އިޙްސާންތެރިކަމަކީ އިޚްލާޞްތެރިކަމާއި، ތެދުވެރިކަމާ އަދި ހެޔޮކޮށް ހިތުމުގެ މަތިވެރި ސިފައެއް ކަމަށް މިއަދުގެ ހުކުރު ޚުތުބާގައި ބުނެފިއެވެ.

އިސްލާމްދީނާއި އީމާންކަމަށްފަހު، މުއުމިނެއްގެ ޙަޔާތުގައި އެންމެ މަތިވެރި ދަރަޖައެއް ލިބިގެންވާ ކަމަކީ އިޙްސާންތެރިކަން ކަމަށާއި އިޙްސާންތެރިކަމުގެ އަނެއް މާނައަކީ ކަމޭހިތުމާއި، އޯގާތެރިވުމާ އަދި ހެޔޮކޮށް ހިތުން ކަމަށް މުޅި ރާއްޖޭގައި މިއަދު އިއްވި ޚުތުބާގައި ބުނެފައިވެ އެވެ.

"ހަމަކަށަވަރުން މާތްﷲ ހުރިހާ ކަމެއްގެ މައްޗަށް އިޙްސާންތެރިކަން ލިޔުއްވާފައިވެއެވެ. ވީމާ، ތިޔަބައިމީހުން (ޖާއިޒު ގޮތުގައި) ޤަތުލުކުރާ ނަމަ، އޯގާތެރިކަމާއެކު އެކަން ކުރާށެވެ! އަދި ތިޔަބައިމީހުން އެއްޗެއް ކަތިލާއިރު، އޭގެ މައްޗަށް އޯގާތެރިވާށެވެ! ތިޔަބައިމީހުންކުރެ ކަތިލާ މީހާ އޭނާގެ ވަޅި ތޫނުކުރާހުށިކަމެވެ! އަދި ކަތިލާ ޖަނަވާރަށް އިތުރު ވޭނެއް ލިބުނަ ނުދޭހުށިކަމެވެ!" ކީރިތި ރަސޫލާގެ ޙަދީޘް ބަސްފުޅާ ހަވާލާދީ ޚުތުބާގައި ބުނެފައިވެއެވެ.

"އިޙްސާންތެރިކަމަކީ މުކައްލަފުންގެ އެންމެހައި ޢަމަލުތަކުގައި ހުރުން ލާޒިމު ސިފައެކެވެ. މީގެ ތެރޭގައި އިސްލާމްކަމާއި، އީމާންކަމާއި އަދި އަޅުކަންތައް ހިމެނެއެވެ. އަދި އެހެން މީހުންނާ މުޢާމަލާތް ކުރުމާއި، އަބުރު ހިފެހެއްޓުމާއި، ޢިލްމު އުނގެނުމާއި، މާތްﷲގެ އެއްކައުވަންތަކަން ޤަބޫލުކޮށް އެކަލާނގެއާ އެހެން ފަރާތެއް ބައިވެރި ނުކުރުންވެސް ހިމެނެއެވެ."

"މުއުމިނާގެ ކަންކަމަކީ އަޖައިބެކެވެ. ހަމަކަށަވަރުން އޭނާގެ ކަންކަމަކީ މުޅީން ވެސް ހެޔޮކަންކަމެވެ. އެއީ މުއުމިނާ ފިޔަވައި އެހެން މީހަކަށް ލިބިގެންވާ ސިފައެއް ނޫނެވެ. އޭނާއަށް އުފާވެރިކަމެއް މެދުވެރިވެއްޖެނަމަ، އެކަމަށް ޝުކުރުކުރެއެވެ. އެކަން ވަނީ އޭނާއަށް ހެޔޮކަމެއް ކަމުގައެވެ. އަދި ހިތާމަވެރިކަމެއް ޖެހިއްޖެނަމަ، އެކަމަށް ކެތްކުރެއެވެ. އެކަންވެސް ވަނީ އޭނާއަށް ހެޔޮކަމެއް ކަމުގައެވެ." މުއުމިނުންގެ ބައެއް ސިފަތައް ބަޔާންކުރައްވައި ކީރިތި ރަސޫލާ ޙަދީޘް ކުރައްވާފައިވާ ބަސްފުޅުގެ މާނައަށް އަލިއަޅުއްވާލައްވައި ޚުތުބާގައި ބުނެފައިވެއެވެ.

"ތިޔަބައިމީހުން ﷲ ދެކެ ލޯބިވާކަމުގައިވަނީނަމަ، ފަހެ ތިޔަބައިމީހުން ތިމަންކަލޭގެފާނަށް ތަބަޢަވާށެވެ. އޭ ރުން ﷲ ތިޔަބައިމީހުން ދެކެ ލޯބިވެވޮޑިގެންވާނެތެވެ. އަދި ތިޔަބައިމީހުންނަށްޓަކައި ތިޔަބައިމީހުންގެ ފާފަތައް ފުއްސަވައިދެއްވާނެތެވެ."  މާތްﷲގެ ވަޙީ ބަސްފުޅުގައި އަންގަވާފައިވެއެވެ.

"އިޙްސާންތެރިކަމުގެ މަތިވެރި ސިފަ ލިބިގެންވާ މުއުމިނާ އޭނާގެ އަޅުކަމުގައި މާތްﷲއަށް އިޙްސާންތެރިވާނެއެވެ. ނަމާދުގައި ދެއްކުންތެރިކަމެއް ނުހުންނާނެއެވެ. ޤިޔާމާއި ރުކޫޢާއި ސުޖޫދުގައި މަޑުމައިތިރިވާނެއެވެ. ޒަކާތް ނެރޭނީ ﷲގެ ރުހިވޮޑިގަތުން އެދިގެންނެވެ. އޭނާ ﷲ ދެއްވި ނިޢުމަތަށް ޝުކުރުވެރިވާ ޙާލު، ފަރުޟު ޒަކާތުގެ އިތުރުން ގިނަގިނައިން ޞަދަޤާތް ކުރާނެއެވެ."

ޚުތުބާގައި އިތުރަށް ބުނިގޮތުގައި އިޙްސާންތެރިޔާ ރޯދަ ހިފާނީ ހަމައެކަނި ކެއިންބުއިން ދޫކޮށްލުމަކުން ނޫން ކަމަށާއި އޭގެ އިތުރުން އޭނާ ރޯދައަށް ހުންނައިރު، އޭނާގެ ދުލާއި، ލޮލާއި، ހިތާއި އެންމެހައި ގުނަވަންތައް އުރެދުންތަކުން އެއްކިބާކުރާނެއެވެ. އަދި ބެލުންތައް ތިރިކޮށް، ބަސްމަގު ރިވެތިކުރާނެ ކަމަށާއި އަނިޔާވެރި ޢަމަލުތަކުން އޭނާގެ އަތްފައި ރައްކާތެރިކުރާނެ ކަމަށް ބުނެފައިވެއެވެ. ފާފަވެރިވާފަދަ ކުށްހީތަކުން އޭނާގެ ހިތް ރައްކާތެރިކުރާނެއެވެ.

އިޙްސާންތެރިކަމުގެ ތެރޭގައި އަޅުންތަކުގެ މައްޗަށް އިޙްސާންތެރިވުން ވެސް ހިމެނޭކަން ފާހަގަކޮށް ޚުތުބާގައި ބުނެފައި ވަނީ މީގެ ތެރެއިން އެންމެ އައުލާކަން ބޮޑު ބަޔަކީ މައިންބަފައިން ކަމަށެވެ.

"އެކަލާނގެއަށް މެނުވީ ތިޔަބައިމީހުން އަޅުކަން ނުކުރުމަށާއި މައިންބަފައިންނަށް ހެޔޮކޮށްހިތުމަށް ކަލޭގެފާނުގެ ވެރިރަސްކަލާނގެ ކަނޑައަޅުއްވައި އެންގެވިއެވެ. އެ ދެމީހުންކުރެ އެކަކު ނުވަތަ އެ ދެމީހުން ތިބާގެ ގާތުގައި ތިބެ މުސްކުޅިކަމާ ހަމައަށް ފޯރައްޖެނަމަ، އެ ދެމީހުންނަށް 'އުއްފު' ވެސް ނުބުނާށެވެ. (އެބަހީ: ނުރުހުމުގެ ކިތަންމެ ކުޑަ ބަހެއްވިޔަސް ނުބުނާށެވެ.) އަދި އެ ދެމީހުންނަށް އަޑުގަދަކޮށް ނުހަދާށެވެ. އަދި މާތް ބަހަކުން އެ ދެމީހުންނަށް ބަސްބުނާށެވެ. އަދި އޯގާތެރިވުމުގެ ގޮތުން ނިކަމެތިކަމުގެ ފިޔަ ތިބާ އެ ދެމީހުންނަށްޓަކައި ތިރިކޮށްލާށެވެ. އަދި ބުނާށެވެ. އަޅުގެ ވެރިރަސްކަލާކޮ! ކުޑަކުއްޖަކު ކަމުގައި މި އަޅާ ވީ ދުވަހު، އެ ދެމީހުން މި އަޅާ ބަލައި ބޮޑުކުރި ފަދައިން އެ ދެމީހުންނަށް ރަޙްމަތްލައްވާނދޭވެ!" މާތްﷲ ވަޙީކުރައްވާފައިވާ ބަސްފުޅުގެ މާނައާ ހަވާލާދީ ޚުތުބާގައި ބުނެފައިވެއެވެ.