ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދުފުޅާާ އެއްގޮތްވާގޮތުގެ މަތިން، ހއ. މާރަންދޫގައި ބީއެމްއެލް އޭޓީއެމްގެ ޚިދުމަތް ފައްޓަވައިފިއެވެ.

މިދިޔަ ޖަނަވަރީ މަހުގެ 29 ވަނަ ދުވަހު ބީއެމްއެލްއާ އެރަށު ކައުންސިލާއެކު، އޭޓީއެމްއެއް އެޅުމަށް ސޮއެކުރެވުނު އެއްބަސްވުމުގެ ދަށުން ގާއިމު ކުރެވުނު މި އޭޓީއެމްގެ ޚިދުމަތް ފައްޓަވައިދެއްވީ ފަތުރުވެރިކަމާއި ތިމާވެށްޓާ ބެހޭ ވަޒީރު ޠާރިގު އިބްރާހީމެވެ.

ރައްޔިތުންގެ މާލީ ބައިވެރިކަން އިތުރުކުރުމަށް ސަރުކާރުން ކުރަމުންގެންދާ މަސައްކަތްތަަކުގެ ތެރެއިން، މުޅި ރާއްޖޭގެ މީހުން ދިރިއުޅޭ ހުރިހާ ރަށެއްގައި ބީއެމްއެލް އޭޓީއެމް ޚިދުމަތް ފޯރުކޮށްދިނުމުގެ މަސައްކަތް އިފްތިތާހު ކޮށްފައިވަނީ މިދިޔަ ނޮވެމްބަރު މަހު އެވެ.

ސަރުކާރުގެ މި އަމާޒަށް ވާސިލުވުމުގެ ގޮތުން ކުޑަ މުއްދަތެއްގެ ތެރޭގައި ގިނަ ޢަދަދެއްގެ ރަށްތަކެއްގައި  ބީއެމްއެލް އޭޓީއެމްގެ ޚިދުމަތް ވަނީ ފަށައިފައެވެ. ރަށްތަކުގައި ގާއިމުކުރާ މި އޭޓީއެމްތަކުން 24 ގަޑިއިރު ފައިސާ ޖަމާކުރުމާއި، ފައިސާ ނެގުމާއި، ޓްރާންސްފަރ ކުރުމާއި، ލޯނަށް ފައިސާ ދެއްކުމާއި، ކްރެޑިޓް ކާޑަށް ފައިސާ ދެއްކުމުގެ ޚިދުމަތް ލިބޭނެއެވެ.

މި މަސް ނިމުމުގެ ކުރިން އިތުރު 17 ރަށެއްގައި އޭޓީއެމްގެ ޚިދުމަތް ފެށިގެންދާނެކަމަށް ބީއެމްއެލްއިން މައުލޫމާތުދެއެވެ. މިދިޔަ 25 އަހަރުތެރޭގައި ދިވެހިރާއްޖޭގައި ގާއިމު ކުރެވިފައިވަނީ 96 އޭޓީއެމްއެވެ. ނަމަވެސް ރައީސް ޑރ. މުޢިއްޒުގެ ދުރުވިސްނުމާއެކު ފެށި މި މަސައްކަތުގެ ދަށުން މި އަހަރު ބީއެމްއެލް އަދި އެމްއައިބީގެ 122 އޭޓީއެމް ބެހެއްޓޭނެއެވެ.

ރާއްޖޭގެ މީހުން ދިރިއުޅޭ ހުރިހާ ރަށެއްގައި މި އަހަރުގެ ނިޔަލަށް އޭޓީއެމްގެ ޚިދުމަތް ދިނުމަކީ ރައީސުލްޖުމްހޫރިއްޔާގެ ވަޢުދުފުޅެކެވެ.