އިންޑިއަން ޕްރިމިއަރ ލީގު (އައިޕީއެލް) ގެ އެންމެ ކާމިޔާބު ދެ ޓީމުގެ ކުރިމަތިލުމުގައި ޗެންނާއީ ސުޕަ ކިންގްސް އަތުން ހަތަރު ވިކެޓުން މުމްބާއީ އިންޑިއަންސް ބަލިވެއްޖެއެވެ.

އެމްއޭ ޗިޑަމްބަރަމް ސްޓޭޑިއަމްގައި ރޭ ކުޅުނު މެޗުގެ ޓޮސް ދިމާވުމުން ޗެންނާއީ އިން ގަސްދުކުރީ ހޮވަން އަރާށެވެ. މުމްބާއީ އިން ކުޅެން އަރައި، 20 އޯވަރުގެ ތެރޭގައި ނުވަ ވިކެޓަށް 155 ލަނޑު ހެދިއެވެ.

މުމްބާއީގެ އިނިންގްސްގައި އެންމެ މޮޅަށް ކުޅުނީ 31 ލަނޑުހެދި ތިލަކް ވަރްމާ އާއި ނުބައިނުވެ 15 ބޯޅައިން 28 ލަނޑުހެދި ދީޕަކް ޗަހާރް އެވެ. މީގެއިތުރުން، އެ ޓީމުގެ ކެޕްޓަން، ސޫރްޔަކުމާރް ޔާދަވް 29 ލަނޑު ހެދިއެވެ.

މި އިނިންގްސްގައި ޗެންނާއީ އިން އެންމެ ރަނގަޅަށް އުކީ 18 ލަނޑަށް ހަތަރު ވިކެޓްނެގި އަފްޣާނިސްތާންގެ ސްޕިން ބޯލަރު، ނޫރް އަހުމަދު އެވެ. އެ ޓީމުގެ ޚަލީލް އަހުމަދު ވެސް ތިން ވިކެޓް ނެގިއެވެ.

ރައްދުގައި ކުޅެންއަރައި، ޗެންނާއީ މޮޅުވެގެން ފޭބީ ބާކީ ފަސް ބޯޅަ އޮއްވާ، 19.1 އޯވަރުގެ ތެރޭގައި ހަ ވިކެޓަށް 158 ލަނޑު ހަދައިގެންނެވެ. އެންމެ މޮޅު ކުޅުމެއް ދެއްކީ ނުބައިނުވެ 45 ބޯޅައިން 65 ލަނޑުހެދި ރަޗިން ރަވިންދްރަ އެވެ. އެ ޓީމުގެ ކެޕްޓަން، ރުތުރާޖް ގައިކްވާޑް ވަނީ 26 ބޯޅައިން 53 ލަނޑު ހަދައިފައެވެ.

ސްޕިން ބޯލަރުންގެ ފަރާތުން ރަނގަޅު ކުޅުމެއް ފެނިގެންދިޔަ މި މެޗުގައި މުމްބާއީގެ ވިގްނޭޝް ޕުތޫރު ތިން ވިކެޓް ނެގިއެވެ.

މެޗުގެ މޮޅު ކުޅުންތެރިއަކަށް ހޮވުނީ ޗެންނާއީގެ ނޫރް އަހުމަދު އެވެ.