މި ފެށޭ ރޯދަ މަހާ ދިމާކޮށް، ސަލާމަތީ ފިޔަވަޅުތަކެއްގެ ނަމުގައި، އަލް-އަޤްޞާ މިސްކިތަށް ނަމާދުކުރަންދާ ފަލަސްތީނު މީހުންނަށް ހުރަސްތަކެއް އަޅާނެ ކަމަށް އިޒްރޭލުން ބުނެފިއެވެ.

ބައިތުލްމަޤްދިސްގައި ހުންނަ މުސްލިމުންގެ ތިންވަނައަށް އެންމެ މުޤައްދަސް ބިނާ ކަމުގައިވާ މަސްޖިދުލް އަޤްޞާގައި ނަމާދު ކުރުމަށް ކޮންމެ ރޯދަ މަހެއްގައި އިޒްރޭލުން ހުރަސްތައް ކުރިމަތި ކުރުވައެވެ.

ޣައްޒާގައި ޙަމަލާތައް ހުއްޓައިލުމުގެ އެއްބަސްވުމަކަށް ޢަމަލުކުރަމުންދާ ދަނޑިވަޅެއްގައި، މި ފެށޭ ރޯދަ މަހު ވެސް އަޤްޞާއަށް ވަންނަ މީހުންގެ "ރައްކާތެރިކަމަށްޓަކައި" ފިޔަވަޅުތަކެއް އަޅާނެ ކަމަށް ޔަހޫދީ ދައުލަތުން ބުންޏެވެ.

މިދިޔަ އަހަރުގެ ރޯދަ މަސް ފެށުމުގެ ކުރިން ވެސް އިޒްރޭލު ސިފައިން ވަނީ އަޤްޞާ މިސްކިތުގެ މައި ތިން ދޮރާއްޓެއްގައި ބެރިކޭޑު ޖަަހައި ބަންދުކޮށްފައެވެ. އަދި، މިސްކިތަށް ވަނުމުގެ ފުރުޞަތު ދީފައިވަނީ އުމުރުން 55 އަހަރުން މަތީގެ ފިރިހެނުންނާއި އުމުރުން 50 އަހަރަށް ވުރެ މަތީގެ އަންހެނުންނަށް އެކަންޏެވެ.

އަޤްޞާ މިސްކިތަށް ޔަހޫދީން ދިޔުން ހުއްދަ ނަމަވެސް، އެތަނުގައި އަޅުކަން ކުރުން ވަނީ މަނާކޮށްފައެވެ.

ނަމަވެސް، ފާއިތުވި އަހަރުތަކުގައި އެކި ފަހަރު މަތިން ޔަހޫދީން ވަނީ އަޤްޞާ މިސްކިތުގައި އަޅުކަމުގެ ނޭއްގާނީ ޢަމަލުތައް ހިންގައިފައެވެ.