ހަރުދަނާ މާލީ ނަތީޖާތަކާ އެކު ބޭންކް އޮފް މޯލްޑިވްސް (ބީއެމްއެލް) އަށް މިދިޔަ އަހަރު ލިބުނު ފައިދާއިން، ހިއްސާގެ ފައިދާގެ ގޮތުގައި ރެކޯޑް އަދަދެއް ބަހަން ނިންމައިފިއެވެ. 

ބީއެމްއެލްގެ 2024 ވަނަ އަހަރުގެ މާލީ ބަޔާނުގައި ބުނެފައިވަނީ، މިދިޔަ އަހަރުގެ ކާމިޔާބު މާލީ ނަތީޖާތަކާއެކު ހިއްސާއަކަށް 55 ރުފިޔާގެ މަގުން ޖުމްލަ 296 މިލިއަން ރުފިޔާ ބެހުމަށް އަހަރީ އާއްމު ޖަލްސާއަށް ހުށަހެޅުމަށް ނިންމާފައިވާ ކަމަށެވެ. އެ ބޭންކުން ބުނީ އެއީ މިހާތަނަށް ހިއްސާގެ ފައިދާގެ ގޮތުގައި ދިނުމަށް ކަނޑައެޅި އެންމެ ބޮޑު އަދަދު ކަމަށެވެ. 

"މިހާތަނަށް ހިއްސާގެ ފައިދާގެ ގޮތުގައި ބެހުމަށް ނިންމި އެންމެ ބޮޑު އަދަދުން ދޭހަކޮށްދެނީ ހަރުދަމާ މާލީ ބިންގަލެއް ދަމަހައްޓައިގެން ހިއްސާދާރުންނަށް ފައިދާ ދިނުމަށް އަޅުގަނޑުމެން ދޭ އަހައްމިޔަތުކަން،" ބީއެމްއެލްގެ ސީއީއޯ އަދި މެނޭޖިން ޑިރެކްޓަރ މުޙައްމަދު ޝަރީފް ވިދާޅުވެފައި ވެއެވެ. 

ބީއެމްއެލްގެ ކުރިއެރުމާއެކު ހިންގުމުގެ ފައިދާގެ ގޮތުގައި 2.85 ބިލިއަން ރުފިޔާ އަދި ސާފު ފައިދާގެ ގޮތުގައި 2.24 ބިލިއަން ރުފިޔާ ވަނީ ލިބިފައެވެ. ބީއެމްއެލްއިން ބުނީ ބޭންކުގެ ކެޕިޓަލް ޕޮޒިޝަން ވެސް ޤާނޫނުން ލާޒިމްކުރާ ވަރަށްވުރެ މަތީ ނިސްބަތެއްގައި ހިފެހެއްޓިފައިވާ ކަމަށެވެ. އެގޮތުން ބީއެމްއެލްގެ ކެޕިޓަލް އެޑިކުއަސީ ރޭޝިއޯގެ ނިސްބަތް ހުރީ 58 އިންސައްތައިގައި ކަމަށް ބީއެމްއެލްގެ ބަޔާނުގައި ބުނެފައިވެއެވެ. 

މިދިޔަ އަހަރު ބީއެމްއެލްއާ އަލަށް 21،000 ކަސްޓަމަރުން ގުޅިފައިވާއިރު، އެއިން ދައްކުވައިދެނީ ރާއްޖޭގެ އެކި ކަންކޮޅުތަކުގައި އާއްމު ފަރުދުންނާއި ވިޔަފާރިތަކުން އެ ކުންފުންޏަށް ކުރާ އިތުބާރުކަމަށް ބަޔާނުގައި ބުނެފައިވެއެވެ. ދިވެހިރާއްޖޭގެ އިޤްތިޞާދުގެ ބީއެމްއެލްގެ ދައުރު ފުޅާވަމުން ދާއިރު، މިދިޔަ އަހަރު ލޯނާއި ފައިނޭންސިންގެ ގޮތުގައި 5 ބިލިއަނަށް ވުރެ ގިނަ ރުފިޔާ ދޫކޮށްފައިވާކަމަށް ބީއެމްއެލްއިން ބުނެފައިވެއެވެ. 

ސީއީއޯ އަދި މެނޭޖިން ޑިރެކްޓަރ މުހައްމަދު ޝަރީފް ވިދާޅުވީ 2024 ވަނަ އަހަރުގެ ކާމިޔާބީއާމެދު ފަހުރުވެރިވާ ކަމަށާއި، އެ ނަތީޖާ ހާސިލްކުރެވުނީ ބޭންކުގެ ހިންގުން ހަރުދަނާވެ މުވައްޒަފުންގެ ބުރަ މަސައްކަތުން ކަމަށެވެ. 

ބީއެމްއެލްއިން ބުނީ ކަސްޓަމަރުންނަށް ފޯރުކޮށްދޭ ޚިދުމަތްތައް އިތުރަށް ފުރިހަމަކޮށް، ރާއްޖޭގެ އެކި ކަންކޮޅުތަކުގައި އާއްމު ފަރުދުންނާއި ވިޔަފާރިތަކަށް އެހީތެރިކަން ފޯރުކޮށްދިނުމުގައި ދެމިއޮތުމަށް އެ ބޭންކުން ގިނަ މަސައްކަތްތަކެއް ކުރަމުން އަންނަ ކަމަށެވެ.