ ބައެއް ނޫސްތަކުން ބުނެފައިވެ އެވެ. 

ރާއްޖޭގެ އެމްބަސީ އާއި އިމިގްރޭޝަނުގެ އޮފިޝަލުންދަނީ ސުހައިލުގެ ދަތުރުގެ މަގުސަދު އޮޅުންފިލުވުމުގެ މަސައްކަތް ކުރަމުންނެވެ. އަދި ޕޯސްޓްމޯޓަމް ހެދުމާ މެދު އާއިލާއިން ވަކި ގޮތެއް ނިންމަންދެން އޭނާގެ ހަށިގަނޑު ރަމާއިއާ ހޮސްޕިޓަލުގެ މޯޗަރީގައި ބާއްވަންވަނީ ނިންމައިފައެވެ.