ޔުއެފާ ނޭޝަންސް ލީގުގައި މިރޭ ކުޅުމަށް ހަމަޖެހިފައިވާ ދެވަނަ ލެގުގެ މެޗުގައި ތަފާތުތަކެއް ދައްކައިގެން ނުވަތަ ޖާދުލުން ނަމަވެސް ޖަރުމަން ބަލިކުރަންޖެހޭ ކަމަށް އިޓަލީގެ ކޯޗު، ލުސިއާނޯ ސްޕަލޭޓީ ބުނެފިއެވެ.

ސްޕަލޭޓީ މިހެން ބުނީ، މެޗުގެކުރީން ބޭއްވި ނޫސްވެރިންގެ ބައްދަލުވުމުގައެވެ.

މި ދެ ޓީމުގެ މެދުގައި މިދިޔަ ބުރާސްފަތި ދުވަހުގެ ރޭ ސެން ސީރޯގައި ކުޅުނު މެޗުން ޖަރުމަން އަތުން ބަލިވުމާއެކު، ރަށުން ބޭރުގައި ކުޅޭ މެޗަށް ނިކުންނައިރު ނަތީޖާ ބަދަލުކޮށްލުމަކީ އިޓަލީ އަށް އޮތް ބޮޑު ގޮންޖެހުމެކެވެ.

ސްޕަލޭޓީ ބުނީ، އިޓަލީން ނިކުންނަންޖެހެނީ ވަރުގަދަ ޓީމަކާ ދެކޮޅަށްކަން ވަރަށް ރަނގަޅަށް އެނގޭ ކަމަށާއި، އޭނާގެ ހަޔާތުގައި ބަލިވި ކިތަންމެ މެޗެއްގެ ވާހަކަ ނުދައްކާ އެކަން ފޮރުވާފައިވީހިނދު މި ފަހަރު އެކަން ކުރާން ބޭނުންނުވާ ކަމަށެވެ.

ދެވަނަ ލެގުގައި ޖަރުމަނާ ދެކޮޅަށް ނިކުންނައިރު، އިޓަލީ ޓީމުން ތަފާތު އައު ކަމެއް ކުރަންޖެހޭ ކަމަށާއި، ބަލިވެފައި އޮތުމުން އަލުން ފަށާއިރު ކުރިއެކޭ އެއްގޮތަށް ރަނގަޅު ޕާފޯމަންސެއް ދައްކަންޖެހޭ ކަމަށް ސްޕަލޭޓީ ބުންޏެވެ.

އޭނާގެ ޓީމުން ކުރަން މިޖެހެނީ ނުކުރެވޭ ވަރުގެ ކަމެއް ނޫން ކަމަށް ވެސް ސްޕަލޭޓީ ބުނެފައިވެއެވެ.

"އަހަރެމެން މި ބޭނުންވަނީ ހަމައެކަނި މެޗުގެ ބައެއް ދަނޑިވަޅުތައް ބަދަލުކޮށްލަން. ތަފާތު ދެއްކޭނެ ކުޅުންތެރިން އަހަރެމެންގެ އެބަތިބި،" ސްޕަލޭޓީ ބުންޏެވެ.

ސްޕަލޭޓީ ވަނީ، ޖަރުމަނާ ދެކޮޅަށް ކުޅުނު ފުރަތަމަ ލެގުގައި ލިބުނު އަނިޔާގެ ސަބަބުން މިރޭގެ މެޗުގައި ނުކުޅެވޭ އާސެނަލްގެ ޑިފެންޑަރު، ރިކާޑޯ ކަލަފިއޯރީ ނެތުމުން ބަދަލުގައި ކުޅޭ އަލެސަންދްރޯ ބުއޮންޖިއޮނޯއާ ބެހޭގޮތުން ވެސް ވާހަކަދައްކާފައެވެ.

ސްޕަލޭޓީ ބުނީ، އިޓަލީގެ ޑިފެންސްގައި ތިބި ކުޅުންތެރިންނަކީ އެއް ފެންވަރެއްގެ ރަނގަޅު ކުޅުންތެރިން ކަމަށާއި، އެއިން ކޮންމެ ކުޅުންތެރިއަކަށް ވެސް އަނެއް ކުޅުންތެރިއަކާއެކު ކުޅެވޭނެ ކަމަށެވެ.

ނޭޝަންސް ލީގުގެ ކުއާޓާ ފައިނަލުގެ ދެވަނަ ލެގުގައި އިޓަލީއާ ޖަރުމަން ބައްދަލުކުރާ މެޗު ފަށާނީ ރާއްޖޭގަޑިން މިރޭ 0045 ގައެވެ.