ޔުއެފާ ނޭޝަންސް ލީގުގެ ކުއާޓާ ފައިނަލުގެ ދެވަނަ ލެގުގައި ރޭ ކުޅުނު މެޗުތަކަށް ފަހު، ޖަރުމަނާއި ޕޯޗުގަލް ސެމީ ފައިނަލުގައި ބައްދަލުކުރާން ޖެހިއްޖެއެވެ.

ޖަރުމަނުގެ ދަނޑުގައި އެ ޓީމު 3-3 އިން އިޓަލީއާ އެއްވަރުވެ، ދެ މެޗުގެ އެގްރިގޭޓުން ކުރިހޯދީ 5-4 އިންނެވެ.

ރޭގެ މެޗުގެ ފުރަތަމަ ހާފުގައި ޖަރުމަނުން ތިން ލަނޑު ޖަހާފައިވަނިކޮށް، އިޓަލީން ވަނީ ފަހު ހާފުގައި ތިން ލަނޑުޖަހައި އެއްވަރުކޮށްފައެވެ.

ޖަރުމަނުގެ ލަނޑުތައް ޖަހައިދިނީ ޖޯޝުއާ ކިމިޗް، ޖަމާލް މުސިއާލާ އާއި ޓިމް ކްލެއިންޑިއެންސްޓް އެވެ. އިޓަލީގެ ތިން ގޯލްގެ ތެރެއިން ދެ ލަނޑު ޖެހީ މޮއިޒް ކީން އެވެ. އެ ޓީމުގެ އަނެއް ލަނޑު ޖަހައިދިނީ ޖިއަކޮމޯ ރަސްޕަޑޯރީ އެވެ.

މުބާރާތުގައި ކުޅުނު ކުއާޓާގެ އަނެއް މެޗުގައި ޕޯޗުގަލް ވަނީ 5-3 ގެ އެގްރިގޭޓުން ޑެންމާކް ބަލިކޮށްފައެވެ. ރޭގެ މެޗުގެ ފުރިހަމަ ވަގުތު ހަމަވިއިރު 3-2 އިން ޕޯޗުގަލް ކުރީގައި އޮތުމުން، ދެ ޓީމު 3-3 ގެ އެގްރިގޭޓުން އެއްވަރުވުމުން ނަތީޖާ ނެރެން ޖެހުނީ އިތުރު ވަގުތުގެ 15 މިނެޓުގެ ދެ ހާފުގެ ކުޅުމަށް ފަހު އެވެ. އިތުރު ވަގުތުގެ ތެރޭގައި ޕޯޗުގަލް އިތުރު ދެ ގޯލްޖެހިއެވެ.

ޕޯޗުގަލްގެ ލަނޑުތައް ޖަހައިދިނީ ޓްރިންކާއޯ ދެ ގޯލާއި، ކްރިސްޓިއާނޯ ރޮނާލްޑޯ އާއި ގޮންސާލޯ ރާމޯސް އެވެ. އެ ޓީމުގެ އަނެއް ގޯލަކީ ޑެންމާކްގެ ޑިފެންޑަރު، ޔޯކިމް އެންޑަސަން އަތުން ބައިކޮޅަށް ވަތް ލަނޑެކެވެ. ޑެންމާކްގެ ލަނޑުތައް ޖެހީ ރަސްމުސް ކްރިސްޓެންސަން އާއި ކްރިސްޓިއަން އެރިކްސަން އެވެ.

މި މެޗުގެ ފުރަތަމަ ހާފުގެ ކުރީކޮޅު، ޕޯޗުގަލްގެ ކެޕްޓަން، ރޮނާލްޑޯ އަތުން ވަނީ ޕެނަލްޓީއެއް ނާކާމިޔާބުވެފައެވެ.

ސެމީގައި ޖަރުމަނާއި ޕޯޗުގަލް ބައްދަލުކުރާ މެޗު ކުޅުމަށް ހަމަޖެހިފައި ވަނީ އަންނަ ޖޫން މަހުގެ 4 ވަނަ ދުވަހު އެވެ. މި މެޗު ކުޅޭނީ ޖަރުމަނުގެ މިއުނިކްގައި ހުންނަ އެލިއާންޒް އެރީނާގައެވެ.