އިންޑިއާ އާއި ރާއްޖެއާ ދެމެދު ކުރެވޭ ވިޔަފާރީގެ މުއާމަލާތްތަކުގައި ދެ ޤައުމުގެ ފައިސާ ބޭނުންކުރުމުގެ ހުއްދަ އިންޑިއާގެ މަރުކަޒީ ބޭންކުން ދީފިއެވެ.

މިނިންމުން ނިންމާފައިވަނީ މިދިޔަ އަހަރުގެ ނޮވެންބަރު މަހު ދެ ޤައުމުގެ ދެމެދު ސޮއިކޮށްފައިވާ ފަހުމުނާމާއާ ގުޅިގެންނެވެ.

ރިޒާވް ބޭންކް އޮފް އިންޑިއާއިން (އާރުބީއައި) ނެރުނު ބަޔާނެއްގައި ބުނެފައިވަނީ އިންޑިއާ އާއި ރާާއްޖެއާ ދެމެދު ކުރެވޭ ދެފުއްފެންނަ މާލީ މުއާމަލާތްތަކުގައި އޭސީޔޫ މެކޭނިޒަމްގެ އިތުރުން ދިވެހި ރުފިޔާ އަދި އިންޑިއާ ރުޕީސް ބޭނުންކުރެވޭނެ ކަމަށް އެބޭންކުން ނިންމާފާވާކަމެވެ. އަދި އެ ބޭންކުގެ ނިންމުމާ އެއްގޮތަށް ވަގުތުން އަމަލުކުރެވެން ފެށޭނެ ކަމަށެވެ.

މި ނިންމުމަކީ ޑޮލަރު ފަދަ ބޭރު ފައިސާއަށް ބަރޯސާވާ މިންވަރު ކުޑަކޮށް، ދެ ގައުމު ދެމެދު ކުރެވޭ ވިޔަފާރި އިތުރަށް ތަރައްގީކުރުމަށް އެޅޭ ހަރުދަނާ ފިޔަވަޅެއްކަމަށް ބައިނަލްއަގުވާމީ ވިޔަފާރި ދިރާސާކުރާ ފަރާތްތަކުން ބުނެއެވެ.

އިންޑިއާ އަކީ ރާއްޖެއަށް ބޭނުންވާ ގިނަ އަސާސީ ބާވަތްތަކެއް ގެ މައި ބާޒާރު ކަމަށްވާތީ، މި ނިންމުމަކީ ދެ ގައުމު ދެމެދު ވިޔަފާރީގެ މުއާމަލާތްތައް ކުރުމުގައި ހިނގާ ހަރަދުތައް ކުޑަކޮށް، ބޭރު ފައިސާގެ އަގަށް އަންނަ ބަދަލުތަކުން ކުރިމަތިވާ ގެއްލުންތައް ކުޑަކުރުމަށް އެހީވާނެ ކަމެއްކަމަށް ވިޔަފާރިވެރިން ބުނެއެވެ.

އާރުބީއައި އިން މި ފަދަ އެރޭންޖްމަންޓްތައް އެހެން ގައުމުތަކާއެކުވެސް ކޮށްފައިވާ ކަމަށާއި، މިއީ އިންޑިއާ ރުޕީޒްގެ ބައިނަލްއަގުވާމީ މަގުބޫލުކަން އިތުރުކުރުމަށް އިންޑިއާއިން ގެންގުޅޭ ސްޓްރެޓެޖީގެ ބައެއްކަމަށް ރިޕޯޓުތައް ބުނެއެވެ. 

ތަފާސްހިސާބުތަކުުން ދައްކާގޮތުގައި އިންޑިޔާ އަކީ ދިވެހިރާއްޖެއަށް ގިނައިން ފަތުރުވެރިން ޒިޔާރަތްކުރާ ގައުމެކެވެ. އާރްބީއައިގެ މިނިންމުމުގެ ހެޔޮ އަސަރު ރާއްޖޭގެ ފަތުރުވެރިކަމުގެ ސިނާއަތައް ކުރާނޭކަމަށް ރާއްޖޭގައި ފުޅާ ދާއިރާއެއްގައި ރިސޯޓް ހިންގާ ގިނަ ފަރާތްތަކުން އެއްބަސްވެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިންޑިއާއަށް ކުރެއްވި ރަސްމީ ދަތުރުފުޅުގައި އިންޑިއާގެ ބޮޑުވަޒީރު ނަރެންދުރަ މޯދީއާއެކު ބޭއްވެވި މަޝްވަރާ ބައްދަލުވުންތަކަށްފަހު، ދެގައުމުގެ ގުޅުން ތަފާތު ދާއިރާތަކުން އިތުރަށްބަދަހިވެ އަދި އޭގެ ހަގީގީ ފައިދާ ދިވެހިރައްޔިތުންނަށް ދަނީކުރަމުންނެވެ.