މި ސަރުކާރު ތިން މަސް ތެރޭގައި ބަނގުރޫޓު ވާނެ ކަމަށް ހީކޮށް، އެމްޑީޕީން ތިބީ އަނބުރާ ވެރިކަން ލިބޭނެކަމުގެ އުއްމީދުގައި ކަމަށް އިކޮނޮމިކް މިނިސްޓަރު މުހައްމަދު ސައީދު ރޭ ވިދާޅުވެއްޖެއެވެ.

ދިވެހި ރުފިޔާގެ އަގު މިއިން ދުވަހަކު ނުވެއްޓޭ މިންވަރަށް، ގާތްގަނޑަކަށް އަށް ބިލިއަން ރުފިޔާ ޗާޕުކޮށް ބާޒާރަށް ނެރުމުގެ ސަބަބުން ދަށްވެފައިވާ ކަމަށް ސަރުކާރުން ގެނެސްދޭ "ހަފްތާ 52" ޕްރޮގްރާމުގައި ވާހަކަފުޅު ދައްކަވަމުން ސައީދު ވިދާޅުވިއެވެ.

އެހެންވެ، ދިވެހި ފައިސާގެ އަގެއް ނެތް ކަމަށާއި އެކަމަކު އެ ހާލަތުގައި ވެސް ރައީސް ޑރ. މުހައްމަދު މުއިއްޒު ނަމޫނާ ދައްކަވައި ނިންމެވީ ފައިސާ ޗާޕު ނުކުރަން ކަމަށް ސައީދު ވިދާޅުވިއެވެ.

"މި ބޭފުޅުން ހީކުރީ ތިން މަސް ދުވަސް ތެރޭގައި ގައުމު ބަނގުރޫޓުވާނެ ކަމަށް. މި ބޭފުޅުން ޝެޑިއުލް ހެދީ ވެސް އެހެން. ހަދައިގެން އަބްދުﷲ ޝާހިދުމެން ފަދަ ބޭފުޅުން ހީކުރީ ރައީސް މުއިއްޒު ވެރިކަމަށް ވަޑައިގެން ތިން މަހެއްގެ ތެރޭގައި ބަނގުރޫޓު ވާނެއޭ. އޭރުން ތިމަންނާމެންނޭ ދެން ވެސް އަންނާނީ،" ސައީދު ވިދާޅުވިއެވެ.

އެ ޝެޑިއުލާ އެއްގޮތަށް މިއަހަރުގެ މާޗު މަހާ ހަމައަށް ދާއިރު ބަނގުރޫޓުވާނެ ކަމަށް އެމްޑީޕީން ހީކޮށްގެން ތިއްބާ އިތުރު ތިން މަހަށް ވެސް ހިފަހައްޓާލެވިފައިވާ ކަމަށް ވެސް ސައީދު ފާހަގަކުރެއްވިއެވެ. އަދި އޭރު ވޯލްޑް ބޭންކާއި ފިޗާއި މޫޑީސް އިން ވެސް ރާއްޖޭގެ ރޭޓިން ދަށްކުރުމުން ރާއްޖެ މިސްރާބު ޖަހާފައި އޮތީ ބަނގުރޫޓުވުމާ ގާތަށް ކަމަށް ބުނެ އިދިކޮޅުން އަޑު ފަތުރަމުންދިޔަ ކަމަށް ސައީދު ވިދާޅުވި އެވެ.

"މި ބޭފުޅުން އެކި ސިޔާސީ ކޮޓަރިތަކާއި އެކި ތަންތަނުގައި ހަމަ ފޯރީގައި ގައުމު ބަނގުރޫޓުވަނީ ކަމަށް ބަލައިގެން އެކަމުގެ އުފާ ފާޅުކުރަމުން ދިޔައީ،" ސައީދު ވިދާޅުވިއެވެ. "އެކަމަކު އެ ހާލަތުގައި ވެސް ސަރުކާރުން ދިޔައީ ގައުމުތަކާ ގުޅުން ބަދަހިކޮށް މާލީ ހާލަތު ރަނގަޅު ކުރުމަށް މަސައްކަތް ކުރަމުން."