ENGLISH
26 ނޮވެމްބަރު 2024
ސިޔާސީ ކަންކަމަކީ އަޅުގަނޑުމެންގެ ވަޒީފާއެއް ނޫން: ޖަރުމަނުގެ ކެޕްޓަން ކިމިޗް
14 ނޮވެމްބަރު 2024
|
ޖަރުމަނުގެ ކެޕްޓަން ކިމިޗް
އެންމެ މަޤްބޫލު
ޤަތަރުގައި 2022 ވަނަ އަހަރު ބޭއްވި ވޯލްޑް ކަޕްގެ ތެރޭގައި ސިޔާސީ ގޮތުން ކުރި ކަންކަމަކީ ކޮށްގެން ނުވާނޭ ކަމެއްކަމަށް ޖަރުމަނުގެ ކެޕްޓަން ޖޯޝުއާ ކިމިޗް ބުނެފިއެވެ.
ގަތަރުގައި އެއްޖިންސުން ގުޅުން ހިންގުމަކީ ގާނޫނާ ހިލާފު ކަމަކަށް ވާތީ، ޔޫރަޕްގެ ހަތް ގައުމެއްގެ ކެޕްޓަނުން ރާވައިގެން ވަނީ، މުބާރާތުގެ ތެރޭގައި ވަނީ 'ވަންލަވް' އާމް ބޭންޑް އަޅައިގެން ކުޅެފައެވެ.
އޭގެ އާމްބޭންޑް އަޅާ ކުޅުންތެރިންނާ ދެކޮޅަށް ދުނިޔޭގެ ފުޓުބޯޅައިގެ މައި ޖަމިއްޔާ ފީފާއިން އިންޒާރު ދިނުމާ ގުޅިގެން، ޖަރުމަނުގެ ކުޅުންތެރިން ވަނީ ފުރަތަމަ މެޗުގައި ޖަޕާން އަތުން ބަލިވުމުގެ ކުރިން ނެގި ޓީމު ފޮޓޯގައި އަނގަމަތީގައި އަތް އަޅައިފައެވެ.
"އަހަރެމެން ބޭނުންވީ ފީފާއިން ޓީމުތައް ހިމޭން ކުރަމުންދާކަމުގެ މެސެޖު ފޯރުކޮށްދޭން،" މެޗަށް ފަހު އޭރުގެ ހެޑް ކޯޗު ހަންސީ ފްލިކް ބުންޏެވެ.
ޔޫއެފާ ނޭޝަންސް ލީގުގައި ޖަރުމަން ކުޅޭ މެޗުގެ ކުރިން ވާހަކަ ދައްކަމުން ކިމިޗް ބުނީ އެފަދަ ކަމެއް ކުރެވުމުން އެކަމާ ހިތާމަކުރާ ކަމަށެވެ.
"އާންމުކޮށް އަހަރެމެން ކުޅުންތެރިން ވަކި ހާއްސަ ވަގުތުތަކެއްގައި ތެދުވާން ޖެހޭ. ހާއްސަކޮށް ގައުމީ ޓީމުގެ ކެޕްޓަންގެ ގޮތުގައި. އެކަމަކު ހުރިހާ ވަގުތެއްގައި ސިޔާސީ ގޮތުން ޚިޔާލު ފާޅުކުރުމަކީ އަހަރެމެންގެ މަސައްކަތެއް ނޫން،" ނޫސްވެރިންގެ ބައްދަލުވުމެއްގައި ކިމިޗް ބުންޏެވެ.
"ގަތަރުގެ މައްސަލައަށް ބަލަމާ ހިނގާ. ޓީމެއްގެ ގޮތުގައި އަދި ޤައުމެއްގެ ގޮތުގައި ޖުމްލަކޮށް ރަނގަޅު މަންޒަރެއް ދެއްކިފައެއް ނުވޭ. ސިޔާސީ ޚިޔާލު ފާޅުކުރުމުން މުބާރާތުގެ އުފަލުން ތަންކޮޅެއް ދުރަށް ދިޔައީ. އެއީ އިންތިޒާމްތަކަށް ބަލާއިރު ފާހަގަކޮށްލެވޭ ވޯލްޑް ކަޕެއް،" 2034 ވަނަ އަހަރުގެ ވޯލްޑް ކަޕާ ބެހޭ ގޮތުން ސުވާލު ކުރުމުން ކިމިޗް ބުންޏެވެ.
ޔޫއެފާ ނޭޝަންސް ލީގުގެ ގްރޫޕް އޭ 3 ގައި ޖަރުމަނު ވާދަކުރާނީ ހޮނިހިރު އަދި އަންގާރަ ދުވަހު ބޮސްނިއާ-ހަރްޒެގޮވިނާ އާއި ހަންގޭރީއާ ދެކޮޅަށެވެ.