ENGLISH
03 އޭޕްރީލު 2025
ކަޅު ކަނޑުގައި ޙަމަލާތައް ހުއްޓައިލަން ރަޝިޔާ އާއި ޔޫކްރޭނުން އެއްބަސްވެއްޖެ
26 މާރިޗު 2025
|
އެންމެ މަޤްބޫލު
ކަޅު ކަނޑުގައި ހަމަލާތައް ހުއްޓާލުމަށް ރަޝިޔާ އާއި ޔޫކްރޭނުން އެއްބަސްވެފައިވާ ކަމަށް އެމެރިކާއިން އިޢުލާނުކޮށްފިއެވެ.
ރަޝިޔާ އާއި ޔޫކްރޭނުން ކުރަމުންދާ ހަނގުރާމަ ހުއްޓުވުމަށް، އެމެރިކާއިން އިސްވެ ދަނީ ދެ ޤައުމާ އެކު ވެސް މަޝްވަރާތައް ކުރަމުންނެވެ.
މިދިޔަ ހޯމަ ދުވަހު ސަޢުދީ އަރަބިއްޔާގައި ރަޝިޔާ އާއެކު ބޭއްވި އެންމެ ފަހުގެ މަޝްވަރާތަކަށްފަހު، އެމެރިކާއިން ބުނީ ކަޅު ކަނޑުގައި ޙަމަލާތައް މެދުކަނޑައިލަން ދެ ޤައުމުން ވެސް މިހާރު އެއްބަސްވެފައިވާ ކަމަށެވެ.
އަދި ހަނގުރާމައަށް ދާއިމީ ނިމުމެއް ގެންނަން ދެ ޤައުމުން ވެސް މަސައްކަތް ކުރާނެކަމުގެ ޔަޤީންކަން ދީފައިވާ ކަމަށް ވެސް އެމެރިކާއިން ބުންޏެވެ.
ކަޅު ކަނޑު ހުރަސްކޮށް ޔޫކްރޭނުގެ ގޮވާން ބޭރުކުރުން 2022 ވަނަ އަހަރުން ފެށިގެން ރަޝިޔާއިން އޮތީ ހުއްޓުވައިފައެވެ.
ނަމަވެސް، ޙަމަލާތައް ހުއްޓައިލުމުގެ މި އެއްބަސްވުމަށް ޢަމަލު ކުރަން ފަށާނީ، ހުޅަނގުގެ ޤައުމުތަކުން ރަޝިޔާގެ ދަނޑުވެރި އުފެއްދުންތަކާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް ލުއިކުރުމުން ކަމަށް ރަޝިޔާއިން ވަނީ ޝަރުތުކޮށްފައެވެ.
އެމެރިކާ ސަރުކާރުން ނެރުނު ބަޔާނެއްގައި ބުނީ، ރަޝިޔާގެ ދަނޑުވެރި އުފެއްދުންތައް ދުނިޔޭގެ ބާޒާރަށް އަލުން ވާޞިލްވުމުގައި އެހީތެރިވެދޭނެ ކަމަށެވެ.
މި އެއްބަސްވުމަކީ ދާއިމީކޮށް ސުލްޙަ ޤާއިމުކުރުމާ ދިމާއަށް އެޅުނު ރަނގަޅު ފިޔަވަޅެއްގެ ގޮތުގައި ޔޫކްރޭނުގެ ރައީސް ވޮލޮޑިމިޔަރ ޒެލެންސްކީ ސިފަކުރެއްވިއެވެ.
ނަމަވެސް، މި އެއްބަސްވުމަށް ރަޝިޔާއިން އިޙްތިރާމް ކުރާނެ ކަމާމެދު ސުވާލު އުފައްދަވައި، ޒެލެންސްކީ ވަނީ އެމެރިކާއިން އިތުރު އަސްކަރީ އެހީ ހޯދުމަށް ބާރު އަޅުއްވާނެ ކަމަށް ވިދާޅުވެފައެވެ.
މި މަޝްވަރާތަކުގެ ތެރެއިން އެމެރިކާއިން ހަޤީޤަތުގައި ބޭނުންވީ 30 ދުވަހަށް ޙަމަލާތައް ހުއްޓުވައިށެވެ. އެކަމަށް ޔޫކްރޭނު އެއްބަސްވެސްކުރުވިއެވެ. ނަމަވެސް، ޙަމަލާތައް ހުއްޓައިލަން ރަޝިޔާއިން ވަނީ ދެކޮޅު ހަދައިފައެވެ.