ޗެމްޕިއަންސް ޓްރޮފީގެ ފައިނަލުގައި މިރޭ ހަތަރު ވިކެޓުން ނިއު ޒީލަންޑް ބަލިކޮށް، އިންޑިއާ އިން ޗެމްޕިއަންކަން ހޯދައިފިއެވެ.

މިއީ އިންޑިއާ އިން ޖެހިޖެހިގެން ކާމިޔާބުކުރި އައިސީސީގެ ދެވަނަ މުބާރާތެވެ. އެ ޓީމުން ވަނީ މިދިޔަ އަހަރުގެ އައިސީސީ ޓީ20 ކްރިކެޓް ވޯލްޑް ކަޕް ވެސް ކާމިޔާބުކޮށްފައެވެ. އަދި މިއީ އެ ޓީމުން ޗެމްޕިއަންސް ޓްރޮފީ ކާމިޔާބުކުރި ތިންވަނަ ފަހަރެވެ. މީގެކުރިން، އިންޑިއާ އިން ވަނީ 2002 އާއި 2013 ވަނަ އަހަރުގެ މުބާރާތް ކާމިޔާބުކޮށްފައެވެ.

ދުބާއީ އިންޓަރނޭޝަނަލް ސްޓޭޑިއަމްގައި ކުޅުނު މެޗުގެ ޓޮސް ދިމާވުމުން ނިއު ޒީލަންޑުން ކުޅެން އަރައި، 50 އޯވަރުގެ ތެރޭގައި ހަތް ވިކެޓަށް 251 ލަނޑު ހެދިއެވެ.

ނިއު ޒީލަންޑުން އެންމެ ރަނގަޅަށް ކުޅުނީ ޑަރީލް މިޗޭލް އާއި މައިކަލް ބްރޭސްވެލް އެވެ. އޭނާ ވަނީ 40 ބޯޅައިން 53 ލަނޑު ހަދައިފައެވެ. ޑަރީލް މިޗޭލް ނުބައިވީ 63 ލަނޑަށެވެ.

މި އިނިންގްސްގައި އިންޑިއާގެ ވަރުން ޗަކްރަވާތީ އާއި ކުލްދީޕް ޔާދަވް ކުރެން ކޮންމެ ކުޅުންތެރިއަކު ދެ ވިކެޓް ނެގިއެވެ.

ރައްދުގައި އިންޑިއާ އިން ކުޅެން އަރައި، ބާކީ ހަ ބޯޅަ އޮއްވާ، މޮޅުވެގެން ފޭބީ ހަ ވިކެޓަށް 254 ލަނޑު ހަދައިގެންނެވެ. އިންޑިއާ އިން އެންމެ ރަނގަޅަށް ކުޅުނީ ކެޕްޓަން، ރޯހިތު ޝަރްމާ އެވެ. ރޯހިތު ވަނީ 76 ލަނޑު ހަދައިފައެވެ. މީގެއިތުރުން، ނުބައިނުވެ 33 ބޯޅައިން 34 ލަނޑުހެދި ކޭއެލް ރާހުލްގެ ކުޅުން ފާހަގަކޮށްލެވުނެވެ.

މި މެޗުގެ މޮޅު ކުޅުންތެރިއަކަށް ހޮވުނީ އިންޑިއާގެ ކެޕްޓަން، ރޯހިތު ޝަރްމާ އެވެ.