ދުނިޔޭގެ އެންމެ ބޮޑު އެއް ޓޫރިޒަމް ފެއާރ، އައިޓީބީ ބާލިން 2025 ކާމިޔާބު ކަމަށާއި މި ފެއާރގެ ސަބަބުން ޖަރުމަނާއި ޖަރުމަނާ ކައިރި ސަރަހައްދުތަކުން ފަތުރުވެރިން ގެނައުމަށް އިތުރަށް ފަސޭހަތަކެއް ލިބިގެންދާނެ ކަމަށް ޓޫރިޒަމް މިނިސްޓަރު ތޯރިގު އިބްރާހިމް ވިދާޅުވެއްޖެއެވެ. 

މި ފެއާރ ނިމުމާ ގުޅިގެން މިނިސްޓަރު ތޯރިގު ދެއްވި އިންޓަވިއުއެއްގައި ވިދާޅުވީ މި ފެއާ މުހިއްމުވާ ސަބަބަކީ މިއީ ޖަރުމަނާއި އެ ގައުމާ ކައިރި ހިސާބުތަކުން އެންމެ ގިނައިން މީހުން ޒިޔާރަތްކުރާ ފެއާރ ކަމަށްވާތީ ކަމަށެވެ. 

މި ފެއާރގައި ރާއްޖޭގެ ފަތުރުވެރިކަމުގެ ސިނާޔަތުގެ 89 ކުންފުންޏެއް ތަމްސީލުކުރާ 200 މަންދޫބުންގެ ވަފުދެއް ބައިވެރިވެފައިވެއެވެ. 

މި ފެއާރގެ ސަބަބުން ރާއްޖޭގެ ފަތުރުވެރިކަން އިޝްތިހާރުކޮށް، އާ މާކެޓް ކަނެކްޝަންތަކެއް ގާއިމުކުރުމާއި، ޖަރުމަނު ބަހުން ވާހަކަ ދައްކާ މާކެޓްތަކާ ގުޅުން ބަދަހިކުރެވޭނެ ޕްލެޓްފޯމެއް ލިބިގެންދާނެއެވެ. ދުނިޔޭގެ އެކި ކަންކޮޅުތަކުގައި ތިބި ފަތުރުވެރިކަމުގެ ދާއިރާގެ ސްޓޭކްހޯލްޑަރުންނާ އެކު ނެޓްވޯޯކިން އާއި ވިޔަފާރީގެ ގުޅުން ބަދަހިކޮށް، ބީ2ސީ އޯޑިއެެންސްއަށް ރާއްޖޭގެ ފަތުވެރިކަން އިޝްތިހާރުކުރެވުމުގެ ފުރުސަތު ހުޅުވިގެންދާނެއެވެ. 

ރަސްމީ ތަފާސް ހިސާބުތައް ދައްކާ ގޮތުން ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ ފަސް ގައުމުގެ ތެރޭގައި ޖަރުމަނު ހިމެނޭއިރު، 2024 ވަނަ އަހަރު އެކަނިވެސް 150،000 އަށް ވުރެ ގިނަ ފަތުރުވެރިން އެގައުމުން ރާއްޖެ އައިސްފައިވެ އެވެ.

އެމްއެމްޕީއާރުސީގެ މާކެޓިން ސްޓްރެޓެޖީގެ ތެރޭގައި ޖަރުމަނު ބަހުން ވާހަކަ ދައްކާ އޯޑިއަންސަށް ޚާއްސަކޮށްގެން ހިންގާ ޕްރޮމޯޝަނަލް ކެމްޕެއިންތަކުގެ އިތުރުން ޖަރުމަނާއި ސްވިޒަލޭންޑް އަދި އޮސްޓްރިއާގެ މާކެޓަށް ވާސިލުވުމަށް، ޕްރިމިއަމް ޓްރެވަލް ބްރޭންޑްތަކާ ގުޅިގެން ކުރިއަށް ގެންދާ ޕްރޮމޯޝަން ކެމްޕެއިންތައް ހިމެނެއެވެ.