ޑެންމާކްގެ ފޯވާޑް، ރަސްމުސް ހޮއިލުންޑް ލަނޑުޖެހުމަށްފަހު އުފާ ފާޅުކުރިއިރު ޕޯޗުގަލްގެ ތަރި، ކްރިސްޓިއާނޯ ރޮނާލްޑޯ ކޮޕީ ކުރުމުން އެކަމާމެދު އޭނާގެ އެއްވެސް މައްސަލައެއް ނެތް ކަމަށް ރޮނާލްޑޯ ބުނެފިއެވެ.

ރޮނާލްޑޯގެ ކުރީގެ ކުލަބު، މެންޗެސްޓަރ ޔުނައިޓެޑަށް ކުޅެމުން އަންނަ އުމުރުން 22 އަހަރުގެ ހޮއިލުންޑް ވަނީ، ޔުއެފާ ނޭޝަންސް ލީގުގައި މިދިޔަ ބުރާސްފަތި ދުވަހުގެ ރޭ ޕޯޗުގަލް އަތުން ޑެންމާކް މޮޅުވި މެޗުގައި ލަނޑު ޖެހުމަށްފަހު ރޮނާލްޑޯ އުފާ ފާޅުކުރާ ގޮތަށް އެކަން ކޮޕީ ކޮށްފައެވެ.

އެ މެޗުގެ ފަހުން، ހޮއިލުންޑް ވެސް ވަނީ އެކަން އޭނާ ކުރީ ރޮނާލްޑޯ އަށް މަލާމަތްކުރުމުގެ ގޮތުން ނޫން ކަމަށް ބުނެފައެވެ.

ހޮއިލުންޑް ބުނީ، އެކަން ކުރީ ރޮނާލްޑޯ އަކީ 'އައިޑޮލް' އަށް ވުމުން ކަމަށާއި، ރޮނާލްޑޯގެ ސަބަބުން އޭނާގެ ކެރިއަރަށް ވަރަށް ބޮޑު އަސަރެއް ކޮށްފައިވާއިރު ޕޯޗުގަލް ކޮޅަށް، ރޮނާލްޑޯއާ ދެކޮޅަށް ލަނޑުޖެހުމަކީ ހާސިލްކުރެވުނު ބޮޑު ކަމެއް ކަމަށެވެ.

"އަހަރެންނަށް އެއީ މައްސަލައެއް ނޫން،" ރޮނާލްޑޯ ބުންޏެވެ.

ރޮނާލްޑޯ ބުނީ، ހޮއިލުންޑް އެކަން ކުރީ އޭނާ އަށް މަލާމާތްކުރުމުގެ ގޮތުން ނުވަތަ އިޙުތިރާމްނުކުރާތީވެ ނޫންކަން އެނގޭ ކަމަށެވެ.

ހޮއިލުންޑް ނޫނަސް، މުޅި ދުނިޔޭގެ އެހެން ކުޅިވަރުތައް ކުޅޭ މީހުންވެސް އޭނާގެ އުފާ ފާޅުކުރުން ކޮޕީ ކުރާ ކަމަށާއި، އެކަމުން ލިބެނީ ހާއްސަ ޝަރަފެއް ކަމަށް ވެސް ރޮނާލްޑޯ ބުންޏެވެ.

ދެން ކުޅޭ މެޗުގައި އޭނާ އުފާ ފާޅުކުރާ ގޮތް ހޮއިލުންޑް އަށް ފެންނާނެ ކަމަށް އުއްމީދުކުރާ ކަމަށާއި، އެއީ މައްސަލައެއް ނޫން ކަމަށް ވެސް ރޮނާލްޑޯ ބުނެފައިވެއެވެ.

ނިންމާލަމުން ރޮނާލްޑޯ ބުނީ، އޭނާ ލަނޑުޖަހައިފިއްޔާ އެއީ އޭނާ އަށް ރަނގަޅު ކަމެއް ކަމަށާއި، އޭނާ ގޯލް ނުޖެހި ނަމަވެސް ޓީމުގެ އެހެން ކުޅުންތެރިއަކު ލަނޑުޖެހިޔަސް އެއީ މައްސަލައެއް ނޫން ކަމަށެވެ.

ނޭޝަންސް ލީގުގެ ކުއާޓާ ފައިނަލުގެ ދެވަނަ ލެގުގައި ޑެންމާކާ ދެކޮޅަށް ޕޯޗުގަލްގައި އެ ޓީމު ކުޅޭ މެޗު ފަށާނީ މިރޭ ދަންވަރު 0045 ގައެވެ.