ރާއްޖޭގައި ހިންގަމުންގެންދާ ރިސޯޓްތަކަށްވުރެ ރަށްރަށުގައި ހިންގާ ގެސްޓުހައުސްތަކުގެ ޑިމާންޑް ބޮޑުވެފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފި އެވެ. 

ޓޫރިޒަމް މިނިސްޓްރީން މިއަދު އާންމުކުރި ތަފާސްހިސާބުތަކުން ދައްކާ ގޮތުގައި ހޯމަ ދުވަހުގެ ނިޔަލަށް 788،650 ޓޫރިސްޓުން ރާއްޖެ އައިސްފައިވާއިރު، ރާއްޖެ އައި ޓޫރިސްޓުންގެ 70 ޕަސެންޓް ރިސޯޓަތައް އަދި 24 ޕަސެންޓް ގެސްޓުހައުސްތައް ހިއްސާކުރެއެވެ. ހޮޓާތައް ތިން ޕަސެންޓް ހިއްސާކުރާއިރު، ޓޫރިސްޓު އުޅަނދުތައް ހިއްސާކުރަނީ 2.5 ޕަސެންޓެވެ.

ޓޫރިސްޓުންނަށް ހިދުމަތް ދިނުމަށް ރަޖިސްޓްރިކޮށްފައިވާ އެނދުގެ ނިސްބަތަށް ބަލާއިރު، މިހާރު ރާއްޖޭގެ ޓޫރިޒަމްގައި އެންމެ ޑިމާންޑް ބޮޑީ ގެސްޓުހައުސްތަކެވެ. ހިނގަމުން ގެންދާ އެނދުގެ ނިސްބަތަށް ބަލާއިރު ރިސޯޓްތަކުގައި ހުރި އެނދަކަށް ޖެހެނީ 12.8 ޓޫރިސްޓުންނެވެ. ނަމަވެސް ގެސްޓުހައުތަކުގެ އެނދަކަށް 13.6 ޓޫރިސްޓުން ޖެހެއެވެ. 

އެނދަކަށް ޖެހޭ ނިސްބަތުން ރަޖިސްޓްރީކޮށްފައިވާ ތަންތަނަށް ޓޫރިސްޓުން އައިސްފައިވާ މިންވަރު

ބުކިން ޑޮޓްކޮމްގައި ހުރި އަގުތަކަށް ބަލާއިރު، ރާއްޖޭގެ ރިސޯޓްތަކާއި ގެސްޓުހައުސްތައް ވިއްކާ ރޭޓްތައް ވެސް ދަށެވެ. ބައެއް ގެސްޓުހައުސްތަކުން ކޮޓަރިއެއް ރެއަކަށް 40 ޑޮލަރަށް ވިއްކާއިރު، ގިނަ ގެސްޓުހައުސްތަކުގެ އަގު ހުރީ 100 ޑޮލަރަށްވުރެ ދަށުގައެވެ. އަދި ބައެއް ރިސޯޓްތަކުން ކޮޓަރިއެއް 200 ޑޮލަރަށް ވެސް ލިބެން އެބަހުއްޓެވެ.

ޓޫރިޒަމް މިނިސްޓްރީގެ ތަފާތު ހިސާބުތަކުން ދެން ފާހަގަކުރެވެނީ، ޔޫރަޕުގެ ބޮޑެތި މާކެޓްތަކުން ރާއްޖެ އަންނަ ޓޫރިސްޓުންގެ ނިސްބަތް ރަނގަޅުކަމެވެ. މިހާރު ރާއްޖެ އަށް އެންމެ ގިނައިން ޓޫރިސްޓުން އަންނަ ފަސް މާކެޓުގެ ތެރެއިން ހަތަރު މާކެޓަކީ ޔޫރަޕުގެ ގައުމުތަކެވެ.

މި އަހަރުގެ މިހާތަނަށް އެންމެ ގިނައިން ޓޫރިސްޓުން އައި ފަސް ގައުމު

ޓޫރިޒަމް މިނިސްޓްރީން އަންދާޒާކޮށްފައިވަނީ 2.3 މިލިއަން ޓޫރިސްޓު މިއަހަރު ރާއްޖެއަށް ޒިޔާރަތްކުރާނެ ކަމަށެވެ. އެއް އަހަރު ދުވަހުގެ ތެރޭގައި ދެ މިލިއަން ޓޫރިސްޓުން ފުރަތަމަ ފަހަރަށް ރާއްޖެ އައީ މިދިޔަ އަހަރެވެ. ރާއްޖޭގައި 1972 ވަނަ އަހަރު ޓޫރިޒަމް ފެށުނު ފަހުން މިހާތަނަށް 30 މިލިއަނަށްވުރެ ގިނަ ޓޫރިސްޓުން ރާއްޖެއަށް ޒިޔާރަތްކޮށްފައިވެއެވެ.