ENGLISH
04 އޭޕްރީލު 2025
ބާސެލޯނާގައި މަޑުކުރަން ނިންމީ ކޯޗު ފްލިކްގެ ފޯން ކޯލެއްގެ ސަބަބުން: ރަފީނިއާ
23 މާރިޗު 2025
|
ބާސެލޯނާގެ ރަފީނިއާ (ކ)، އެ ޓީމުގެ ކޯޗު، ފްލިކް އާއެކު. --ފޮޓޯ: ގެޓީ އިމޭޖަސް
އެންމެ މަޤްބޫލު
ބާސެލޯނާގައި މަޑުކުރަން ނިންމުމުގެ މައިގަނޑު އެއް ސަބަބަކީ އެ ޓީމުގެ ކޯޗު، ހަންސީ ފްލިކްގެ ފޯން ކޯލު ކަމަށް ރަފީނިއާ ބުނެފިއެވެ.
ދެހާސް ބާވީސް ވަނަ އަހަރު ބާސެލޯނާއާ ގުޅުނުފަހުން، އެތައް ފަހަރެއްގެ މަތީން އެ ޓީމު ދޫކޮށްލަން ވިސްނާފައިވާނެ ކަމަށް ރަފީނިއާ ވަނީ މިދިޔަ އޮކްޓޫބަރު މަހު ބުނެފައެވެ.
ބްރެޒިލްގެ ޓީވީ ސްޓޭޝަނެއް ކަމަށްވާ، ގްލޯބޯ އަށް ދިން އިންޓަވިއުއެއްގައި ރަފީނިއާ ބުނީ، އޭރު އެއްވެސް ކަމެއް ރަނގަޅަށް ނުދާ ކަމަށާއި، ދަނޑުމަތީގައި އެންމެ ރަނގަޅު ކުޅުން ދެއްކޭގޮތްނުވުމުން ގިނަ ބައެއްގެ ފާޑުކިޔުން އަމާޒުވަމުންދިޔަ ކަމަށެވެ. އަބަދުވެސް އިވެމުންދިޔައީ އެ ކުލަބު ދޫކޮށްލަން އުޅޭ ކަމުގެ ވާހަކަތައް ކަމަށް ވެސް ރަފީނިއާ ބުންޏެވެ.
އަދި، މީހުން އެދެމުންދިޔައީ ކުލަބު ދޫކޮށްލުމަށް ކަމަށާއި، އޭނާ އަކީ އެ ކުލަބަށް ކުޅޭ ފެންވަރުގެ ކުޅުންތެރިއެއް ނޫން ކަމަށް ބުނަމުންދިޔަ ކަމަށް ވެސް ރަފީނިއާގެ ވާހަކައިގައި ފާހަގަކުރިއެވެ.
މީގެކުރީން، ބާސެލޯނާއާ ޕީއެސްޖީ ކުޅުނު މެޗެއްގެ ތެރެއިން. --ފޮޓޯ: ގެޓީ އިމޭޖަސް
"އެހެންކަމުން އަހަރެން ކުލަބު ދޫކޮށްލުމާމެދު ވިސްނަން ފެށީން،" ރަފީނިއާ ބުންޏެވެ.
ކޮޕާ އެމެރިކާ ފުޓްބޯޅަ މުބާރާތަށްފަހު، ކޯޗު ފްލިކް ގުޅުމަށްފަހު އެދުނީ މިވަގުތަށް އެއްވެސް ނިންމުމެއް ނުނިންމާ، ޓީމުގެ ފަރިތަކުރުންތަކުގައި ބައިވެރިވުމަށް ކަމަށް ރަފީނިއާ ބުނެފައިވެއެވެ.
"އަހަރެންނަށް އިތުބާރު ކުރާ ކަމަށާއި، އިތުރަށް ވާހަކަދައްކަން ބޭނުންވާ ކަމަށް ކޯޗު ބުނި،" ރަފީނިއާ ބުންޏެވެ.
ރަފީނިއާ ބުނީ، ބާސެލޯނާގައި ދެމިހުރުމަށް ނިންމި ނިންމުމުގައި މުހިއްމު ދައުރެއް އަދަކުރީ އެ ފޯން ކޯލް ކަމަށެވެ. ކޯޗު ފްލިކްގެ އެދުމުގެ މަތީން، އަވަސް އަރުވާލައިގެން ގޮތެއް ނުނިންމާ ކުލަބާއެކު ފަރިތަކުރުންތައް ފަށައިގެން ރަނގަޅު ކުޅުމެއް ދެއްކުމަށް ކުރި މަސައްކަތުގެ ސަބަބުން މިހާރު ހުރި ހިސާބަށް އާދެވުނީ ކަމަށް ވެސް ރަފީނިއާ ބުންޏެވެ.
ރަފީނިއާ، ބާސެލޯނާ އަށް ކުޅެނީ. --ފޮޓޯ: ގެޓީ އިމޭޖަސް
ބާސެލޯނާއާއެކު ފްލިކްގެ ފުރަތަމަ ސީޒަނުގައި ރަފީނިއާ ވަނީ މިހާތަނަށް ކުޅުނު 42 މެޗުގައި 27 ލަނޑުޖަހައި، އިތުރު 20 ގޯލްޖެހުމަށް އެހީތެރިވެދީފައެވެ. މިއާއެކު، އޭނާ ވަނީ އަހަރުގެ ބެލޮންޑިއޯ އެވޯޑް ހާސިލްކުރާނެ ކަމަށް ބެލެވޭ ކުޅުންތެރިންގެ ލިސްޓުގެ އެންމެ ކުރީގައެވެ.
ރަފީނިއާ ހިމެނޭގޮތަށް ޓީމުގެ މުހިއްމު ކުޅުންތެރިންގެ ފަރާތުން ފެންނަމުންދާ މޮޅު ކުޅުމާއެކު ބާސެލޯނާ ވަނީ ލީގުގެ އެއްވަނަ އަށް ޖެހިލައިފައެވެ. އަދި، އެ ޓީމު ވަނީ ޔުއެފާ ޗެމްޕިއަންސް ލީގުގެ ކުއާޓާ ފައިނަލަށް ދަތުރުކޮށް، ކޮޕާ ޑެލް ރޭ ގެ ސެމީ ފައިނަލުން ވެސް ޖާގަ ހޯދާފައެވެ.
ބާސެލޯނާ އަށް ދެން އޮތީ މި މަހުގެ 28 ވާ ހުކުރު ދުވަހު އަމިއްލަ ދަނޑުގައި އޮސަސޫނާއާ ދެކޮޅަށް ކުޅެން ޖެހޭ މެޗެވެ.