އަބޫދާބީ ގްލޯބަލް މާކެޓް (އޭޑީޖީއެމް) ރަޖިސްޓްރޭޝަން އޮތޯރިޓީއާ އެކު ދިވެހި ރާއްޖޭގެ އިޤްތިޞާދީ ތަރައްޤީ އާއި ވިޔަފާރިއާބެހޭ ވުޒާރާއިން އެއްބަސްވުމެއްގައި ސޮއިކޮށްފިއެވެ.

މި އިސްތިރާޖީ ބައިވެރިވުމަކީ ދިވެހިރާއްޖޭގެ އިންޓަރނޭޝަނަލް ފައިނޭންޝަލް ސެންޓަރުގެ ކުރިއެރުމަށް އެހީތެރިވެދޭނެ ކަމެއް ކަމަށާއި، އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިޤްތިޞާދީ ތަރައްޤީގެ ވިސްނުމާ އެއްގޮތްވާ ކަމެއް ކަމުގައި ވަނީ އެ ވުޒާރާ އިން ހާމަކޮށްފައެވެ.

މި އެމްއޯޔޫގައި ސޮއިކުރީ އިޤްތިޞާދީ ތަރައްޤީ އާއި ވިޔަފާރިއާބެހޭ ވަޒީރު މުޙައްމަދު ސަޢީދާއި އޭޑީޖީއެމް ރަޖިސްޓްރޭޝަން އޮތޯރިޓީގެ ސީއީއޯ މިސްޓަރ ހަމަދު ސަޔާހް އަލްމަޒްރޫޢީ ބައިވެރިވެވަޑައިގެންނެވި ރަސްމިއްޔާތެއްގައެވެ.

މިނިސްޓަރ ސަޢީދު ވިދާޅުވީ، އޭޑީޖީއެމްއާއެކު މި ވެވުނު އެއްބަސްވުމަކީ ދިވެހި ރާއްޖެ ސަރަޙައްދީ މާލީ މަރުކަޒަކަށް ހެދުމުގެ މަގުގައި އެޅުނު މުހިންމު ފިޔަވަޅެއް ކަމަށެވެ.

"އޭޑީޖީއެމްގެ ރެގިއުލޭޓަރީ އަދި އޮޕަރޭޝަނަލް ތަޖުރިބާގެ ބޭނުން ހިފައިގެން، އަޅުގަނޑުމެން މިދަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިޤްތިޞާދީ ތަރައްޤީގެ ލަނޑުދަނޑިތަކާ އެއްގޮތްވާ ގޮތުގެ މަތިން، ބައިނަލްއަޤްވާމީ އިންވެސްޓްމަންޓްތައް ރާއްޖެއަށް ގެނައުމަށް މަގުފަހިކުރާ ބައިނަލްއަޤްވާމީ މާލީ މަރުކަޒެއްގެ ބިންގާ އަޅަމުން،" ވަޒީރު ސައީދު ވިދާޅުވި އެވެ.

މި އެއްބަސްވުމުގެ ދަށުން ދެ ފަރާތުން އެއްބާރުލުން ދޭނެ މައިގަނޑު ފަސް ދާއިރާއެއް ފާހަގަކޮށްފައިވެއެވެ. އެއީ:

1. ޤާނޫނީ އަދި އިޖުރާއީ އޮނިގަނޑު: ރަޖިސްޓްރީ ހިންގުން ހަރުދަނާކުރުމަށް އޮނިގަނޑުތައް އެކުލަވާލުން.

2. ޤާބިލުކަން އިތުރުކުރުމުގެ ޕްރޮގްރާމްތައް: މުވައްޒަފުންގެ ހުނަރު އިތުރުކުރުމަށް ތަމްރީނު ޕްރޮގްރާމްތަކާއި މުވައްޒަފުން ބަދަލުކުރުން.

3. ހިންގުމުގެ މިންގަނޑުތައް: އެންމެ ރަނގަޅު އުސޫލުތައް ހިއްސާކޮށްގެން މިންގަނޑުތައް ރަނގަޅުކުރުން.

4. ބައިނަލްއަޤްވާމީ މަޢުލޫމާތު ބަދަލުކުރުން: ބައިނަލްއަޤްވާމީ މިންގަނޑުތަކާ އެއްގޮތްވާ ގޮތުގެ މަތިން މަޢުލޫމާތު ހިއްސާކުރުން.

5. ޓެކްނިކަލް އެހީތެރިކަން: ރަޖިސްޓްރީ ހިންގުމުގެ ހަރުދަނާކަން އިތުރުކުރުމަށް ޓެކްނިކަލް އެހީތެރިކަން ފޯރުކޮށްދިނުން.

މި އެއްބާރުލުމުގެ ސަބަބުން ދެމެހެއްޓެނިވި ގޮތެއްގައި މަޢުލޫމާތު ހިއްސާކުރުމާއި، އެކުގައި ތަމްރީނު ޕްރޮގްރާމްތައް ހިންގުމަށް މަގުފަހިވެގެންދާނެއެވެ. މީގެ މަޤްޞަދަކީ ދިވެހިރާއްޖޭގެ މާލީ ދާއިރާގެ ތަރައްޤީ އަވަސްކުރުމާއި، އަބޫދާބީއާއެކު އޮންނަ އިޤްތިޞާދީ ގުޅުން ބަދަހިކުރުމާއި، އަދި ބޭރުގެ އިންވެސްޓްމަންޓްތައް ރާއްޖެއަށް ގެނައުމެވެ.