މަތީ ފެންވަރުގެ ޔުރޭނިއަމް ވަސީލަތްތަކުން މުއްސަނދި ކެނެޑާއަށް ނިއުކްލިއަރ "ސުޕަރ ޕަވަރަކަށް" ވުމުގެ ފުރުސަތު ބޮޑެވެ. ނަމަވެސް މިކަން ޙަޤީޤަތަކަށް ހެދޭނެ ބާވައެވެ؟

ލީ ކަރޔަރ ނަމަކަށް ކިޔާ މީހަކު ވަނީ ގާތްގަނޑަކަށް 20 އަހަރު ވަންދެން ޔުރޭނިއަމް މައިނިން ދާއިރާގައި މަސައްކަތް ކޮށްފައެވެ. އޭނާ ފާހަގަކުރި ގޮތުގައި ފަހަކަށް އައިސް މި ދާއިރާއަށް ބޮޑު ބަދަލެއް އައިސްފައިވެއެވެ. ދެހާސް އެގާރާގައި ޖަޕާނުގައި ހިނގި ފުކުޝިމާ ނިއުކްލިއަރ ޕްލާންޓް ކާރިސާއާ ގުޅިގެން ނިއުކްލިއަރ ހަކަތައާ މެދު ދުނިޔޭގެ ނަޒަރު ބަދަލުވެ، ޔުރޭނިއަމްގެ އަގު ވަރަށް ބޮޑަށް ދަށްވިއެވެ.

ނަމަވެސް ފާއިތުވި ފަސް އަހަރުގެ ތެރޭގައި މި ޙާލަތު ބަދަލުވެ، ދުނިޔޭގެ ބާޒާރުގައި ޔުރޭނިއަމްގެ އަގު 200 އިންސައްތައަށް ވުރެ މަތިވެފައިވެއެވެ. މިއީ މި އަހަރުގެ އެންމެ މަތީ އަގު ހުރި މުދަލުގެ ތެރެއިން އެއް ބާވަތެވެ.

އޮސްޓްރޭލިއާގައި އުފަންވި ވިޔަފާރިވެރިއެއް ކަމުގައިވާ ކަރޔަރ ބުނި ގޮތުގައި މި ބަދަލު އައީ 2018 ގައި މައިކްރޯސޮފްޓްގެ ބާނީ ބިލް ގޭޓްސް ނިއުކްލިއަރ ހަކަތައަކީ "މޫސުމީ ބަދަލުތަކާ ކުރިމަތިލުމަށް އެންމެ އެކަށީގެންވާ" އެއްޗެއް ކަމުގައި ވިދާޅުވުމާ ގުޅިގެންނެވެ.

ހަތަރު އަހަރު ފަހުން، އޭރުގެ އިނގިރޭސި ބޮޑުވަޒީރު ބޮރިސް ޖޯންސަން ވަނީ ޤައުމުގެ ހަކަތައިގެ މަދުވެގެން 25 އިންސައްތަ ނިއުކްލިއަރ ހަކަތައިން އުފެއްދުމުގެ ސިޔާސަތެއް އެކުލަވާލައިފައެވެ. އޭގެ ކުޑަ ދުވަސްކޮޅެއް ފަހުން، ޔޫރަޕިއަން ޔޫނިއަނުން ވަނީ ނިއުކްލިއަރ ހަކަތައަކީ މޫސުމާ ރައްޓެހި ހަކަތައެއް ކަމުގައި ބަަލައިގެންފައެވެ.

ކަރޔަރގެ ކުންފުނި ނެކްސްޖެން އަކީ ކެނެޑާގައި އެންމެ ބޮޑު ޔުރޭނިއަމް މައިން ތަރައްޤީކުރަމުންދާ ކުންފުންޏެވެ. މި ކުންފުނީގެ އަގު މިހާރު ހަތަރު ބިލިއަން ޑޮލަރާ ގާތްކުރެއެވެ. 

ރެގިއުލޭޓަރުންގެ ހުއްދަ ލިބިއްޖެނަމަ، ނެކްސްޖެންގެ މަޝްރޫޢު އެކަނި ވެސް ކެނެޑާއަކީ ކުރިއަށް އޮތް 10 އަހަރުގެ ތެރޭގައި ދުނިޔޭގެ އެންމެ ބޮޑު ޔުރޭނިއަމް އުފައްދާ ޤައުމަށް ހެދުމަށް މަގުފަހިވެދާނެއެވެ. އަދި މިހާރު މި މަޤާމުގައި އޮތް ކަޒަކިސްތާން ފަހަތަށް ޖެހޭނެއެވެ.

ކެނެޑާގެ މައިނިންގ ކުންފުނިތަކުން ދެކޭގޮތުގައި ޤައުމުގެ މުއްސަނދި ވަސީލަތްތަކާއެކު، ނިއުކްލިއަރ ހަކަތައިގެ މުސްތަޤުބަލުގައި ކެނެޑާއަށް މުހިންމު ދައުރެއް އަދާކުރެވޭނެއެވެ. ކޮޕް29 މޫސުމީ ބަދަލުތަކާބެހޭ ބައްދަލުވުމުގައި 20 އަށްވުރެ ގިނަ ޤައުމުން 2050 ވަނަ އަހަރާ ހަމައަށް އެ ޤައުމުތަކުގެ ނިއުކްލިއަރ ހަކަތަ އުފެއްދުން ތިން ގުނަ އިތުރުކުރުމަށް އިޤްރާރުވުމާ ގުޅިގެން ޔުރޭނިއަމްއަށް އޮތް ޑިމާންޑް އިތުރުވާނެ ކަމަށް ބެލެވެއެވެ.

ނިއުކްލިއަރ ހަކަތައަކީ ގުދުރަތީ ގޭހާއި އަދި ކާބަން ފަދަ އެހެން ވަސީލަތްތަކާ އަޅާބަލާއިރު ކާބަން ބޭރުކުރުން ކުޑަ ހަކަތައެއްގެ ގޮތުގައި ފާހަގަކުރެވެއެވެ. ވޯލްޑް ނިއުކްލިއަރ އެސޯސިއޭޝަންގެ އަންދާޒާތަކުން ދައްކާ ގޮތުގައި ދުނިޔޭގައި އުފައްދާ ހަކަތައިގެ 10 އިންސައްތައަކީ ނިއުކްލިއަރ ހަކަތައެވެ. 

މި އަހަރުގެ ކޮޕް29 ގައި އަމާޒު ހިފާފައިވަނީ ނިއުކްލިއަރ މަޝްރޫޢުތަކަށް ފައިސާ ހޯދުމަށެވެ. މިއީ ދުނިޔޭގެ ފިނިހޫނުމިން މައްޗަށް ދިއުން މަޑުޖައްސާލުމަށް މިހާރު ގެންގުޅޭ ސިޔާސަތުތަކާއި އިންވެސްޓްމަންޓްތައް އެކަށީގެންވާ ވަރަށްވުރެ މަދުކަން ދާދިފަހުން އދ. އިން ނެރުނު ރިޕޯޓަކުން ދައްކާފައިވުމާ ގުޅިގެންނެވެ.

ޔުރޭނިއަމް ސަޕްލައި ކުރުމުގައި ކެނެޑާގެ ދައުރު އިތުރަށް މުހިންމުވަނީ ރަޝިޔާއިން ޔުކްރެއިންއާ ދެކޮޅަަށް ހަނގުރާމަ އިޢުލާން ކުރުމާ ގުޅިގެންނެވެ. ޚާއްޞަކޮށް އެމެރިކާއަށް މިކަން މުހިންމުވަނީ އެމެރިކާގެ ވިޔަފާރީގެ ނިއުކްލިއަރ ރިއެކްޓަރުތަކަށް ބޭނުންވާ އެންރިޗް ކުރެވިފައިވާ ޔުރޭނިއަމް ހޯދުމަށް ބޮޑަށް ބަރޯސާވެފައި ވަނީ ރަޝިޔާއަށް ކަމަށްވާތީއެވެ.