ޑޮނަލްޑް ޓްރަމްޕް އެމެރިކާގެ ރައީސްކަމަށް އިންތިޚާބުވެވަޑައިގަތުމާ އެކު، އިލޮން މަސްކް ވަނީ އޭނާގެ ސޯޝަލް މީޑިއާ ޕްލެޓްފޯމް "އެކްސް" އާ ސަރުކާރު ޕްރޮމޯޓް ކުރުމަށް ބޭނުންކުރަން ފަށައިފައެވެ.

އިންތިޚާބު ނިމުނު ދުވަހުން ފެށިގެން ހުކުރު ދުވަހާ ހަމައަށް މަސްކް ވަނީ 400 އަށްވުރެ ގިނަ ޕޯސްޓް ސިޔާސީ މައުޟޫއުތަކާ ގުޅޭގޮތުން ކުރައްވައިފައެވެ. މީގެ ތެރޭގައި ޓްރަމްޕްގެ ކާމިޔާބީ ފާހަގަކުރުމާއި، އޭނާގެ ރިޔާސަތުގައި އިސްކަންދޭންވީ ކަންކަމާ ބެހޭގޮތުން ވާހަކަދެއްކުން ހިމެނެއެވެ.

މަސްކްގެ ޕޯސްޓްތަކުގެ ތެރޭގައި އޭނާގެ ދަރިފުޅު އެކްސް އޭ އޭ-12 އާ އެކު ޓްރަމްޕް އަދި އޭނާގެ އާއިލާއާ އެކު މާ-އަ-ލާގޯގައި ނެގި ފޮޓޯއެއް ވެސް ހިމެނެއެވެ. މީގެ އިތުރުން އޭނާ ވަނީ ޓްރަމްޕާއެކު ނެގި އެހެން ފޮޓޯއެއްގައި "ނޯވަސް އޯޑޯ ސެކްލޯރަމް" މި ލެޓިން ޢިބާރާތް ބޭނުންކޮށްފައެވެ. މިއީ އެމެރިކާގެ ޑޮލަރު ނޫޓުގައި ޖަހާފައިވާ ޢިބާރާތެކެވެ.

އެކްސްގެ ސީއީއޯ ލިންޑާ ޔަކަރީނޯ ވެސް ވަނީ މިކަމުގައި ބައިވެރިވެވަޑައިގެންފައެވެ. ސިޔާސީ މަޝްވަރާތައް ކުރިއަށް ގެންދިއުމުގައި އެކްސްގެ ދައުރާ ގުޅޭގޮތުން ކުރެވުނު ޕޯސްޓަކަށް ޖަވާބު ދެއްވަމުން އޭނާ ވިދާޅުވީ "ޑިއުޓީއަށް ރިޕޯޓްކުރަން" މިހެންނެވެ.

މި ހުރިހާ ކަމަކުން ދައްކުވައިދެނީ މަސްކްގެ އެކްސް ޓްރަމްޕްގެ އާ ރިޔާސަތުގެ ފަހަތުގައި އޮތް ކަމެވެ. އިންތިޚާބުގެ ނަތީޖާ އިއުލާންކުރި ފަހުން، މަސްކް ވަނީ އެކްސް މެދުވެރިކޮށް އާ ރައީސްގެ ދަށުން ފެނިގެންދާނެ އުޖާލާ މުސްތަޤުބަލަކާ ބެހޭގޮތުން ވާހަކަ ދައްކަވައިފައެވެ. 

މަސްކް ވަނީ މިދިޔަ ޖުލައި މަހު ޓްރަމްޕަށް ތާއީދުކުރާކަން އިއުލާންކުރައްވައިފައެވެ. އަދި އޯގަސްޓް މަހު އެކްސްގައި ޓްރަމްޕާ އެކު އޯޑިއޯ މަޝްވަރާއެއް ބާއްވަވާފައިވެއެވެ. ހަމަ އެމަހު ޓްރަމްޕް ވަނީ އެކްސްގައި އަލުން ހުޅުވާލެވުނު އެކައުންޓް މެދުވެރިކޮށް ޕޯސްޓްކުރަން ފައްޓަވައިފައެވެ.