ނ.ހެނބަދޫގެ އިރުށް ދަތުރުކޮށްލާއިރު، ރަށުގެ މަލަމަތި ޗާލު، ފެހިކަން ވަކީން ގަދަ ރަށެއް ލޮލުގަ އަޅައިގަނެއެވެ. ރަށުގެ ވަށައިގެންވާ ދިވެހި ރުއްތަކާ، ކުޅިތަކުގެ ވަށައިގެން ހެދިފައިވާ އެކި ބާވަތްތަކުގެ ގަސްތައް ލޮލުގަ އަޅައިގަންނަ އިރު، ފެލިކުލައިގެ އަލިމަސްތަކެކޭ ތަފާތެއް ނެތެވެ. ރަށުގައި އުޅޭ ބައެއް ބާވާތްތަކުގެ ދޫނިތަކާއި، ރަށުގައި ހެދިފައިހުރި އެކި ބާވަތުގެ ކުޅިތަކުގައި އުޅޭ ފެނުގެ ގިނަ ދިރުންތަކަކީ ރާއްޖޭގެ އެހެން އެއްވެސް ރަށަކުން ފެންނާނެ ދިރުންތަކެއް ނޫނެވެ. ނ.ކެނދިކުޅުދޫ އަކީ ކޯރާއި ކުޅިތަކުގެ ދިރުމުން ހިތްގައިމުކަން ލިބިފައިވާ ތަފާތު ރަށެވެ.

ރަށުގެ ލާސާނީ ގުދުރަތީ ރީތިކަމުގެ ބޭނުން ހިފާ، "ދަ މެންގްރޫވް އައިލެންޑް" ގެ ނަމުގައި ރަށުގެ ފަތުރުވެރިކަން ކުރިއެރުވުމަށް އެތަކެއް މަސައްކަތެއް ރަށު ކައުންސިލުން ކުރަމުން އެބަދެއެވެ. އެގޮތުން، މިހާރު ކުރިއަށްދާ އަޓީބީ ބަރލިން ފެއަރގައި ރާއްޖެއިން ބައިވެރިވާ 200 ވަރަކަށް ގުރޫޕުގެ ތެރޭގައި ކެނދިކުޅުދޫގެ ވަފުދުވެސް ހިމެނެއެވެ. 

ރާއްޖޭގެ ބައެއް ރަށްތަކަށް ލިބިފައިވާ ގުދުރިތީ ރީތިކަމަށް އެ ރަށްރަށުގެ އަހުލުވެރީން އިހުމާލު ވެފައިވީނަމަވެސް ކެނދިކުޅުދޫގެ ރައްޔިތުންގެ ފަރާތުން ފެނިގެންދަނީ މުޅިން އެހެން މަންޒަރެކެވެ. ރަށުގެ ރީތިކަން ހިމާޔަތްކޮށް، އިތުރަށް ރަށް ޕްރޮމޯޓުކުރަން ކުރަން ކުރަމުންދާ މަސައްކަތްތަކަކީ ލާމަސީލު މަސައްކަތްތަކެކެވެ. މިމަސައްކަތްކަށް ތައުރީފުކުރައްވާ، ރައީސުލްޖުމްހޫރިއްޔާ، ޑރ.މުޙައްމަދު މުޢިއްޒު ވަނީ ރަށު ކައުންސިލާއި ބައްދަލުކުރައްވާ، އެރަށުގައި ތިމާވެއްޓައި ރައްޓެހި ފަތުރުވެރިކަމަށް ކުރެވޭ ހުރިހާ މަސައްކަތެއްގައި އެމަނިކުފާނުގެ ފުރިހަމަ އެއްބާރުލުން ދެއްވާނެކަމަށް ވައުދުވެވަޑައިގެންފައެވެ. އަދި އެރަށުގައި ފަތުރުވެރިކަން އިތުރަށް އިސްތިހާރުވާނެފަދަ ކުމެވިތައް ގާއިމުކުރުމުގެ ފުރުސަތު ފަހިކޮށްދިނުމުގެ މުހިންމުކަމުގެ މައްޗަށް އެމަނިކުފާނު ބާރުއަޅުއްވާފައިވެއެވެ. މިކަމަކީ ރަށަށް ޒިޔާރަތްކުރާ ފަތުރުވެރިންނަށް އިތުރު ތަޖުރިބާތަކެއް ކުރެވުމުގެ އިތުރަށް، ރަށުގެ އިގުތިސާދު ކުރިއެރުމަށް ހުޅުވިގެންދާނެ އިތުރު ދޮރެއްކަމަށް އެމަނިކުފާނު ވިދާޅުވިއެވެ.

އަޓީބީ ބަރލިން ފެއަރގައި ދައުލަތުގެ މީޑިއާ އާއި ވާހަކަދައްކަވަމުން ކެނދިކުޅުދޫ ކައުންސިލް މެމްބަރު ޙަސަން މުޙައްމަދު ވިދާޅުވީ މިހާރު ރަށުގެ ގޭގޭގައި ފަތުރުވެރިން ތިބުމުގެ ހުއްދަ ދެއްވާފައިވާ ކަމަށާއި، 70 އެނދުގެ ލަގްޒަރީ ގެސްޓް ހައުސްއެެއްގެ އިތުރުން 70 އެނދުގެ ސިޓީ ހޮޓަލެއްގެ މަސައްކަތް ބާރު ދުވެލީގައި ކުރިއަށްދާ ކަމަށެވެ. އަދި މި ހޮޓަލުގެ އެއްބައި މިއަހަރުގެ ތެރޭގައި ހުޅުވޭނެ ކަމަށް ޙަސަން ލަފާކުރެއްވިއެވެ.

ޙަސަން އިތުރަށް ވިދާޅުވީ ރަށުގައި ލޯކަލް ޓޫރިޒަމް ފުޅާކުރުމުން މިވަގުތު ރަށާއި ދުރު ރިސޯޓުތަކުގައި މަސައްކަތްކުރަމުން އަންނަ ޒުވާނުން އަލުން ރަށަށް އައިސް، ރަށުގައި މަސައްކަތްކުރުމުގެ ފުރުސަތު ތަނަވަސްވެގެންދާނެ ކަމަށެވެ. އަދި ރަށުގައި ތަރައްގީކުރަމުން އަންނަ ގެސްޓުހައުސްތަކާއި ސިޓީ ހޮޓަލުން ވަޒީފާ ދިނުމުގައި ރަށުގެ ރައްޔިތުންނަށް، އަދި ވަކިން ހާއްސަކޮށް އަންހެނުންނަށް އިސްކަންދޭނެ ކަމަށެވެ.

ކެނދިކުޅުދޫއަކީ ރާއްޖޭގެ އެހެން ހިސާބަކުން ނުފެންނަފަދަ ދޫނިތަކާއި މަސްމަހާއި މެއްސާއި ގަސްގަހާއިގެހީގެ މުއްސަނދިކަމަށް މަޝްހޫރު، ޤުދުރަތީ ޗާލުކަމެއް ލިބިފައިވާ ރަށެކެވެ. އެރަށުގައިވާ 9 ފެންގަނޑަކީ ވެސް އެރަށަށް ޚާއްސަ ސިފައެކެވެ. މީގެތެރެއިން ތިން ފެންގަނޑުގެ ބޮޑުމިން ވަނީ 400 ފޫޓާއި 3،000 ފޫޓާއި ދެމެދުގައެވެ.

ކެނދިކުޅުދޫގެ ހިމާޔަތްކުރެވިފައިވާ އެކިވައްތަރުގެ ފެންގަނޑުތަކުގައި އެކިބާވަތްތަކުގެ ދޫނިތަކާއި އެހެނިހެން ދިރުންތައް ފެނެއެވެ. އަދި ފާހަގަކޮށްލެވޭ ގަސްތަކާއި ވެލާތައްވެސް މިތަންތަނުން ފެނެއެވެ. "ކެޓަލް އެގްރެޓް"، "ކޮމަން ސޭންޑް ޕައިޕަރ"، "ބްލެކް-ކްރައުންޑް ނައިޓް ހެރޮން" ފަދަ ދޫނިތައް މިތަންތަނުގައި ދިރިއުޅޭއިރު، "ބްލެކް-ނޭޕްޑް ޓަރން" އަދި "ވައިޓް ޓެއިލްޑް ޓްރޮޕިކް ބަރޑް" ފަދަ ދޫނިތައް ރަށަށް ޒިޔާރަތްކުރެއެވެ.

ކެނދިކުޅުދޫގައި ހުންނަ އެކި ބާވަތްތަކުގެ ކުޅިތައްވެސް ރަށުގެ ރީތިކަމަށް އިތުރު ފުރިހަމަކަމެއް ގެނެސްދެއެވެ. އެގޮތުން "ސްމޯލް-ލީވްޑް އޮރެންޖް މެންގްރޫވް"، "ރެޑް މެންގްރޫވް" އަދި "ޔެލޯ މެންގްރޫވް" ފާހަގަކޮށްލެވެއެވެ. ރާއްޖެއިން ނެތެމުންދާ ކުއްޅަވަށް މި ކުޅިތަކުން ލިބެއެވެ.

ރަށުގެ ކުޅިތަކާއި އެކި ވައްތަރުގެ ފެންގަނޑު ތަކުގައި އުޅޭ ދިރުންތަކާއި ހެދޭ ގަސްތަކަކީ އެތަންތަނުގެ މުހިންމު ބައެކެވެ. މިތަންތަން ހިމާޔަތްކުރުމަށް ކުރެވޭ މަސައްކަތްތަކަކީ ރަށުގެ ނާޒުކު ތިމާވެށި ހިމާޔަތްކުރުމަށް މުހިންމު މަސައްކަތްތަކެކެވެ. ރަށުގެ ގޮނޑުދޮއްތަކުގައި ވެލާ ބިސްއަޅާކަމީ، ރަށަށް ލިބިގެންދާ އިތުރު ފުރިހަމަކަމެކެވެ.