ރައީސަކު ހޮވުމަށްޓަކައި ވޯޓުލުމަށް ފަހު އަނެއްކާވެސް ހަތް ހަފްތާ ފަހުން ލަންކާގެ ރައްޔިތުންގެ މަޖިލީހަށް މެމްބަރުން ހޮވުމަށްޓަކައި އެ ގައުމުގައި މިއަދު ވޯޓުލާން ފަށައިފިއެވެ.

އާދައިގެ ގޮތަކަށް ކެމްޕޭން ހަރަކާތްތައް ބޭއްވި މި އިންތިހާބުގައި 8،800 އަށް ވުރެ ގިނަ ކެންޑިޑޭޓުން ވާދަކުރެއެވެ.

ވޯޓުލުމުގެ ޙައްޤު ލިބިގެންވާ 17.1 މިލިއަން މީހުން ރާއްޖެ ގަޑިން މިއަދު 6:30 ގައި ވަނީ ވޯޓުލުން ފަށައިފައެވެ. އަދި ހަވީރު 3:30 އާ ހަމައަށް ވޯޓުލުން ކުރިއަށްދާނެއެވެ.

މަޖިލީހުގެ 225 ގޮނޑީގެ ތެރެއިން ސީދާ އިންތިހާބު ކުރާނީ 196 މެމްބަރުންނެވެ. ބާކީ ތިބި މީހުން ސިޔާސީ ޕާޓީތަކުން ނަން ހުށަހަޅާނީ ނިސްބަތުން ތަމްސީލުކުރުމުގެ ނަމުގައި ލިބޭ ވޯޓުގެ އިންސައްތައަށް ބަލައިގެންނެވެ.

"49 ސިޔާސީ ޕާޓީއަކާއި 284 މިނިވަން ގްރޫޕަކަށް ނިސްބަތްވާ 8،800 އަށް ވުރެ ގިނަ ކެންޑިޑޭޓުން އިންތިހާބުގައި ވާދަކުރޭ ނަމަވެސް ފޯރީގައި ކެމްޕޭން ކޮށްފައިވަނީ ގާތްގަނޑަކަށް 1،000 ކެންޑިޑޭޓުން،" ޕޯލް މޮނިޓަރިން ގްރޫޕް ޕީޕަލްސް އެކްޝަން ފޯ ފްރީ އެންޑް ފެއާ އިލެކްޝަންސްގެ އެގްޒެކެޓިވް ޑިރެކްޓަރު ރޮހާނާ ހެޓިއާރާޗީ ބީބީސީއަށް ދިން އިނޓަވިއުއެއްގައި ވިދާޅުވިއެވެ.

ލަންކާގެ އިންފްލޭޝަން މަތިވުމާއި ކާބޯތަކެތި ލިބުން ދަތިވުމާއި ތެޔޮ ހޯދަން އުނދަގޫވުމުގެ ސަބަބުން 2022 ވަނަ އަހަރު ސިޔާސީ ގޮތުން ބޮޑެތި މައްސަލަތައް ކުރިމަތިވެ، ރައީސް ގޮޓަބަޔާ ރާޖަޕަކްސާގެ ވެރިކަން ނިމުމަކަށް އައެވެ. އޭގެ ފަހުން ވެރިކަމަށް ވަޑައިގެންނެވި ރަނިލް ވިކްރަމަސިންހައަށް އިންޓަނޭޝަނަލް މަނިޓަރީ ފަންޑާއެކު ތިން ބިލިއަން ޑޮލަރުގެ ބެއިލްއައުޓް ޕެކޭޖެއް ނެގޯޝިއޭޓް ކުރެވުނު ނަމަވެސް ލަންކާގެ ގިނަ ރައްޔިތުންނަށް ދަނީ އިގްތިސާދީ ދަތިކަން އަދިވެސް އިހުސާސް ކުރަމުންނެވެ. އެހެންކަމުން މިއަދުގެ އިންތިޚާބު ވެގެންދާނީ އާ ރައީސް އަށް ވެސް ކުރިމަތިވާނެ ޓެސްޓަކަށެވެ.