ޔުއެފާ ޗެމްޕިއަންސް ލީގުގައި އަންނަ ބުދަ ދުވަހު ބަޔާން މިއުނިކާ ދެކޮޅަށް ކުޅެން އޮތް މެޗުގެ ކުރީން ބަޔާ ލެވަކޫސަންގެ ތިން ކުޅުންތެރިއަކަށް އަނިޔާވެއްޖެއެވެ.

މި ހަފްތާ ބަންދުގައި ލެވަކޫސަންގެ ދަނޑުގައި 2-0 އިން ވާޑާ ބްރޭމަން އަތުން ބަލިވި މެޗުގައި އެ ޓީމުގެ ކުޅުންތެރިން ކަމަށްވާ، ފްލޮރިއަން ވާޓްޒް، ގްރޭނިޓް ޒާކާ އަދި އެޑްމޮންޑް ޓެޕްސޯބާ އަށް އަނިޔާވެގެން ވަނީ ބަދަލުކޮށްފައެވެ.

މީގެތެރެއިން، އެ ޓީމުގެ ޖަރުމަން މިޑްފީލްޑަރު، ވާޓްޒްގެ ފަޔަށް ލިބިފައިވަނީ ސީރިއަސް އަނިޔާއަކަށް ވެދާނެ ކަމަށް ލެވަކޫސަނުން ކަންބޮޑުވެއެވެ.

މެޗަށްފަހު ވާހަކަދައްކަމުން ލެވަކޫސަންގެ ކޯޗު، ޒާބީ އެލޮންސޯ ވަނީ، ރޭގެ މެޗު ނިމުމުގެ ކުރިން ވާޓްޒް އަށް ލިބިފައިވާ އަނިޔާގެ ސަބަބުން ހޮސްޕިޓަލަށް ގޮސްފައިވާ ކަމަށެވެ.

އަދި، އެ ޓީމުގެ މެދުތެރޭގެ މުހިއްމު ކުޅުންތެރިއެއް ކަމަށްވާ، ޒާކާގެ އިތުރުން ޑިފެންސްގައި ކުޅެމުން އަންނަ ޓެޕްސޯބާ ފުރަތަމަ ހާފަށް ފަހު ބަދަލުކުރީ އެ ދެ ކުޅުންތެރިންނަށް ވެސް ކުޅުން އިތުރަށް ކުރިއަށްގެންދެވޭ ގޮތް ނުވުމުން ކަމަށް އެލޮންސޯ ވަނީ ބުނެފައެވެ.

"އެ ކުޅުންތެރިންގެ އަނިޔާއާ ގުޅޭގޮތުން މިހާތަނަށް މާބޮޑު ތަފްޞީލެއް ނޭނގޭ،" އެލޮންސޯ ބުންޏެވެ.

ބަޔާންއާ ދެކޮޅަށް ލެވަކޫސަން ކުޅުމަށް ހަމަޖެހިފައިވާ ދެވަނަ ލެގުގެ މެޗަށް ނުކުންނައިރު، ފުރަތަމަ ލެގުގައި މިއުނިކުގައި 3-0 އިން ބަލިވެފައިވުމުން އެ ޓީމަށް ކުއާޓާ ފައިނަލަށް ދަތުރުކުރުމަށްޓަކައި ކުރަންޖެހިފައިވަނީ އުނދަގޫ މަސައްކަތެކެވެ.