ދިވެހި ރާއްޖޭގެ ފަތުރުވެރިކަން ކުރިއަރުވައި، އިސްތިހާރުކުރުމަށް އިނގިރޭސިވިލާތުގެ އެންމެ ކާމިޔާބު ފުޓުބޯޅަ ކުލަބު ލިވަރޕޫލް އެފްސީއާ އެކު ވެވުނު އެެެއްބަސްވުމުގެ ސަބަބުން، މި އަހަރު ރާއްޖެއިން އެންމެ އިސްކަމެއް ދީގެން ބައިވެރިވާ ބައިނަލްއަގުވާމީ ޓޫރިޒަމް ފެއަރ ކަމަށްވާ އަރަބިއަން ޓްރެވަލް މާކެޓް (އޭޓީއެމް) ގައި ރާއްޖޭގެ އެކްސްޕޯޝާ ބޮޑުތަނުން އިތުރުވެގެންދާނެކަމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ މެނޭޖިންގ ޑިރެކްޓަރ އިބްރާހިމް ޝިޢުރީ ވިދާޅުވެއްޖެއެވެ.

އެމްއެމްޓީވީއަށް ދެއްވި ޚާއްސަ އިންޓަވިއުއެއްގައި ޝިޢުރީ ވިދާޅުވީ، މިމަހުގެ 28 އިންފެށިގެން 4 ދުހަވަހުގެ މުއްދަތަަށް ދުބާއީގައި ބޭއްވުމަށް ހަމަޖެހިފައިވާ 31 ވަނަ އޭޓީއެމް ފެއަރގައި އެކި ވަސީލަތްތަކުގެ ޒަރިއްޔާއިން ރާއްޖޭގެ ޓޫރިޒަމް، ލިވަަރޕޫލްއާ އެކު ވެވުނު އެއްބަސްވުމުގެ ދަށުން، މާކެޓް ކުރެވިގެންދާނެކަމަށެވެ.

ދުބާއީގައި ރާއްޖެ އިސްތިހާރުކުރުމުގައި ލިވަރޕޫލްގެ މަޝްހޫރު ކުޅުންތެރިންގެ ފޮޓޯ ބޭނުންކުރާނެ ކަމަށާއި، އެގޮތުން ދުބާއީގެ 100 ޓެކްސީއެއްގައި ރާއްޖެ އިސްތިހާރު ކުރުމުގައި ވެސް ލިވަރޕޫލްގެ ކުޅުންތެރިންގެ ފޮޓޯ ބޭނުން ކުރާނެ ކަމަށް ޝިޢުރީ ވިދާޅުވިއެވެ. ލިވަރޕޫލަށް ކުޅޭ މަޝްހޫރު ކުޅުންތެރިންގެ ތެރޭގައި މިހާރު ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާ ކަމަށް ގިނަބަޔަކު ގަބޫލުކުރާ މިސްރުގެ މުހައްމަދު ސަލާހްގެ އިތުރުން 2019 ވަނަ އަހަރު ޔޫރަޕުގެ މޮޅުކުޅުންތެރިޔާގެ މަގާމު ހާސިލްކުރި ދުނިޔޭގެ އެންމެ މޮޅު ޑިފެންޑަރުގެ ގޮތުގައި ފާހަގަކޮށްލެވޭ ވާޖިލް ވެންޑައިކް ހިމެނެއެވެ.

މީގެ އިތުރުން އޭޓީއެމް ފެއާރގައި ރާއްޖެއަށް ޚާއްސަކޮށްފައިވާ ސަރަހަައްދަށް ވަންނަ މައި ދޮރާށިން ވެސް ލިވަރޕޫލް އާއި ރާއްޖެއާ ގުޅުންހުރި ތަފާތު އިސްތިހާރުތައް ފެނިގެންދާނެ ކަމަށް ޝިޢުރީ ވިދާޅުވިއެވެ.

ލިވަރޕޫލްއާ އެކު ގާއިމްކުރި އެއްބަސްވުމުގެ ދަށުން މީގެ ކުރިން އިނގިރޭސިވިލާތް އަދި ޖަރުމަނުވިލާތުގައިވެސް ރާއްޖެ ޕްރޮމޯޓްކުރުމުގެ ހަރަކާތްތަކެއްވަނީ ހިންގައިފައެވެ. މި ހަރަކާތްތަކަށް ބޮޑު ތަރުހީބެއް ލިބުނުކަން ފާހަގަކޮށްލެވެއެެވެ.