ފަލަސްތީނުގެ ޣައްޒާއަށް ކޮންމެހެން ބޭނުންޖެހިފައިވާ އިންސާނީ އެހީ ވެއްދުމަށް ހުރަސްއެޅުމަކީ، ޣައްޒާގައި ޙަމަލާތައް ހުއްޓައިލުމަށް މިހާރު ޢަމަލުކުރަމުންދާ އެއްބަސްވުމާ ކަނޑައެޅިގެން ޚިލާފަށް އިޒްރޭލުން ކުރަމުންދާ ކަމެއް ކަމަށް، މިޞްރުން ބުނެފިއެވެ.

މިދިޔަ މަހުގެ 19 ވަނަ ދުވަހު ގިނަ ޤައުމުތަކެއް މެދުވެރިވެގެން ޙަމަލާތައް ހުއްޓައިލަން އެއްބަސްވީ، އިޒްރޭލުން ހުއްޓުމެއް ނެތި ލާއިންސާނީ ޢުދުވާނުތައްދީ، ފަލަސްތީނުގެ ބައި ލައްކައެއްހާ މީހުން ޝަހީދުކޮށްލައި، ޣައްޒާގެ ގިނަ ސަރަޙައްދުތައް ސުންނާފަތިކުރަން ފެށިތާ 15 މަސް ފަހުންނެވެ.

އެ އެއްބަސްވުން އެކުލަވައިލުމުގައި މެދެވެރިއެއްގެ އެންމެ އިސް ދަޢުރު އަދާކުރި ޤައުމުތަކުގެ ތެރޭގައި މިޞްރު ހިމެނެއެވެ.

އެއްބަސްވުމުގެ ފުރަތަމަ މަރުޙަލާގެ ދަށުން މިނިވަން ކުރާނެ ކަމަށް ބުނި ދިރިތިބި އަސީރުންނާއި ޤައިދީން ވަނީ މިނިވަންކޮށް ނިމި، އެއްބަސްވުމުގެ ދެވަނަ ފިޔަވަހި ފެށުމުގެ މަޝްވަރާތައް މިޞްރުގައި ފެށިނަމަވެސް، އެ މަޝްވަރާތަކުން މާބޮޑު ކުރިއެރުމެއް ނުލިބުނެވެ.

އެކަން އެހެން އޮއްވައި، އިޒްރޭލުން އިއްޔެ ވަނީ އެއްބަސްވުމުގެ ދެވަނަ ފިޔަވަހި ފެށުމުގެ ބައްދަލުވުމުގައި، ފުރަތަމަ ފިޔަވަހީގެ ދަށުން ޙަމަލާތައް ހުއްޓައިލުމުގެ އެއްބަސްވުން އިތުރުކުރަން ހުށަހަޅައިފައެވެ. މިގޮތުން، އިޒްރޭލުން ބޭނުންވީ ޢުދުވާން ހުއްޓާލުމުގެ އެއްބަސްވުމުގެ ފުރަތަމަ މަރުޙަލާ ކުރިން އެއްބަސްވެފައިވާ 42 ދުވަހަށް ވުރެ އިތުރުކޮށް، ރަމަޟާން މަސް ހިމެނޭހެން އިތުރު 42 ދުވަހަށް އެ މަރުޙަލާގެ މުއްދަތު އިތުރު ކުރާށެވެ.

ނަމަވެސް، އެކަމަށް އެއްބަސްނުވާނެކަމަށް ޙަމާސްއިން ވަނީ ބުނެފައެވެ. ޙަމާސްއިން ބޭނުންވަނީ، ދެވަނަ މަރުޙަލާ އަވަހަށް ފަށައި، ޣައްޒާގެ ޢުދުވާނުތައް ދާއިމީކޮށް ހުއްޓައިލުމުގެ އެއްބަސްވުމަކަށް ދިޔުމަށެވެ.

ޙަމާސްއިން ނޫނެކޭ ބުނުމާއެކު، އިޒްރޭލުން މިހާރު ވަނީ އެ ޖަމާޢަތަށް ބިރު ދައްކަން ފަށައިފައެވެ. މިގޮތުން، އެ ހުށަހެޅުމަށް އެއްބަސްކުރުވަން، ޣައްޒާއަށް އެހީ ވެއްދުމުގެ މަގުތައް ވަގުތީ ގޮތުން ބަންދުކޮށްފައިވާ ކަމަށް އިޒްރޭލުން ވަނީ އިޢުލާނުކޮށްފައެވެ.

އެކަމާ ގުޅިގެން މިޞްރުގެ ހާރިޖީ ވުޒާރާއިން ނެރުނު ބަޔާނެއްގައި ވަނީ އިޒްރޭލުގެ މި ޢަމަލަކީ ސުލްޙައިގެ އެއްބަސްވުމާ ކަނޑައެޅިގެން ޚިލާފު ޢަމަލެއްގެ ގޮތުގައި ސިފަކޮށްފަ އެކަން ހަރުކަށި އިބާރާތުން ކުށްވެރިކޮށްފައެވެ.

އަދި ފަލަސްތީނުގެ ނިކަމެތި ރައްޔިތުންނާ ދެކޮޅަށް، ހައިހޫނުކަން ހަތިޔާރެއްގެ ގޮތުގައި އިޒްރޭލުން ބޭނުންކުރަމުންދާކަމަށް ވެސް މިޞްރުން ބުންޏެވެ.