ENGLISH

04 އޭޕްރީލު 2025

Advertisement

އިންޑިއަން ވެލްސް މުބާރާތުގައި ޖޮކޮވިޗް ބަލިވެއްޖެ

09 މާރިޗު 2025

|

މުޙައްމަދު އަދުހަމް

އިންޑިއަން ވެލްސް އޯޕަންގައި ޖޮކޮވިޗް ކުޅެނީ. --ފޮޓޯ: ރޮއިޓާސް

މިހާރު ކުރިއަށްދާ އިންޑިއަން ވެލްސް އޯޕަން ޓެނިސް މުބާރާތުގެ ދެވަނަ ބުރުގައި ނެދަލެންޑްސްގެ ބޮޓިޗް ވެން ޑެ ޒެންޑްޝުލްޕް އަތުން ކުރީގެ އެއްވަނަ ޓެނިސް ކުޅުންތެރިޔާ، ސާބިއާގެ ނޮވަކް ޖޮކޮވިޗް ބަލިވެއްޖެއެވެ.

މިއީ އެންމެ ފަހުގެ އޮސްޓްރޭލިއަން އޯޕަންގެ ކުއާޓާ ފައިނަލުގައި ސްޕެއިނުގެ ކާލޯސް އަލްކަރާޒް އަތުން މޮޅުވިފަހުން، ކުޅުނު ތިން މެޗުގެ ތެރެއިން ޖޮކޮވިޗް ބަލިވި ތިންވަނަ ފަހަރެވެ. އޭގެފަހުން، އެ މުބާރާތުގެ ސެމީގައި އަލެގްޒެންޑާ ޒްވެރޭވް އަތުން ބަލިވިއިރު، ދޯހާ މުބާރާތުގައި މަޓެއޯ ބެރެޓިނީ އަތުން ވެސް ވަނީ ބަލިވެފައެވެ.

އެމެރިކާގެ ކެލިފޯނިއާގައި ހުންނަ އިންޑިއަން ވެލްސް ޓެނިސް ގާޑެންގައި ކުޅުނު މެޗުގެ ސެޓުތައް ވެން ޑެ ޒެންޑްޝުލްޕް ގެންދިޔައީ، 6-2، 3-6، އާއި 6-1 އިންނެވެ.

މެޗަށްފަހު ވާހަކަދައްކަމުން ޖޮކޮވިޗް ބުނީ، މިދިޔަ އަހަރުތަކުގައި ވަރަށް ގިނަ ކަންތައްތަކެއް ބަދަލުވަމުންދާ ކަމަށާއި، ފަހަކަށްއައިސް އެންމެ ބޭނުންވާ ފެންވަރުގައި އޭނާ އަށް ކުޅެވެމުންނުދާ ކަމަށެވެ.

މިހާތަނަށް 24 ގްރޭންޑް ސްލޭމް ޓެނިސް މުބާރާތުގެ ޗެމްޕިއަންކަން ހޯދައި، ރެކޯޑެއް ގާއިމުކޮށްފައިވާ ޖޮކޮވިޗަށް މިދިޔަ އަހަރު ކާމިޔާބުކުރެވުނީ އެންމެ މުބާރާތެކެވެ. އެއީ، މިދިޔަ އަހަރުގެ އޮލިމްޕިކްސްގައި ޓެނިހުގެ ގޯލްޑް މެޑެލް އެކަންޏެވެ. މިއީ، 2017 ވަނަ އަހަރުން ފެށިގެން މިހާތަނަށްއައިއިރު ބޮޑު ޓެނިސް މުބާރާތެއް ކާމިޔާބުނުކުރެވި ޖޮކޮވިޗަށް ނިންމާލަން ޖެހުނު ފުރަތަމަ ފަހަރެވެ.

ކިޔުންތެރިންގެ ހިޔާލު