މިދިޔަ އަހަރުގެ ފެބުރުއަރީ މަހާ އަޅާބަލާއިރު މިދިޔަ ފެބުރުއަރީ މަހު މީރާއަށް ލިބުނު އާމްދަނީ 5.4 އިންސައްތަ އިތުރުވެފައިވާ ކަމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ ތަފާސްހިސާބުތަކުން ދައްކައިފިއެވެ.

ދައުލަތުގެ ޓެކްސް އިދާރާ މީރާއިން އާންމުކުރި މިދިޔަ މަހުގެ ތަފާސް ހިސާބުތަކުން ދައްކާ ގޮތުގައި  ޖުމްލަ އާމްދަނީގެ ގޮތިގައި 2.4 ބިލިއަން ރުފިޔާ މިދިޔަ މަހު މީރާއަށް ބަލައިގެންފައިވެއެވެ. މިދިޔަ އަހަރުގެ ފެބުރުއަރީ މަހު ބަލައިގެންފައި ވަނީ 2.3 ބިލިއަން ރުފިޔާއެވެ. 

މިދިޔަ މަހު މީރާ މެދުވެރިކޮށް ދައުލަތަށް ލިބުނު އާމްދަނީ އެންމެ ބޮޑަށް އިތުރުވެފައިވަނީ ރިސޯޓްތަކުގެ ކުލީގެ މުއްދަތު އިތުރުކޮށްދީގެން 307.2 މިލިއަން ރުފިޔާ، ފީގެ ގޮތުގައި ދައުލަތަށް ލިބުމާ ގުޅިގެންނެވެ. މި ފީ ބަލައިގަންނަނީ އެމެރިކާ ޑޮލަރުން ކަމަށް ވުމާއިއެކު، މިދިޔަ މަހު ރިސޯޓްތަކުގެ ކުލީގެ މުއްދަތު އިތުރުކޮށްދީގެން އިތުރުވެފައިވަނީ 20 މިލިއަން ޑޮލަރުގެ އާމްދަނީއެކެވެ.

މީރާގެ ތަފާސް ހިސާބުތަކުން ދައްކާގޮތުގައި ބޭރު ފައިސާއިން 118 މިލިއަން ޑޮލަރުގެ އާމްދަނީއެއް މިދިޔަ މަހު ލިބިފައިވެއެވެ. އޭގެ ތެރޭގައި ޓީޖީއެސްޓީގެ ގޮތުގައި ލިބުނު 59.9 މިލިއަން ޑޮލަރާއި އިންކަމް ޓެކްސްގެ ގޮތުގައި ލިބުނު 11.6 މިލިއަން ޑޮލަރާއި ގްރީން ޓެކްސްގެ ގޮތުގައި ލިބުނު 9.7 މިލިއަން ޑޮލަރު ހިމެނެ އެވެ. އޭގެ އިތުރުން ޑިޕާޗާ ޓެކްސްގެ ގޮތުގައި 6.7 މިލިއަން ޑޮލަރު އަދި އެއާޕޯޓް ޑިވެލޮޕްމަންޓް ފީގެ ގޮތުގައި 6.4 މިލިއަން ޑޮލަރު ބޭރު ފައިސާ އިން މީރާއަށް މިދިޔަ މަހު ލިބިފައިވެއެވެ. 

ތަފާސް ހިސާބުތަކުން ދައްކާ ގޮތުގައި ޓެކްސްގެ ގޮތުގައި ލިބުނު އާމްދަނީ މިދިޔަ އަހަރުގެ ފެބުރުއަރީ މަހާ އަޅާބަލާއިރު މިދިޔަ މަހު ވަނީ ދަށްވެފައެވެ. މިދިޔަ އަހަރުގެ ފެބުރުއަރީ މަހު ޓެކްސްގެ ގޮތުގައި ލިބުނު އާމްދަނީ ދެ ބިލިއަން ރުފިޔާއަށްވުރެ އިތުރުވި ނަމަވެސް މިދިޔަ މަހު ލިބިފައިވަނީ 1.9 ބިލިއަން ރުފިޔާ އެވެ. ޓެކްސްގެ ގޮތުގައި ނުހިމެނޭ އާމްދަނީ މިދިޔަ އަހަރުގެ ފެބްރުއަރީ މަހާ އާޅާބަލާއިރު، ދެ ގުނައަށްވުރެ ބޮޑުތަނުން ވަނީ އިތުރުވެފައެވެ. ޓެކްސްގެ ތެރޭގައި ނުހިމެނޭ އާމްދަނީގެ ގޮތުގައި 582 މިލިއަން ރުފިޔާ މިދިޔަ މަހު ލިބިފައިވެއެވެ.