ލިވަޕޫލުން މިހާރުގެ ކިޓް ޕާޓްނަރު ނައިކީ ދޫކޮށް، 13 އަހަރުގެ މެދުކެނޑުމަކަށްފަހު، އަންނަ ސީޒަނުން ފެށިގެން އެޑިޑާސް ހިޔާރުކޮށްފިއެވެ.

މިއީ ލިވަޕޫލްގެ ކިޓް ޕާޓްނަރެއްގެ ގޮތުގައި އެޑިޑާސް އާއެކު މަސައްކަތްކުރާ ތިންވަނަ ފަހަރެެވެ. މީގެކުރީން، އެ ކުލަބުން ވަނީ 1985 އިން 1996 އާ ދެމެދު އަދި 2006 އިން 2012 އަށް އެޑިޑާސް އާއެކު މަސައްކަތްކޮށްފައެވެ. 

އިނގިރޭސި ނޫސްތަކުން ރިޕޯޓްކުރާގޮތުން، އެޑިޑާސް އާއެކު ލިވަޕޫލުން ހަދާފައިވަނީ ފަސް އަހަރު ދުވަހުގެ އެއްބަސްވުމެއް ކަމަށާއި، އެ ޑީލުގެ އަގު މުޅިއެކު ގާތްގަނޑަކަށް 60 މިލިއަން ޕައުންޑް (77.36 މިލިއަން އެމެރިކާ ޑޮލަރު) އަރާނެ ކަމަށެވެ.

އެޑިޑާސް އާއެކު ކިޓް އެއްބަސްވުމެއްގައި ލިވަޕޫލުން ސޮއިކުރުމަށްފަހު އެ ކުލަބުގެ ޗީފް އެގްޒެކެޓިވް ބިލީ ހޯގަން ބުނީ، އެޑިޑާސް އެނބުރި ލިވަޕޫލާ ގުޅުމުން އުފާކޮށް، އެކަމުގެ މަރުހަބާ އެންމެން ކިޔާ ކަމަށެވެ.

މީގެކުރީން، އެޑިޑާސް އާއެކު މަސައްކަތްކުރިއިރު ގިނަ ކާމިޔާބީތަކެއް ހޯދާފައިވާ ކަމަށާއި، ވަރަށް ފުރިހަމަ ކިޓްތަކެއް ފަރުމާ ކޮށްފައިވާކަން ފާހަގަކުރާ ކަމަށް ވެސް ހޯގަން ބުންޏެވެ. އަދި، ކުރިއަށް އޮތް ތާނގާއި، އެޑިޑާސްގެ އެހީތެރިކަމާއެކު ފާހަގަކޮށްލެވޭ އިތުރު ކިޓްތަކެއް ފަރުމާކުރާނެ ކަމުގެ އުއްމީދު އެބައޮތް ކަމަށް ވެސް ހޯގަން ބުނެފައިވެއެވެ.