ENGLISH
03 އޭޕްރީލު 2025
މޯލްޑިވިއަނުން 'ޕްރިމިއަމް އިކޮނޮމީ' ގެ ޓިކެޓް ތަޢާރަފްކޮށްފި
19 މާރިޗު 2025
|
އެންމެ މަޤްބޫލު
އާ ޚިދުމަތްތަކާއެކު މޯލްޑިވިއަނުން 'ޕްރިމިއަމް އިކޮނޮމީ' ގެ ނަމުގައި އާ ޓިކެޓް ކްލާހެއް ތައާރަފްކޮށްފިއެވެ.
މޯލްޑިވިއަނުން މިއަދު އާއްމުކުރި ބަޔާނުގައި ބުނީ، އާ ޓިކެޓް ކްލާހުގެ ޚިދުމަތްތައް ލިބޭނީ ރާއްޖޭގެ އެތެރޭގެ އުދުހުންތަކުގައި ކަމަށެވެ. އެގޮތުން ޕްރިމިއަމް އިކޮނޮމީގެ ޓިކެޓުގައި ދަތުރުކުރަން ފަށާނީ އަންނަ އޭޕްރީލް މަހުގެ 13 ވަނަ ދުވަހުން ފެށިގެން ކަމަށް މޯލްޑިވިއަނުން ބުނެފައިވެއެވެ.
ޕްރިމިއަމް އިކޮނޮމީގެ ޓިކެޓް ނަގާ ފަރާތްތަކަށް ޚާއްސަ އޮފާތަކެއް މޯލްޑިވިއަނުން ވަނީ ހަމަޖައްސައިފައެވެ. އެގޮތުން، އިތުރު ފަސް ކިލޯގެ ލަގެޖް ގެންދެވުމާއި، ފުރާ ދުވަސް އެއްފަހަރު ހިލޭ ބަދަލުކުރެވޭނެ ކަމަށް މޯލްޑިވިއަނުން ބުނެފައިވެއެވެ. އަދި، ޚާއްސަ ސީޓުތަކެއް އެފަރާތްތަކަށް ހަމަޖައްސައި ދަތުރުގައި ޚާއްސަ ކެއުން ފޯރުކޮށްދޭ ގޮތަށް ވަނީ ހަމަޖެހިފައެވެ.
ޕްރިމިއަމް އިކޮނޮމީގެ ޓިކެޓް ލިބެނީ، ފުވައްމުލައް ސިޓީ، އައްޑޫ ސިޓީ، ކުޅުދުއްފުށި ސިޓީ، ހަނިމާދޫ، ކާޑެއްދޫ، މާފަރު އަދި ދަރަވަންދޫ އެއާޕޯޓަށް ދަތުރުކުރާ ފަރާތްތަކަށެވެ.
މާލެއިން ފުރާ ފަރާތްތަކަށް އެއާޕޯޓުގެ މޫމިނާ ލައުންޖުގައި މަޑުކޮށްލެވޭނެ އިންތިޒާމު ހަމަޖައްސައި، ދަރަވަންދޫއާއި އިފުރުން ފުރާ ފަރާތްތަކަށް އެ އެއާޕޯޓުތަކުގައި ހުރި ލައުންޖުގެ ޚިދުމަތް ލިބޭނެ ކަމަށް މޯލްޑިވިއަނުން ބުނެފައިވެއެވެ.
އަލަށް ތައާރަފްކުރި ޚިދުމަތާއެކު، ދަތުރުކުރާ ފަރާތްތަކަށް އިތުރު ލުއިފަސޭހަތަކެއް ލިބި ދަތުރުގެ ހިތްހަމަޖެހުން ބޮޑުވާނެކަމަށް މޯލްޑިވިއަނުން ބުނެފައިވެއެވެ.
މޯލްޑިވިއަނުން މިހާރު ވަނީ ޕްރިމިއަމް އިކޮނޮމީގެ ޓިކެޓް ގަންނަން ބޭނުންވާ ފަރާތްތަކަށް އެ ފުރުސަތު ހުޅުވާލައިފައެވެ. އެގޮތުން، މޯލްޑިވިއަންގެ ވެބްސައިޓާއި، މޯބައިލް އެޕްލިކޭޝަނުގެ އިތުރުން އެހެނިހެން ބުކިން ޗެނަލްތަކުން ޓިކެޓަށް މިހާރު އެދެވޭނެއެވެ.