ސްޕެނިޝް ލީގުގެ އެހެން ކުލަބަކަށް ކޯޗުކޮށްދީފާނެކަމަށް ބާސެލޯނާގެ ކުރީގެ ކޯޗު، ޒާވީ ހެނާންޑޭޒް ބުނެފިއެވެ.

ޒާވީ ވަނީ ކުޅުންތެރިއެއްގެ ގޮތުގައި ބާސެލޯނާގައި ހޭދަކުރީ 17 އަހަރު ދުވަހުގެ ތެރޭގައި 25 ޓްރޮފީ ކާމިޔާބުކޮށްފައެވެ. އެއަށްފަހު، އޭނާ ވަނީ 2015 ވަނަ އަހަރު ގަތަރުގެ އަލް ސާދު އަށް ބަދަލުވެފައެވެ. އެ ކުލަބަށް ހަތަރު އަހަރު ކުޅުމަށްފަހު، ފަހުން ވަނީ އެ ޓީމުގައި ކޯޗެއްގެ ގޮތުގައި މަސައްކަތްކޮށްފައެވެ.

އޭގެފަހުން، ޒާވީ ވަނީ، 2021 ވަނަ އަހަރު އެނބުރި ބާސެލޯނާ އަށް ބަދަލުވެފައެވެ. އެ ޓީމާއެކު ޖެހިގެންއައި ސީޒަނުގެ ލީގު ކާމިޔާބުކުރުމަށްފަހު ޒާވީ ވަނީ މަގާމުން ވަކިވެފައެވެ.

ފްރާންސް ފުޓްބޯލް އަށް ދިން އިންޓަވިއުއެއްގައި ޒާވީ ވަނީ، ވަރަށް އަވަހަށް އެނބުރި ކޯޗިންގެ ތެރެއަށް އަންނަން ގަސްދުކުރާ ކަމަށް ބުނެފައެވެ.

"އަހަރެންގެ މުސްތަގުބަލުގައި ވަކި ކަމެއް ކަނޑައެޅިފައެއް ނެތް،" ޒާވީ ބުންޏެވެ.

ޒާވީގެ ވާހަކައިގައި ވަނީ، ލަލީގާގެ އިތުރު ކުލަބަކަށް ކޯޗުކޮށްނުދޭންވީ ސަބަބެއް ނެތް ކަމަށް ބުނެފައެވެ. ކޮންމެ ޓީމަކުން ހުށަހެޅުމެއް އައިނަމަވެސް، އެ ކަމާ މެދު ވިސްނާނެ ކަމަށް ޒާވީ ބުންޏެވެ.

"އަހަރެން މިދަނީ ރަނގަޅު ޕްރޮޖެކްޓެއް ހޯދަމުން. އަދި އެ ޓީމާއެކު މުބާރާތެއް ކާމިޔާބުކުރުމުގެ އަޒުމުގައި މި ހުރީ،" ޒާވީ ބުންޏެވެ.

ޒާވީގެ ވާހަކަ ނިންމާލަމުން ބުނީ، ރީތި ފުޓްބޯޅަ ކުޅޭ ޓީމަކަށް ބަދަލުވުމަށް ޝައުގުވެރިވާކަމަށާއި، ޚާއްސަކޮށް އެ ޓީމަކާއެކު ބޮޑެތި މުބާރާތްތައް ކާމިޔާބުކުރަން ބޭނުންވާ ކަމަށެވެ.