ފާގައަކީ ރާއްޖޭގައި އާންމުކޮށް ހެދޭ އޭގައި އެތަކެއް އަޖާބުކުރުވަނިވި ފައިދާތަކެއް އެކުލެވޭ ތަރުކާރީގެ ބާވަތެކެވެ.

ރާއްޖޭގެ ގިނަ މީހުން ޤަބޫލުކުރާ ގޮތުގައި ފާގައަކީ ރުޅިގަދަ މީހުންނަށް ހާއްސަ ތަރުކާރީއެކެވެ. މަޒާޖެއްގެ ގޮތުގައި ރުޅިގަދަ މީހުންނާ ދިމާލަށް ފާގަ ކާށޭ ބުނެ އުޅެއެވެ. އެހެންނަމަވެސް މިއީ ހަމައެކަނި ރުޅިގަދަ މީހުންނަށް ހާއްސަ ތަރުކާރީއެކޭ ބުނެވޭކަށް ނެތެވެ.

ފާގައިގައި އެކުލެވޭ ސިއްޙަތަށް ފައިދާހުރި މާއްދާތަކުގެ ލިސްޓް ވަރަށް ދިގެވެ. އޭގެތެރޭގައި ކާބްސް، ފައިބަ، ވިޓަމިން ސީ، ވިޓަމިން އޭ، ފޮލޭޓް، ޕޮޓޭސިއަމް، ޒިންކް އަދި އަޔަން ހިމެނެއެވެ.

މި ތަރުކާރީއަކީ ގިނަ އަދަދަކަށް ވިޓަމިން ސީ ހިމެނޭ ތަރުކާރީ އެއްކަމުން ބަލިތަކުން ރައްކާތެރިވުމަށާއި ހަށިގަނޑަށް ލިބޭ ކުދި ކުދި ޒަޙަމްތައް އަވަހަށް ރަނގަޅު ކުރުމަށް މި ތަރުކާރީ އަކީ ހަމަ އެއްވަނައެވެ. އަދި މިއީ ހަކުރު ބަލި ހުންނަ މީހުންނަށް ހާއްސަ ތަރުކާރީއެކެވެ. ދިރާސާތަކުން ދައްކާގޮތުގައި ލޭގައި ހަކުރު އެކުލެވޭ މިންވަރު ދަށްކޮށްދިނުމަށް ފާގައިގައި ހިމެނޭ މާއްދާތައް އެހީތެރިވެދެއެވެ.

އާއްމުކޮށްޖެހޭ އަރިދަފުސް ރޯގާއިން ދުރުކޮށްދިނުމަށް އެހީތެރިވެދިނުމުގެ އިތުރުން ކެންސަރުގެ ބަލިތަކުންވެސް މިއީ އަޅުގަނޑުމެން ދުރުކޮށްދިނުމަށް އެހީތެރިވެދޭ ތަރުކާރީއެކެވެ.

އޭގައި ހުންނަ ހިތި ރަހަ ފިލުވާލަން އުނދަގޫވުމުގެ ސަބަބުން، މިއީ ފަސޭހައިން އަޅުގަނޑުމެންނަށް ލިބެން ހުންނަ ތަރުކާރީއެއް ނަމަވެސް، އަޅުގަނޑުމެންނަށް ބޭނުން ކުރެވޭލެއް ވަރަށް މަދެވެ.

ފާގައިގައި ހުންނަ ހިތި ރަހަ ކަނޑުވާލުމަށް ފާގަ ފޮތިކޮށް ކޮށާލުމަށްފަހު 30 މިނެޓް ވަންދެން ލޮނާ އެއްކޮށްލުމަށްފަހު ބެހެއްޓިދާނެއެވެ. އެއަށްފަހު އޭގެ ދިޔަތައް ފެލާލުމަށްފަހު ކައްކަން ބޭނުންކުރެވިދާނެއެވެ.

މި ތަރުކާރީ މާގިނައިން ބޭނުން ކުރާނަމަ ސައިޑް އެފެކްޓެއްގެ ގޮތުގައި ބޭރަށް ހިންގުން ޖެހުމުގެ ފުރުސަތު ބޮޑެވެ. އެހެންކަމުން ޞިއްޚީ އެއްވެސް ބައްޔެއް ހުންނަ ނަމަ ނުވަތަ އެ ބައްޔަކަށް ބޭސް ކުރާ ނަމަ ފާގަ ކާންވާނީ ޑޮކްޓަރުންގެ ލަފައާގެ މަތިންނެވެ.