ޔުރޭނަސް އަދި އޭގެ އެންމެ ބޮޑު ފަސް ހަނދަކީ މުޅިން މަރުވެފައިވާ އަދި ދިރުމެއް ނެތް ތަންތަން ކަމުގައި ސައިންޓިސްޓުން ގިނަ ގަބޫލްކުރަމުން އައި ނަމަވެސް، އެ ތަންތަނަކީ ވެސް ދިރުން އާލާކުރެވިދާނެ ފުރުޞަތު އޮތް ތަންތަން ކަމަށް އާ ދިރާސާއަކުން ދައްކައިފިއެވެ.

މިހާތަނަށް ޔުރޭނަސް އާއި ބެހޭ ގޮތުން އެނގިފައިވާ ގިނަ މަޢުލޫމާތުތަކެއް ހޯދިފައިވަނީ 40 އަހަރު ކުރިން ނާސާގެ ވޮޔެޖަރ 2 އުޅަނދު އެ ސަރަހައްދަށް ކުރި ދަތުރުންނެވެ. ނަމަވެސް، އާ ތަހުލީލުތަކުން ދައްކާ ގޮތުގައި ވޮޔެޖަރ އެ ސަރަހައްދަށް ދަތުރުކުރި ވަގުތު ވަނީ އިރުގެ ތޫފަނަކާ ކުރިމަތިވެފައެވެ. 

މި އާ ހޯދުންތައް ވަނީ ނޭޗަރ އެސްޓްރޮނޮމީ ޖާނަލްގައި ޝާއިޢުކޮށްފައެވެ. މި ހޯދުންތަކާ ގުޅިގެން ނާސާއިން ވަނީ އަންނަ 10 އަހަރުގެ ތެރޭގައި ޔުރޭނަސް އޮބިޓަރ އެންޑް ޕްރޯބް ނަމަކަށް ކިޔާ އާ މިޝަނެއް ފޮނުވުމަށް ރާވާފައެވެ. މި މިޝަން 2045 ވަނަ އަހަރާ ހަމައަށް ޔުރޭނަސްއާ ހަމައަށް ފޯރާނެ ކަމަށް ލަފާކުރެވެއެވެ.