ENGLISH

03 އޭޕްރީލު 2025

Advertisement

ބީއެމްއެލް އިން ގެސްޓް ހައުސް ފައިނޭންސިން ހއ. އަތޮޅަށް ތައާރަފްކޮށްފި

24 މާރިޗު 2025

|

ޢަލީ ޝަހީމް

ހއ. އަތޮޅަށް ގެސްޓް ހައުސް ފައިނޭންސިން ތައާރަފްކުރުމަށް ހއ. ފިއްލަދޫގައި ބޭއްވި ރަސްމިއްޔާތުގެ ތެރެއިން. ފޮޓޯ: ބީއެމްއެލް

ބޭންކް އޮފް މޯލްޑިވްސް (ބީއެމްއެލް) އިން ގެސްޓް ހައުސް ފައިނޭންސިން ހއ. އަތޮޅަށް ތައާރަފުކޮށްފިއެވެ. 

ހއ. އަތޮޅަށް ގެސްޓް ހައުސް ފައިނޭންސިން ތައާރަފުކުރީ މިއަދު މެންދުރު ފަހު ހއ. ފިއްލަދޫގައި ބޭއްވި ރަސްމިއްޔާތެއްގައެވެ. އެ ރަސްމިއްޔާތުގައި މިނިސްޓަރ އޮފް ޓޫރިޒަމް އެންޑް އެންވަޔަރަމަންޓް ތާރިޤު އިބްރާހީމް އާއި މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުޙައްމަދު ސައީދު ބައިވެރިވެވަޑައިގެންނެވިއެވެ. ބީއެމްއެލްގެ ފަރާތުން ސީއީއޯ އަދި މެނޭޖިން ޑިރެކްޓަރ މުޙައްމަދު ޝަރީފްގެ އިތުރުން ބީއެމްއެލްގެ ޗެއަރޕަރސަން އަދި ޗީފް ބިޒްނަސް އޮފިސަރ ބައިވެރިވެވަޑައިގެންނެވިއެވެ. 

"ހއ. އަތޮޅުގައި ގެސްޓް ހައުސް ފައިނޭންސިން ތައާރަފްކުރުމަކީ އިގްތިސާދީ ކުރިއެރުން އިތުރުކޮށް، ދިވެހިން ހިންގާ ވިޔަފާރިތަކަށް ބާރުވެރިކަން ހޯދައިދިނުމަށް އަޅުގަނޑުމެން ކުރަމުންދާ މަސައްކަތުގެ ރަމްޒެއް. މާލީ ހައްލުތައް ފަސޭހައިން ލިބޭނެ އިންތިޒާމުތައް ހަމަޖައްސައިދީ، އަޅުގަނޑުމެންގެ މަގްސަދަކީ ފަތުރުވެރިކަމުގެ ދާއިރާ ތަރައްގީ ކުރުމަށާއި، އާ ފުރުސަތުތައް އުފެއްދުމަށާއި، މި އަތޮޅުގައި ދެމެހެއްޓިނިވި ކުރިއެރުން ހޯދުމަށް ވިޔަފާރިވެރިންނަށް އެހީތެރިވުން" -  ބީއެމްއެލްގެ ސީއީއޯ މުޙައްމަދު ޝަރީފް 

ބީއެމްއެލް އިން މިއަދު ވަނީ ހއ. އަތޮޅުގެ ހަތް ރަށެއްގައި އޭޓީއެމްގެ ހިދުމަތް ގާއިމުކޮށްފައެވެ. އޭޓީއެމްގެ ހިދުމަތް އަލަށް ފެށީ އުތީމު، ތުރާކުނު، އުލިގަމު، މޮޅަދޫ، މާރަންދޫ، ތަކަންދޫ އަދި މުރައިދޫގައެވެ. އެ ހަތް ރަށާއެކު ހއ. އަތޮޅުގެ ހުރިހާ ރަށެއްގައި މިހާރު ވަނީ އޭޓީއެމްގެ ހިދުމަތް ގާއިމުވެފައެވެ. 

ހއ. ފިއްލަދޫގައި މިއަދު މެންދުރު ފަހު އޮތް ރަސްމިއްޔާތުގެ ތެރެއިން: ހއ. އަތޮޅުގެ ހަތް ރަށުގައި އޭޓީއެމްގެ ހިދުމަތްވެސް މިއަދު ވަނީ ފަށާފައި-- ފޮޓޯ: ބީއެމްއެލް

ބީއެމްއެލް އިން ބުނީ މުޅި ރާއްޖޭގައި ހިމެނޭ ބޭންކިން ވިއުގަޔާއެކު 20 އަތޮޅުގެ 39 ބްރާންޗުގައި ހިދުމަތް ދޭއިރު، މިހާރު 107 ސެލްފް ސަރވިސް ބޭންކިން ސެންޓަރާއި 165 އޭޓީއެމްގެ ހިދުމަތް ލިބޭނެ ކަމަށެވެ. 

ހއ. އަތޮޅުގައި ގެސްޓް ހައުސް ފައިނޭންސިން ތައާރަފުކުރުމަކީ އަތޮޅުގެ އިގްތިސާދަށް ކުރިއެރުމެއް ލިބިގެންދާނެ ކަމެކެވެ. އަދި، އެ އަތޮޅުގެ ހުރިހާ ރަށެއްގައި އޭޓީއެމްގެ ހިދުމަތް ދޭން ފެށުމާއެކު ފައިސާގެ މުއާމަލާތްތައް ކުރުމުގައި ރައްޔިތުންނަށް ބޮޑު ލުއިފަސޭހައެއް ލިބިގެންދާނެއެވެ. 

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މިއަހަރު ނިމުމުގެ ކުރިން ރާއްޖޭގެ ހުރިހާ ރަށެއްގައި އޭޓީއެމްގެ ހިދުމަތް ފައްޓަވާނެކަމަށް ވިދާޅުވެފައެވެ.

ކިޔުންތެރިންގެ ހިޔާލު