އަގަށް ބަލައިގެން ބާޒާރުކުރާނަމަ، ދަތުރުވެރިންގެ މާރުކޭޓުގެ ހުރިހާ ގޮޅިތަކަކުން ވެސް އަގު ބެލުމަކީ އެންމެ ބުއްދިވެރި ގޮތެވެ. 

އެއް ރަށަކުން އެއް ދޯންޏަކުން ގެންނަ މުދާ ވެސް މާލޭގެ ދަތުރުވެރިންގެ މާރުކޭޓުގައި ތަފާތު އަގުގައި ވިއްކައެވެ. 

އަނބު ދަނޑުތައް އޮންނަ ށ. ފީވަކުގެ އަނބު މާރުކޭޓުގައި މި ވަގުތު ތިޔާއްގެވެ. ކުރިން ބައި ބަޔަށް ވިއްކާ ދިވެހި އަނބު މިހާރު މާރުކޭޓުގައި ވިއްކަނީ ކިރައިގެންނެވެ. ކިރައިގެން ވިއްކާ ނަމަ އަނބުގެ ސައިޒު ތަފާތު ވިއަސް އަގަށް ތަފާތެއް ނާންނާނެ އެވެ. ނަމަވެސް ތާޒާކަމަށް ބަލައި މާރުކޭޓުގެ އެކި ގޮޅިތަކުގައި އަނބު ވިއްކަން ހުރީ އެކި އަގުތަކުގައެވެ. ބައެއް ގޮޅިތަކުގައި 70ރ. އަށް އަނބު ކިލޯއެއް ވިއްކާއިރު، 80ރ، 90ރ. އަދި 100ރ. އަށް ވެސް އަނބު ކިލޯއެއް ވިއްްކަން އެބަހުއްޓެވެ. 

ދަތުރުވެރިންގެ މާރުކޭޓުގައި ވިއްކަން ބަހައްޓާފައިހުރި ރަންބުސްތާނުތަކެއް: ކިލޯއެއް ވިއްކަނީ 15ރ. އާ 18ރ. އަށް-- ފޮޓޯ/އެމްއެމްޓީވީ

މާރުކޭޓުގައި މަދުން ހުންނަ އާ ބާވަތްތަކަށް ބަލާއިރު ވެސް އެކި ގޮޅިތަކުގައި އެއް ބާވަތެއްގެ އަގު ތަފާތުކަން ފާހަގަކުރެވެއެވެ. މިހާރު ބާޒާރުގައި ކޮންމެވެސް ވަރަކަށް ލިބެން ހުރި، ރަންބުސްތާނު ކިލޯއެއް 15ރ. އާއި 18ރ. އަށް ވެސް މާރުކޭޓުގައި ވިއްކަން އެބަހުއްޓެވެ. 

ރޯދަމަހު އެންމެ ޑިމާންޑް ބޮޑުވާ އެކައްޗަކީ ކުރުނބަލެވެ. ގިނަ ބަޔެއްގެ ސަމާލުކަން މިހާރު އެންމެ ބޮޑަށް ލިބެނީ ރާއްޖޭގެ ގިނަ ރަށްތަކެއްގައި ފަހަކަށް އައިސް ހައްދާ މެލޭޝިޔާ ކުރުނބަލަށެވެ. ވަރަށް ކުދިކޮށް އަދި ޅަކޮށް ހުންނަ މެލޭޝިޔާ ކުރުނބާ މާރުކޭޓުގެ ގޮޅިތަކުގައި 25ރ. އަދި 30ރ. އަށް ވެސް ވިއްކައެވެ. ރަށްރަށުން ގެންނަ މެލޭޝިޔާ ކުރުނބާ ދޯނިން ނުބާލަނީސް ގަންނަ ނަމަ، 10ރ. އާއި 15ރ. އަށްވެސް ލިބެެވެ.

ރޯދަމަހުގެ ފުތަރަމަ ދިހައިގެ ދުވަސްތަކެކޭ އެއްގޮތަށް މާރުކޭޓުގެ ގޮނޅިތައް މިއަދުވެސް ވަރަށް ތިޔާގިއެވެ.