މޯލްޑިވިއަންގެ ޚިދުމަތް ފުޅާކޮށް ބައިނަލްއަޤްވާމީ ގިނަ މަންޒިލްތަކަށް ދަތުރުތައް ފެށުމުގެ އަމާޒަށް ވާސިލްވުމުގެ ގޮތުން، މިއަހަރުގެ ތެރޭގައި ސައުތު އެފްރިކާއާއި ޖަރުމަނުވިލާތައް ދަތުރުތައް ފަށަން ތައްޔާރުވަމުންދާކަމަށް ޤައުމީ އެއަރލައިން މޯލްޑިވިއަނުން ބުނެފިއެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވަޢުދާއި އެއްގޮތަށް ޤައުމީ އެއަރލައިނަށް ވައިޑް ބޮޑީ އެއަރކްރާފްޓެއް ގެނެސްފައިވަނީ މިއަހަރުގެ ޖަނަވަރީ މަހުއެވެ.

މި ވައިޑް-ބޮޑީ މަތިންދާ ބޯޓުގެ ދަތުރުތައް މިހާރުވެސް ދަނީ ޗައިނާގެ ތިން މަންޒިލު ކަމަށްވާ ބެއިޖިން، ޝަންގހާއީ އަދި ޗެންޑޫއަށް ކުރަމުންނެވެ.

ގައުމީ އެއާލައިން، މޯލްޑިވިއަންއިން ދަނީ ސައުތު އެފްރިކާ އަދި ޖަރުމަނުވިލާތުގެ އިތުރުން، ޔޫރަޕްގެ އިތުރު މަންޒިލްތަކަށް ދަތުރުތައް ފުޅާކުރުމަށްވެސް ގިނަ މަސައްކަތްތަކެއް ކުރަމުންނެވެ.

ސައުތުއެފްރިކާ އާއި ޖަރުމަނަށް މިއަހަރު ދަތުރުތައް ފެށުމަށް ވާންޖެހޭ ތައްޔާރީތައް މޯލްޑިވިއަނުން ދަނީ ވަމުންނެވެ. މިކަމާ ގުޅިގެން ދަތުރުފަތުރާ ބެހޭ ވަޒީރު މުހައްމަދު އަމީން އެކްސްގައި ވިދާޅުވެފައިވަނީ، މޯލްޑިވިއަންގެ ސީދާ ދަތުރުތައް ދުރު މަންޒިލުތަކަށް ފެށުމުން، ދަތުރުތައް ކުރުވުމުގެ ސަބަބުން އެފަދަ މަންޒިލުތަކުން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވެ، ރާއްޖޭގެ ޓޫރިޒަމަށް އެކަމުގެ ފައިދާ ވަރަށް ބޮޑަށް ކުރާނެ ކަމަށެވެ.

ޖަނަވަރީ މަހު މޯލްޑިވިއަންގެ ފުރަތަމަ ވައިޑް-ބޮޑީ އެއަރކްރާފްޓް ގެނައުމަށް ބޭއްވި ރަސްމިއްޔާތުގައި، ރައީސް ޑރ. މުއިއްޒު ވިދާޅުވީ، މިއަހަރުގެ އޮކްޓޯބަރ މަހުގެ ތެރޭގައި އިތުރު ވައިޑް-ބޮޑީ އެއަރކްރާފްޓެއް ރާއްޖެ ގެންނާނެކަމަށެވެ. މިހާރުވެސް މޯލްޑިވިއަންއިން ޗައިނާގެ ތިން މަންޒިލަކަށް ކުރަމުންދާ ދަތުރުތަކަށް އޮތް ޑިމާންޑް ވަރަށް ބޮޑު ކަމަށްް މޯލްޑިވިއަންއިން މައުލޫމާތުދެއެވެ.

މޯލްޑިވިއަނުން ބައިނަލްއަގްވާމީ ދަތުރުތައް ކުރާ މަންޒިލްތައް އިތުރުވުމަކީ، ރާއްޖޭގެ ފަތުރުވެރިކަމުގެ ސިނާއަތަށް އެކަމުގެ ނަފާ ކުރާނެ ކަމެކެވެ.