ކޮންކާކަފް ނޭޝަންސް ލީގުގެ ފައިނަލުގައި މިއަދު ހެނދުނު ޕެނަމާ 2-1 އިން ބަލިކޮށް، މެކްސިކޯ އެ މުބާރާތުގެ ޗެމްޕިއަންކަން ހޯދައިފިއެވެ.

މިއީ މެކްސިކޯ އިން މި މުބާރާތް ކާމިޔާބުކުރި ފުރަތަމަ ފަހަރެވެ. މީގެކުރީން، ބޭއްވީ ތިން މުބާރާތް ވެސް ކާމިޔާބުކޮށްފައިވަނީ އެމެރިކާ އެވެ. އަދި މިއީ، ޕެނަމާގެ މައްޗަށް މެކްސިކޯ އިން ޖެހިޖެހިގެން ކުރިހޯދި ދެވަނަ ފައިނަލެވެ. އެ ޓީމު ވަނީ މީގެ ދެ އަހަރުކުރިން ބޭއްވި ކޮންކާކަފް ގޯލްޑް ކަޕްގެ ފައިނަލުގައި ވެސް ޕެނަމާ ބަލިކޮށްފައެވެ.

ކެލިފޯނިއާގައި ހުންނަ ސޯފައި ސްޓޭޑިއަމްގައި ކުޅުނު މެޗުގައި މެކްސިކޯ އިން ޖެހި ދެލަނޑުވެސް ކާމިޔާބުކޮށްދިނީ ރައުލް ހިމެނޭޒް އެވެ. މީގެތެރެއިން، އެއް ލަނޑުޖެހީ އިތުރު ވަގުތުގެ ތެރޭގައި ލިބުނު ޕެނަލްޓީއަކުންނެވެ.

ޕެނަމާގެ ހަމައެކަނި ލަނޑު، ފުރަތަމަ ހާފުގެ އިތުރު ވަގުތުގެ ތެރޭގައި އަޑަލްބާޓޯ ކަރަސްކީލާ ކާމިޔާބުކޮށްދިނީ ވެސް ޕެނަލްޓީއަކުންނެވެ.

މުބާރާތުގެ ބްރޯންޒް މެޑެލް މެޗުގައި އެމެރިކާގެ މައްޗަށް ކެނެޑާ ކުރިހޯދީ 1-0 އިންނެވެ.