މިދިޔަ އަހަރު ރާއްޖެއިން އެކްސްޕޯޓްކުރި މަހުގެ އަދަދު އިތުރުވެފައިވާ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ ތަފާސްހިސާބުތަކުން ދައްކައިފިއެވެ.

މިފްކޯގެ 2023 ވަނަ އަހަރުގެ އަހަރީ ރިޕޯޓުން ދައްކާގޮތުގައި 2022 ވަނަ އަހަރާ އަޅާބަލާއިރު އެކުންފުނީގެ ވިޔަފާރި ވަނީ ރަނގަޅުވެފައެވެ. އަދި އެކްސްޕޯޓް ވެސް 2023 ވަނަ އަހަރު ވަނީ ވަރަށް ބޮޑަށް އިތުރުވެފައެވެ.

މިދިޔަ އަހަރު ރާއްޖެއިން އެންމެ ގިނައިން އެކްސްޕޯޓްކޮށްފައި ވަނީ ގަނޑުކުރި ކަންނެއްޔެވެ. ދެހާސް ތޭވީސް ވަނަ އަހަރު ގަނޑުކުރި ކަންނެލީގެ ގޮތުގައި 62،352 މެޓްރިކް ޓަނުގެ މަސް ވަނީ އެކްސްޕޯޓްކޮށްފައެވެ. މިއީ 1.7 ބިލިޔަން ރުފިޔާއެވެ. ދެހާސް ބާވީސް ވަނަ އަހަރު ގަނޑުކުރި ކަންނެލީގެ ގޮތުގައި އެކްސްޕޯޓްކޮށްފައި ވަނީ 55،989 މެޓްރިކް ޓަނެވެ. އެއީ 1.4 ބިލިޔަން ރުފިޔާއެވެ.

މިފްކޯއިން ބުނި ގޮތުގައި، ގަނޑުކުރި ކަންނެލީގެ އެކްސްޕޯޓް އިތުރުވެފައި ވަނީ ބައެއް އާ މާކެޓްތަކަށް އެކްސްޕޯޓްކުރަން ފެށުމުގެ ސަބަބުންނެވެ. އެގޮތުން ވިއެޓްނާމް އަދި މޮރިޝަސްއަށް ވަނީ މަސް އެކްސްޕޯޓްކޮށްފައެވެ.

މީގެއިތުރުން، ދަޅުގައި އަދި ޕައުޗްގައި ބަންދުކޮށްގެން އެކްސްޕޯޓްކުރި މަހުގެ އަދަދު ވެސް ވަނީ އިތުރުވެފައެވެ. ދެހާސް ތޭވީސް ވަނަ އަހަރު 227،910 ކޭސް މަސް (148 މިލިޔަން ރުފިޔާ) ވަނީ ބޭރުކޮށްފައެވެ. ދެހާސް ބާވީސް ވަނަ އަހަރު މި އަދަދު ހުރީ 174،295 ކޭސް (143 މިލިޔަން ރުފިޔާ) ގައެވެ. މިފްކޯއިން ބުނެފައިވާ ގޮތުގައި، މި ބާވަތުގެ މަސް ވެސް އާ މާކެޓްތަކަށް އެކްސްޕޯޓްކޮށްފައިވެއެވެ. އެގޮތުން އިނގިރޭސިވިލާތާއި ޖަރުމަނުވިލާތުގެ އާ މާކެޓްތަކަށް އެކްސްޕޯޓްކުރަން ވަނީ ފަށައިފައެވެ.

ފިޝްމީލްގެ ގޮތުގައި އެކްސްޕޯޓްކޮށްފައިވާ އަދަދު ވެސް މިދިޔަ އަހަރު ވަނީ އިތުރުވެފައެވެ. ދެހާސް ތޭވީސް ވަނަ އަހަރު 28 މިލިޔަން ރުފިޔާގެ ފިޝްމީލް ވަނީ ރާއްޖެއިން އެކްސްޕޯޓްކޮށްފައެވެ. ދެހާސް ބާވީސް ވަނަ އަހަރު މި އަދަދު ހުރީ 27 މިލިޔަން ރުފިޔާގައެވެ.

ނަމަވެސް، މިފްކޯއިން ފާހަގަކޮށްފައިވާ ގޮތުގައި، މިދިޔަ އަހަރު އެކްސްޕޯޓްކުރުމަށް ދިމާވި އެންމެ ބޮޑު އެއް ގޮންޖެހުމަކީ އަހަރުގެ ބައެއް ދުވަސްވަރު ބާނާ މަހުގެ އަދަދު މަދުވުމެވެ. މީގެ ސަބަބުން ޕްރޮޑަކްޝަނަށް އަސަރުކޮށްފައިވާ ކަމަށް މިފްކޯއިން ވަނީ ހާމަކޮށްފައެވެ.

މިފްކޯގެ މި ތަފާސް ހިސާބުތަކުން ދައްކާގޮތުގައި، ރާއްޖޭގެ މަސްވެރިކަމުގެ ސިނާޢަތަށް 2023 ވަނަ އަހަރަކީ ކުރިއެރުން ލިބުނު އަހަރެކެވެ. ޚާއްޞަކޮށް އާ މާކެޓްތަކަށް އެކްސްޕޯޓްކުރަން ފެށުމާއެކު، ރާއްޖެއިން ބޭރުކުރާ މަހުގެ އަދަދު އިތުރުވެ، އެކްސްޕޯޓުން ލިބޭ އާމްދަނީ ވަނީ އިތުރުވެފައެވެ.