ޔޫކްރޭނާ ދެކޮޅަށް ކުރަމުންދާ ހަނގުރާމައިގައި ޙަމަލާތައް ހުއްޓައިލަންޖެހޭ ކަމަށް ޤަބޫލުކުރެއްވިޔަސް، އެ ހުށަހެޅުމުގެ އަސާސާމެދު ސުވާލު އުފައްދަވައި، ވަރުގަދަ ޝަރުތުތަކެއް ރަޝިޔާގެ ރައީސް ވްލެޑިމިޔަރ ޕޫޓިން ކުރިމަތިކުރައްވައިފިއެވެ.

އެމެރިކާ އާއި ޔޫކްރޭނުން ސައުދީ އަރަބިއްޔާގައި ކުރިއަށް ގެންދިޔަ މަޝްވަރާތަކަށްފަހު، އެމެރިކާއިން ހުށަހެޅި ގޮތަށް 30 ދުވަހަށް ޙަމަލާތައް ހުއްޓައިލަން ޔޫކްރޭނުން ވަނީ އެއްބަސްވެފައެވެ.

އަދި އެ ހުށަހެޅުން ހިފައިގެން، އެމެރިކާގެ މަންދޫބުން މިހާރު ވަނީ ރަޝިޔާއަށް ވަޑައިގެންފައެވެ.

ރަޝިޔާ ސަރުކާރުގެ ބައެއް އޮފިޝަލުން ވިދާޅުވެފައިވާ ގޮތުގައި، ޓްރަމްޕްގެ ޙާއްސަ މަންދޫބު ސްޓީވް ވިޓްކޯފް އާއެކު ޕޫޓިން އިއްޔެގެ ވަގުތެއް ބައްދަލުކުރައްވަން އޮތީ ހަމަޖެހިފައެވެ.

ނަމަވެސް، އެ ބައްދަލުވުން ބޭއްވި ކަމެއް ރަޝިޔާއިން ރަސްމީކޮށް ހާމަކޮށްފައެއް ނުވެއެވެ. ބައެއް މަސްދަރުތަކާ ޙަވާލާދީ ރިޕޯޓުތައް ބުނާ ގޮތުން، ރަޝިޔާއަށް ކުރެއްވި ދަތުރުފުޅަށްފަހު ވިޓްކޯފް މިއަދުގެ ވަގުތެއްގައި ވަނީ ފުރާވަޑައިގެންފައެވެ.

"ޙަމަލާތައް ހުއްޓައިލުމުގެ ވިސްނުން ރަނގަޅު. އެކަމަށް އަޅުގަނޑުމެން ތާއީދު. އެކަމަކު ބައެއް ކަންކަމާ ގުޅޭގޮތުން އެބަޖެހޭ މަޝްވަރާކޮށް، އަޅުގަނޑުމެންގެ ހުރި ބައެއް ސުވާލުތަކަށް ޖަވާބު ހޯދަން،" ޙަމަލާތައް ހުއްޓައިލުމުގެ އެއްބަސްވުމާ ގުޅޭގޮތުން ޕޫޓިން ނޫސްވެރިންނަށް ވިދާޅުވިއެވެ.

ޕޫޓިން ވިދާޅުވި ގޮތުގައި، ޙަމަލާތައް ހުއްޓައިލުމުގެ އެއްބަސްވުމަކަށް ދާއިމީކޮށް ހަނގުރާމަ ހުއްޓައިލުމާ ހަމައަށް ދެވެންވާނެއެވެ.

"އަދި މި ހަނގުރާމަ ފެށުމުގެ މުގުލުގައި އޮތް މައްސަލައަށް ޙައްލެއް ލިބެންޖެހޭނެ،" ޕޫޓިން ވިދާޅުވިއެވެ.

އެއީ ސީދާ ކޮން މައްސަލައެއް ކަމެއް ޕޫޓިން ވިދާޅެއްނުވެއެވެ.

ނަމަވެސް، ޕޫޓިން އިޝާރާތް ކުރެއްވީ ޔޫކްރޭނުގެ ކޮންޓްރޯލްގެ ދަށަށް ގެނެސްފައިވާ ރަޝިޔާގެ ކުރޫސްކް ސަރަޙައްދުކަމަށް ބެލެވެއެވެ.

ޕޫޓިން ވިދާޅުވި ގޮތުގައި، ޔޫކްރޭނުން މިދިޔަ އަހަރުގެ އޯގަސްޓު މަހުން ފެށިގެން ހިފާފައިވާ އޮތް ކުރޫސްކް ސަރަޙައްދުތައް ރަޝިޔާ ސިފައިން މިހާރު ވަނީ އަނބުރާ ހޯދައިފައެވެ.

ޙަމަލާތައް ހުއްޓައިލުމުގެ އެއްބަސްވުމާ ގުޅޭގޮތުން ހުރި ސުވާލުތައް ވެސް ނޫސްވެރިންގެ ބައްދަލުވުމުގައި ޕޫޓިން ތިލަކޮށްދެއްވިއެވެ.

"އެ 30 ދުވަހުގެ މުއްދަތު ބޭނުންކުރާނީ ކިހިނެއް؟ ޔޫކްރޭނުން އަސްކަރިއްޔާގެ ސަފުތައް އަލުން ރުކުރުވާލައި، ހަތިޔާރު ހޯދައި، މީހުން ތަމްރީނުކުރަން؟ ނޫނީ އެ ކަހަލަ އެއްވެސް ކަމެއް ނުކުރާނެ؟ އެހެންވާނަމަ، އެކަން ބަލައި، ފާރަވެރިވާނީ ކޮން ބައެއް؟،" ޕޫޓިން ސުވާލު ކުރެއްވިއެވެ.

ޕޫޓިން ވިދާޅުވީ، މި ސުވާލުތަކާ އެކު އެމެރިކާ އާ އެކު ރަޝިޔާއިން މަޝްވަރާ ކުރައްވާނެ ކަމަށެވެ. މިގޮތުން، އެ ސުވާލުތަކަށް ޖަވާބު ހޯއްދަވަން ޓްރަމްޕް އާ ފޯނުން ގުޅުއްވާނެކަމުގެ އިޝާރާތެއް ޓްރަމްޕް ދެއްވިއެވެ.