ENGLISH

03 އޭޕްރީލު 2025

Advertisement

ސަޢުދީއާ ގުޅިގެން، ކޮރަޕްޝަނާ ގުޅޭ ބައިނަލްއަގުވާމީ ފޯރަމެއް ރާއްޖޭގައި ބާއްވަނީ

02 އޭޕްރީލު 2025

|

ފަޒީލް ޢަބްދުލް ލަތީފު

ފޯރަމް ބޭއްވުމަށް ހަމަޖެހިފައިވާ ވިލާ ނައުޓިކާ ރިސޯޓް--ފޮޓޯ:އައިއެފްއައި

ފަތުރުވެރިކަމުގެ ދާއިރާގައި ނަޒާހަތްތެރިކަން ވަރުގަދަކޮށް ކޮރަޕްޝަނާއި ދެކޮޅަށް މަސައްކަތްކުރުމަށް ޚާއްސަ ފޯރަމެއް ރާއްޖޭގައި ބާއްވަން ނިންމައިފިއެވެ.

އައިއޯސީ (އިންޓަރނޭޝަނަލް އޯގަނައިޒޭޝަން އޮފް އިސްލާމިކް ކޯޕަރޭޝަން) ގެ ގަައުމުތަކަށް ޚާއްސަކޮށްގެން ބާއްވާ މި ބައިނަލްއަގުވާމީ ފޯރަމް ކުރިއަށްދާނީ ވިލާ ނައުޓިކާ ރިސޯޓުގައެވެ.

"ސައުދީ މޯލްޑިވްސް އިންޓަނޭޝަނަލް ފޯރަމް އޮން އިންޓެގްރިޓީ" ގެ ނަމުގައި، ދެ ދުވަހުގެ މުއްދަތަށް ކުރިއަށްގެންދާ މި ފޯރަމް އިންތިޒާމުކުރަނީ، ރާއްޖޭގެ އެންޓި ކޮރަޕްޝަން ކޮމިޝަން (އޭސީސީ) އާއި ސައުދީގެ އޯވަސައިޓް އެންޑް އެންޓި ކޮރަޕްޝަން އޮތޯރިޓީ ގުޅިގެންނެވެ.

އިސްލާމީ ޤައުމުތަކުގެ އިސްވެރިންނާއި، ސިޔާސަތު ކަނޑައަޅާ ފަރާތްތަކާއި، އަދި ފަތުރުވެރިކަމުގެ ސިނާޢަތުގެ މާހިރުން އެއްތަނަކަށް ގެނެސްގެން ކުރިޔަށްގެންދަން ނިންމާފައިވާ މި ފޯރަމްގައި، ފަތުރުވެރިކަމުގެ ދާއިރާގައި ކޮރަޕްޝަން ހުއްޓުވުމަށް އައު އުކުޅުތަކާއި ސްޓްރެޓެޖީތައް ބޭނުން ކުރުމާ ގުޅޭ ގޮތުން މަސައްކަތްކުރަން ހަމަޖެހިފައިވެއެވެ.

މެއި މަހުގެ 6 ވަނަ ދުވަހުން 7 ވަަނަ ދުވަހުގެ ނިޔަލަށް ކުރިޔަށްގެންދާ، މިފޯރަމާ ގުޅޭ ގޮތުން ދައުލަތުގެ މީޑިޔާގައި ވާހަކަދައްކަވަމުން، އޭސީސީގެ ޑިރެކްޓަރ އޮފް ޕްރިވެންޝަން ފާތިމަތު އިބްނާ ވިދާޅުވީ، މި ފޯރަމްގައި ގާތްގަނޑަކަށް 50 އޯއައިސީގެ ގައުމުން ބައިވެރިވާނެ ކަމަށެވެ. ސެޝަންތަކަކަށް ބަހާލައިގެން ބާއްވާ ފޯރަމްގައި، އިސްލާމީ ގިނަ ގައުމުތަކެއްގެ އިސްފަރާތައް ވާހަކަ ދައްކަވާނެއެވެ. އޭގެ ތެރޭގައި ރާއްޖޭގެ އޭސީސީގެ ރައީސް އާދަމް ޝާމިލް އާއި ސައުދީގެ އޯވަސައިޓް އެންޑް އެންޓި ކޮރަޕްޝަން އޮތޯރިޓީގެ ރައީސް، މާޒިން ބިން އިބްރާހިމް އަލް ޚަމޫސް ހިމެނެއެވެ.

މީގެ އިތުރުން އިސްލާމީ ގައުމުތަކުގެ ބައެއް ވަޒީރުން އަދި ތަންފީޒީ އިދާރާތަކުގެ އިސްފަރާތްތައް، ފަތުރުވެރިކަމުގެ ދާއިރާގައި ހުރި ކޮރަޕްޝަންގެ ހިރާސްތައް، އަދި އެ ހިރާސްތަކުން އަރައިގަތުމާ ގުޅޭގޮތުން މިފޯރަމްގައި މަޝްވަރާ ކުރާނެއެެެވެ.

މި ފޯރަމުގައި ޔޫއެންޑީޕީގެ ފަރާތުން ވަރަށް ޚާއްސަ ޕެނަލް ޑިސްކަޝަނެއް ބޭއްވުމަށް ހަމަޖެހިފައިވެއެވެ. އިންޓަރޕޯލް، ވޯލްޑް ބޭންކް އަދި އދ. ގެ، ކޮރަޕްޝަންގެ ހިރާސްތައް ނައްތާލުމުގެ މާހިރުން، ފޯރަމުގެ ބައިވެރިންނަށް ފަތުރުވެރިކަމުގެ ދާއިރާގައި ހިނގާ މުޢާމަލާތްތަކުގައި ކޮރަޕްޝަން ނައްތާލުމަށް ބޭނުންކުރެވިދާނެ އެކި ބާވަތުގެ ވަސީލަތްތަކާއި، ނިޒާމުތަކާއި އަދި ގޮތްތަކުގެ މައުލޫމާތު ދޭނެއެވެ.

ކޮރަަޕްޝަނުގެ ކުށްތައް ގުޅިފައިވަނީ އިގްތިސާދާކަމާއި، ރާއްޖޭގެ އިގްތިސާދުގެ އެންމެ ބޮޑުބައެއް ހިއްސާކުރަނީ ފަތުރުވެރިމުގެ ދާއިރާ ކަމަށްވާއިރު، މި ފޯރަމްގެ ސަބަބުން ކޮރަޕްޝަނާ ދެކޮޅަށް ކުރާ މަސައްކަތްތައް ހަރުދަނާކުރުމަށް ރާއްޖެއަށް ފުރުސަތުތަކެއް ފަހިވެގެންދާނެ ކަމަށް އިބްނާ ވިދާޅުވިއެވެ. އަދި މިއީ އިސްލާމީ ގައުމުތަކާ އެކި ދާއިރާތަކުން ގުޅުންބަދަހިކުރުމަށް ލިބޭ ފުރުސަތެއްކަމުގައި އިބްނާ ފާހަގަކުރެއްވިއެވެ.

މި ފޯރަމްގައި އޮންލައިންކޮށް ބައިވެރިވުމުގެ ފުރުސަތު ވެސް ވަނީ ހުޅުވާލައިފައެވެ. އެގޮތުން މި ފޯރަމަށް ޚާއްސަކޮށް ތައްޔާރުކޮށްފައިވާ ވެބްސައިޓުން ( https://registration.ifi.org.mv) ބައިވެރިވުމަށް ރަޖިސްޓްރީ ކުރެވޭނެއެވެ. ފޯރަމުގެ އެޖެންޑާ ވެސް ހިމެނޭހެން، ފޯރަމާ ގުޅޭ ގިނަ މައުލޫމާތުތަކެއް މި ވެބްސައިޓުން ލިބޭނެއެވެ.

ކިޔުންތެރިންގެ ހިޔާލު