އެމެރިކާގެ ކުރީގެ ރައީސް ޑޮނަލްޑް ޓްރަމްޕް އަލުން ރައީސްކަމަށް ވަޑައިގަތުމުން ފަލަސްޠީނާއި ލުބުނާނުގެ ރައްޔިތުންގެ ހާލު އިތުރަށް ގޯސްވެގެންދާނެކަމުގެ ބިރު ބޮޑުވެއްޖެ އެވެ.

ޓްރަމްޕްގެ ވެރިކަން އަންނަ އަހަރުގެ ޖެނުއަރީ މަހު ފެށުމާއެކު، މެދުއިރުމަތީގެ ގައުމުތަކުގައި އިތުރު ހަލާކާއި ވޭނާ ކުރިމަތިވާނެކަމަށް ގިނަ ބަޔަކު ގަބޫލްކުރެ އެވެ.

ޣައްޒާ އާއި، އޮކިއުޕައިޑް ވެސްޓް ބޭންކް އަދި ލުބުނާނުގައި، އިސްރާއީލުގެ ވަފާތެރި އެކުވެރިއެއް ކަމަށްވާ ޓްރަމްޕް ވެރިކަމަށް ވަޑައިގަތުމުން، އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ އާއި އޭނާގެ ސަރުކާރު ހިތްވަރުއާވެ، ސަރަހައްދީ ހަނގުރާމަތައް އިތުރުކޮށް، ފަލަސްޠީނުގެ މިނިވަންކަމަށް އޮތް ކޮންމެ ފުރުސަތެއް ވެސް ނައްތާލާނެކަމުގެ ބިރު އެބައޮތެވެ.

 އޭނާއަކީ ޣައްޒާގެ ގިނަ މީހުންނެކޭ އެއްފަދައިން ގެދޮރު ދޫކޮށް ނުކުންނަން މަޖުބޫރުވެފައިވާ މީހެކެވެ.

އެމެރިކާގެ މިހާރުގެ ރައީސް ޖޯ ބައިޑެން ޣައްޒާގައި އިސްރާއީލުން ހިންގާ ހަނގުރާމައަށް ތާއީދުކޮށްފައިވެއެވެ. ދެހާސް ތޭވީސްވަނަ އަހަރުގެ އޮކްޓޯބަރ 7 ގައި ހަމާސްއިން އިސްރާއީލުގެ ދެކުނަށް ދިން ހަމަލާގައި 1,139 މީހުން މަރުވެ، 250 މީހުން ރަހީނުކުރެވުނެވެ. އޭގެ ފަހުން އިސްރާއީލުން ޣައްޒާގައި ހިންގާ ގަތުލްއާއްމުގައި 43,000 އަށްވުރެ ގިނަ ފަލަސްޠީން މީހުން ވަނީ ޝަހީދުކޮށްލައިފަ އެވެ. އަދި 2.3 މިލިއަން މީހުންގެ އާބާދީ ހިޖުރުކުރަން މަޖްބޫރުކޮށްފަ އެވެ.

ޣައްޒާގެ ރައްޔިތުން ބިރުގަންނަނީ ޓްރަމްޕް ވެރިކަމަށް ވަޑައިގަތުމުން އެމީހުން އެތަނުން ނެރެލުމަށް އިސްރާއީލަށް ހުއްދަ ދޭނެކަމަށެވެ. 

"ޓްރަމްޕްގެ ވެރިކަމުގައި ކަންތައްތައް ރަނގަޅުވާނެ ކަމެއް އަހަރެންނަކަށް ނޭނގެ. އޭނާ [އިސްރާއީލަށް] އަހަރެމެން މަރާލުމުގެ ބަދަލުގައި އަހަރެމެން އެންމެން [ޣައްޒާއިން] ނެރެލުމުގެ ހުއްދަ ދީފާނެ،" ޣައްޒާގެ ހިޖުރަވެރިންގެ ކޭމްޕެއްގައި ހުރި އަބޫ މުޙައްމަދު ނަމަކަށް ކިޔާ މީހަކު ބުންޏެވެ. 

އަބޫ މުހައްމަދު ދެކޭގޮތުގައި ފަލަސްޠީނުގެ ރައްޔިތުންގެ ކަންތައްތައް ބިނާވެފައިވަނީ އެމެރިކާގެ ވެރިކަމުގައި ތިބޭ މީހުންގެ މައްޗަށެވެ.

ނަވާރަ ސަތޭކަ ސާޅީސް އަށް ވަނަ އަހަރު އިސްރާއީލު އުފެދުނުއިރު، ޒައިއޮނިސްޓް ހަނގުރާމަވެރިންގެ އަތުން 750,000 ފަލަސްޠީނުން ބޭރުކުރެވުނު "ނަކްބާ" (ކާރިސާ) ގެ ސަލާމަތްތެރިއެއްގެ ހައިސިއްޔަތުން، އޭނާ ވަނީ އެމެރިކާގެ ގިނަ ރައީސުން އިސްރާއީލުން ފަލަސްޠީނުގެ ރައްޔިތުންނާ ދެކޮޅަށް ހިންގާ އަނިޔާވެރި ޢަމަލުތަކަށް ތާއީދުކުރާތަން ފެނިފައެވެ. އަބޫ މުހައްމަދު ދެކޭގޮތުގައި ޓްރަމްޕްގެ ވެރިކަމުގައި ވެސް މިކަން ހަމަ މިގޮތަށް ކުރިއަށްދާނެއެވެ.