މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އިން އިންޑިއާގެ އެންމެ ކާމިޔާބު ކްރިކެޓް ޓީމު ކަމަށްވާ، މުމްބާއީ އިންޑިއަންސްއާ އެކު ޕާޓްނާޝިޕެއް ގާއިމުކޮށް، އެ ޓީމުގެ އޮފިޝަލް ޓޫރިސްޓް ޑެސްޓިނޭޝަން ޕާޓްނަރެއްގެ ގޮތުގައި ދިވެހިރާއްޖެ ހަމަޖައްސައިފިއެވެ.

މިއީ އިންޑިއާ މާކެޓަށް އަމާޒުކޮށްގެން އެމްއެމްޕީއާރްސީ އިން ހެދި މިފަދަ ފުރަތަމަ ޕާޓްނާޝިޕެވެ. މިއީ ރާއްޖެ އަށް އެންމެ މުހިއްމު މާކެޓްތަކުގެ ތެރެއިން އެއް މާކެޓެއްގައި ރާއްޖޭގެ ފައިތިލަ ސާބިތުކޮށް، އިތުރަށް ވަރުގަދަކުރުމަށް ކުރެވޭ މުހިއްމު މަސައްކަތެކެވެ.

ދުނިޔޭގައި ދެވަނައަށް އެންމެ ގިނައިން ބަލާ ކުޅިވަރަކީ ކްރިކެޓް ކަމަށްވާއިރު، މި ޕާޓްނާޝިޕްގެ ސަބަބުން އިންޑިއާގެ އިތުރުން މުޅި ދުނިޔޭގައި ވެސް ދިވެހިރާއްޖޭގެ ބްރޭންޑް އިތުރަށް ހަރުދަނާކުރުމަށް އެހީވާނެ ކަމަށް އެމްއެމްޕީއާރްސީ އިން ބުންޏެވެ.

އިންޑިއާގައި ބޭއްވޭ އެންމެ ބޮޑު ކްރިކެޓް މުބާރާތް ކަމަށްވާ، އިންޑިއަން ޕްރިމިއަރ ލީގު (އައިޕީއެލް) ގެ ޗެމްޕިއަންކަން ފަސް ފަހަރު ހޯދައިގެން އެންމެ ގިނަ ފަހަރު ކާމިޔާބުކޮށްފައިވާ މުމްބާއީ އިންޑިއަންސް އަކީ އެ ގައުމުގެ އެންމެ އަގުހުރި ފްރެންޗައިޒް ކްރިކެޓް ޓީމު ކަމަށްވީ ހިނދު، މި ގާއިމުކުރެވުނު ޕާޓްނާޝިޕްގެ ސަބަބުން އެ ސަރަހައްދުން އަންނަ ފަތުރުވެރިންގެ އަދަދު ކުރިއަށްވުރެ ބޮޑުތަނުން އިތުރުވެ، އިންޑިއާގެ އެކި ސިޓީތަކުގައި ވެސް ރާއްޖޭގެ ބްރޭންޑް އިތުރަށް ޕްރޮމޯޓުކުރެވިގެންދާނެ އެވެ.

މި ޕާޓްނާޝިޕްގެ ސަބަބުން އިންޑިއާ އިން މި އަހަރުގެ ތެރޭގައި ގެނައުމަށް ރާއްޖޭން ކަނޑައަޅާފައިވާ 200،000 ފަތުރުވެރިންގެ އަމާޒަށް ވާސިލްވުމުގައި މުހިއްމު ދައުރެއް އަދާކުރާނެ ކަމަށް އެމްއެމްޕީއާރްސީ އިން ބުންޏެވެ.

އެމްއެމްޕީއާރްސީ އިން ބުނީ، މި ޕާޓްނަރޝިޕްގެ ދަށުން، މުމްބާއީ އިންޑިއަންސް އާއެކު ޑިޖިޓަލް ޕްރޮމޯޝަންތަކާއި، އޮންގްރައުންޑް އެކްޓިވޭޝަންތަކާއި، ދިވެހިރާއްޖެއަކީ އެންމެ މަގްބޫލް ލަގްޒަރީ ޓްރެވަލް ޑެސްޓިނޭޝަންގެ ގޮތުގައި ފާހަގަކޮށްދޭ އެކްސްކްލޫސިވް ތަޖުރިބާތައް ހިމެނޭގޮތަށް ޝައުގުވެރިވާނެ ފަދަ ގިނަ ކެމްޕޭންތަކެއް ކުރިއަށްގެންދިއުމަށް ހަމަޖެހިފައިވާ ކަމަށެވެ.

އެގޮތުން، މި ޕާޓްނާޝިޕްގެ ތެރެއިން، ކްރިކެޓަށް ލޯބިކުރާ މީހުންނާއި ދަތުރުވެރިންނަށް ދިވެހިރާއްޖޭގެ ސާފު ގޮނޑުދޮށްތަކާއި، ޔުނިޔޭގެ ފެންވަރުގެ ރިސޯޓުތަކާއި، މިސާލުހުރި މެހެމާންދާރީ ތަޖުރިބާކުރުމުގެ ފުރުޞަތު ލިބިގެންދާނެއެވެ.

"މުމްބާއީ އިންޑިއަންސް އާ އެކު ގާއިމުކުރެވުނު މި ޕާޓްނާޝިޕަކީ އަޅުގަނޑުމެންނަށް ހާސިލްކުރެވުނު މުހިއްމު ލަނޑުދަނޑިއެއް،" އެމްއެމްޕީއާރްސީގެ ސީއީއޯ އަދި އެމްޑީ، އިބްރާހިމް ޝިއުރީ ވިދާޅުވިއެވެ.

ކްރިކެޓަކީ އިންޑިއާގައި އާއި ރާއްޖޭގެ އިތުރުން މުޅި ދުނިޔޭގެ ގިނަ އަދަދެއްގެ މީހުންގެ ހިތްތަކުގައި ހާއްސަ މަގާމެއް ލިބިފައިވާ ކުޅިވަރެއް ކަމަށާއި، އެހެންކަމުން އިންޑިއާގެ އެންމެ މަޝްހޫރު ކްރިކެޓް ޓީމުތަކުގެ ތެރެއިން ޓީމަކާ އެކު ގާއިމުކުރެވުނު ޕާޓްނާޝިޕްގެ ސަބަބުން އިންޑިއާ އިން އިތުރު ފަތުރުވެރިން ރާއްޖެ އައިސް، ދިވެހިރާއްޖެ އަކީ އެމީހުންގެ ޗުއްޓީ ހޭދަކުރާ މަންޒިލުގެ ގޮތުގައި ޚިޔާރުކުރާނެ ކަމާމެދު ޔަގީންކަން އެބައޮތް ކަމަށް ވެސް ޝިއުރީ ވިދާޅުވިއެވެ.

މުމްބާއީ އިންޑިއަންސްގެ ސްޕޯކްސްޕާސަން ވިދާޅުވީ، ކްރިކެޓާއި ޗުއްޓީ ހޭދަކުރުމަކީ އުމުރަށް ދެމިގެންދާ ހަނދާންތަކާ ގުޅުންހުރި ކަންކަން ކަމަށާއި، އެހެންކަމުން ރާއްޖެ އާއެކު ގާއިމުކުރެވުނު މި ޕާޓްނާޝިޕާ މެދު ވަރަށް ބޮޑަށް އުފާކުރާ ކަމަށެވެ. އަދި، މުޅި ދުނިޔޭގެ އެކި ކަންކޮޅުތަކުގައި ތިބި މުމްބާއީ އިންޑިއަންސްގެ ފޭނުންނަށް ދިވެހިރާއްޖެ ޕްރޮމޯޓުކުރުމަށް މަސައްކަތްކުރާނެ ކަމަށް ވެސް ވިދާޅުވިއެވެ.

އެންމެ ކުރިއްސުރެ ދިވެހިރާއްޖެ އަކީ އިންޑިއާގެ ފަތުރުވެރިންގެ މަގްބޫލު މަންޒިލެއް ކަމަށްވީހިނދު، އެ ގައުމުގެ ފަތުރުވެރިން ބޭނުންވާނެ ފަދަ ލަގްޒަރީ ސްޓޭތަކާއި، ތަފާތު ތަޖުރިބާތަކާއި، އިންޑިއާގެ އެކި ސިޓީތަކުން ކޮންމެ ހަފްތާއަކު ސީދާ ފްލައިޓްތަކުގެ ދަތުރުތައް ރާއްޖެ އަށް އޮތުމަކީ ވެސް މި ޕާޓްނާޝިޕްގެ ސަބަބުން ލިބިދޭނެ އިތުރު ފަސޭހައެކެވެ.

މީގެއިތުރުން، މުމްބާއީ އިންޑިއަންސް ކްރިކެޓް ޓީމާއެކު ގާއިމުކުރެވުނު މި ޕާޓްނާޝިޕްގެ އެހީގައި އިންޑިއާގެ ފަތުރުވެރިންނަށް ދިވެހިރާއްޖެ އަކީ އެންމެ މަގްބޫލު ދަތުރުގެ މަންޒިލެއްގެ ގޮތުގައި އިތުރަށް މަޝްހޫރުވެ، އިންޑިއާގެ ފަތުރުވެރިކަމުގެ ސިނާޢަތުގައި ވެސް ރާއްޖޭގެ މާކެޓް ވަރުގަދަވެގެންދާނެ ކަމަށް އެމްއެމްޕީއާރްސީ އިން ގަބޫލުކުރެއެވެ.