މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑްގެ މެނޭޖިން ޑިރެކްޓަރު އަދި ޗީފް އެގްޒެކްޓިވް އޮފިސަރު ކަމުގެ މަގާމަށް ބްރިގޭޑިއާ ޖެނެރަލް (ރޓ) ފަރުޙަތު ޝަޙީރު އައްޔަނު ކުރައްވައިފި އެވެ.

ޕީސީބީން މިރޭ ބުނީ މިފްކޯގެ ސީއީއޯގެ މަގާމަށް ފަރުޙަތު އައްޔަނު ކުރައްވާފައިވާ ކަމަށެވެ.

ފަރުޙަތުގެ ކުރީން އެ މަގާމުގައި ހުންނެވީ ސްވިޒާލޭންޑަށް ނިސްބަތްވާ ޑޮކްޓަރ ވިޓާލީ ލިއުބިމޮވް އެވެ. ވިޓާލީ އެ މަގާމުން ވަކިކުރެއްވީ މި މަހުގެ ތިންވަނަ ދުވަހު އެވެ.

ފަރުޙަތަކީ އައިޖީއެމްއެޗްގެ ސީއީއޯގެ މަގާމު ފުރުއްވާފައިވާ ބޭފުޅެކެވެ. ގައުމީ ދިފާޢީ ބާރުގައި ވެސް އިސް މަޤާމުތަކެއް ފުރުއްވާފައިވެ އެވެ.

ސަރުކާރުން ދަނީ މިފްކޯގެ ހިންގުން ހަރުދަނާކޮށް އެއީ ފައިދާގައި ހިންގާ އަދި މަސްވެރިކަމުގެ ދާއިރާއަށް އިންގިލާބީ ބޮޑު ބަދަލެއް ގެންނާނެ ކުންފުންޏަކަށް ހެދުމަށް މަސައްކަތް ކުރަމުންނެވެ. ޚާއްސަކޮށް މިފްކޯގެ ތެރޭގައި އެއްވެސް ބާވަތެއްގެ ކޮރަޕްޝަނަކަށް ޖާގަ ނުދެއްވުމުގެ ގޮތުން ގިނަ ފިޔަވަޅުތަކެއް އަޅާފައިވެ އެވެ.