ޙަމާސް ޖަމާޢަތުގެ ބެލުމުގެ ދަށުގައި ތިއްބައި މަރުވި އަސީރުންގެ ތެރެއިން ހަތަރު މީހެއްގެ ހަށިގަނޑު އިޒްރޭލާ ޙަވާލުކުރުމުން، އޭގެ ބަދަލުގައި އިޒްރޭލުގެ ޖަލުތަކުގައި ބަންދުކޮށްފައި ތިބި އެތައް ސަތޭކަ ފަލަސްތީނުގެ ޤައިދީން މިނިވަންކޮށްފިއެވެ.

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ބުނީ، މަރުވި އަސީރުންގެ ތެރެއިން ހަތަރު މީހެއްގެ ހަށިގަނޑު ޙަމާސްއިން ޙަވާލުކޮށްފައިވާ ކަމަށެވެ.

ޙަމާސް އާއި އިޒްރޭލާ ދެމެދު ޢަމަލު ކުރަމުންދާ އެއްބަސްވުމާ އެއްގޮތަށް މިދިޔަ ހޮނިހިރު ވަނީ ހަ އަސީރުން މިނިވަންކޮށްފައެވެ. އެއީ، އެއްބަސްވުމުގެ ފުރަތަމަ މަރުޙަލާގެ ދަށުން މިނިވަން ކުރާނެ ކަމަށް ބުނެފައިވާ ދިރިތިބި އަސީރުންގެ ތެރެއިން އެންމެ ފަހު ގުރޫޕެވެ.

އޭގެ ބަދަލުގައި އިޒްރޭލުގެ ޖަލުތަކުން 620 ޤައިދީން މިނިވަންކުރަން އޮތީ އެއްބަސްވެފައެވެ. ނަމަވެސް، އަސީރުން އިޒްރޭލާ ޙަވާލުކުރިފަހުން، ޤައިދީން މިނިވަންކުރުން ފަސްކޮށްފައިވާ ކަމަށް އިޒްރޭލުން ބުންޏެވެ.

އެކަމުގެ ބަހަނާއަކީ އަސީރުން މިނިވަންކުރަން ޙަމާސްއިން ބާއްވަމުންދާ ރަސްމިއްޔާތުތަކެވެ. އަދި އެކަން ހުއްޓައިލަން އެއްބަސްވުމުގެ ކުރިން ޤައިދީން މިނިވަންކުރުން ފަސްކޮށްފައިވާ ކަމަށް އިޒްރޭލުން ބުންޏެވެ.

އެ އެއްބަސްވުން އަލުން އިޔާދަކުރަން މިޞްރުން އިސް ނަގައި، ކުރި މަސައްކަތުން، ޙަމާސްގެ ބެލުމުގެ ދަށުގައި ތިއްބައި އިޒްރޭލުން ޣައްޒާއިން ދިން ޢުދުވާންތަކުގައި މަރުވި އަސީރުންގެ ތެރެއިން، ހަތަރު އަސީރެއްގެ ހަށިގަނޑު އިޒްރޭލާ ޙަވާލުކުރަން ޝަރުތުކޮށް، މިދިޔަ ހޮނިހިރު ދުވަހު މިނިވަންކުރަން ހަމަޖެހިފައިވާ އޮތް ފަލަސްތީނުގެ ޤައިދީން ދޫކޮށްލަން މިހާރު ވަނީ އެއްބަސްވެފައެވެ.

މިގޮތުން، 620 ޤައިދީން އެކި ގުރޫޕުތަކަށް ބަހާލައިގެން އިޒްރޭލުން ދަނީ މިނިވަންކުރަމުންނެވެ.

ޙަމާސްއިން ބުނީ، ޙަމަލާތައް ހުއްޓައިލުމުގެ އެއްބަސްވުމުގެ ފުރަތަމަ މަރުޙަލާ ނިމިފައިވާތީ، ދެވަނަ ފިޔަވަހި ތަންފީޒުކުރުމުގެ މަޝްވަރާތައް ފަށަން އިޒްރޭލަށް މިހާރު މަޖުބޫރުވެފައިވާ ކަމަށެވެ.

މިދިޔަ މަހުގެ 19 ވަނަ ދުވަހު ގިނަ ޤައުމުތަކެއް މެދުވެރިވެގެން ޙަމަލާތައް ހުއްޓައިލަން އެއްބަސްވީ، އިޒްރޭލުން ހުއްޓުމެއް ނެތި ލާއިންސާނީ ޢުދުވާނުތައްދީ، ފަލަސްތީނުގެ ބައި ލައްކަ އެއްހާ މީހުން ޝަހީދުކޮށްލައި، ޣައްޒާގެ ގިނަ ސަރަޙައްދުތައް ސުންނާފަތިކުރަން ފެށިތާ 15 މަސް ފަހުންނެވެ.

އެ އެއްބަސްވުމުގެ ފުރަތަމަ ފިޔަވަހީގެ ދަށުން، މިހާތަނަށް 25 ރަހީނަކާއި 1،100 ޤައިދީން ވަނީ މިނިވަންކޮށްފައެވެ.

އެ ޖަމާޢަތުގެ ބެލުމުގެ ދަށުގައި އަދިވެސް އިތުރު 63 އަސީރުން ތިބި ކަމަށް ބެލެވޭއިރު، އޭގެ ތެރެއިން ގިނަ އަދަދެއްގެ ބަޔަކު ޔަހޫދީންގެ ޢުދުވާނީ ޙަމަލާތަކުގައި މަރުވެފައިވާ ކަމުގައި ޙަމާސް އިން ވަނީ ބުނެފައެވެ.