ނާސާގެ ތިން އެސްޓްރޯނޯޓުން ސްޕޭސް ސްޓޭޝަނުގައި ދިގު މުއްދަތެއް ހޭދަކުރުމަށް ފަހު އެނބުރި ދުނިޔެ އަށް އައިސް ހޮސްޕިޓަލަށް ގެންދިޔަ ނަމަވެސް، އެމީހުންގެ ތެރެއިން ބަލިވީ ކާކުކަން ހާމަކުރަން ބޭނުން ނުވާކަމަށް ބުނެފިއެވެ.

މެތިއު ޑޮމިނިކް، މައިކަލް ބެރެޓް އަދި ޖެނެޓް އެޕްސް އިންޓަނޭޝަނަލް ސްޕޭސް ސްޓޭޝަނުން އެނބުރި އައީ އޮކްޓޯބަރު 25 ގައެވެ. އެމީހުން ސްޕޭސްގައި ހޭދަކުރީ ގާތްގަނޑަކަށް އަށް މަހެވެ. މިއީ ބޮއިން ސްޓާލައިނާ ކްރޫ ކެޕްސިއުލްގެ މައްސަލަތަކާއި މޫސުން ގޯސްވުމުގެ ސަބަބުން އުންމީދުކުރި މުއްދަތަށްވުރެ ދިގު މުއްދަތެކެވެ.

ސްޕޭސް އެކްސްގެ ކެޕްސިއުލް ފްލޯރިޑާ ކައިރީގައިވާ މެކްސިކޯ ކަނޑުގައި ޖެހުމާއެކު، މި ތިން އެމެރިކާ އެސްޓްރޯނޯޓުންނާއި ރަޝިޔާގެ ކޮސްމޮނޯޓް އެލެކްސެންޑަރ ގްރެބެންކިން ވަނީ ޕެންސަކޯލާގެ ހޮސްޕިޓަލަކަށް ގެންގޮސްފައެވެ. އެމެރިކާގެ އެއް އެސްޓްރޯނޯޓަކު ވަނީ "މެޑިކަލް އިޝޫ" އަކާ ގުޅިގެން އެ ރޭ ހޮސްޕިޓަލުގައި ހޭދަކޮށްފައެވެ. ނަމަވެސް ނާސާއިން ވަނީ އެއީ ކާކުކަމާއި ސަބަބު ހާމަކުރަން އިންކާރުކޮށްފައެވެ.

ޑޮމިނިކް ބުނީ ގޮނޑިއެއްގައި އާދައިގެ ގޮތަކަށް އިށީނދެ އިނުން ފަދަ ކުދިކުދި ކަންކަމަށް ވެސް އެނބުރި އައުމަށްފަހު އާދަވާން އެތައް ދުވަހެއް ނެގި ކަމަށެވެ. އަދި މާރސް އަށް ދިގު ދަތުރެއް ކުރާއިރު ބޭނުންވާނެ އާލާތްތައް ދެނެގަތުމަށް ކުރާ ތަޖުރިބާއެއްގެ ގޮތުން، އޭނާ ސްޕޭސްގައި ހޭދަކުރި މުއްދަތުގައި ޓްރެޑްމިލް ބޭނުން ނުކުރާ ކަމަށް ބުންޏެވެ. އަދި ފުރަތަމަ ފަހަރަށް ހިނގީ ކެޕްސިއުލްއިން ނުކުތް ވަގުތު ކަމަށް ވެސް ބުންޏެވެ.