މޫސުމީ ބަދަލުތަކުގެ ސަބަބުން ކަނޑުގެ ލޮނުގަނޑު އުފުލުން ފަދަ މޫސުމީ ކާރިސާތަކާ ދެކޮޅަށް ކުރާ މަސައްކަތަށް ފައިސާ ހޯދުމަށްޓަކައި، ޕެސިފިކް ކަނޑުގައި އޮންނަ ކުޑަ ޖަޒީރާ ޤައުމެއް ކަމަށްވާ ނައުރޫއިން، އެ ޤައުމުގެ ރައްޔިތުކަން ބިދޭޭސީންނަށް ވިއްކުމުގެ ޕްރޮގްރާމެއް އިޢުލާނުކޮށްފިއެވެ.

ގާތްގަނޑަކަށް 13،000 މީހުންގެ އާބާދީއެއް އޮންނަ ނައުރޫއަށް ރަށް ގިރުމުގެ މައްސަލަ ވަނީ ވަރަށް ބޮޑަށް ކުރިމަތިވެފައެވެ.

އެކަމާ ދެކޮޅަށް ކުރާ މަސައްކަތަށް ފައިސާ ހޯދުމަށްޓަކައި، "ރަން ޕާސްޕޯޓު" ސްކީމެއް ތަޢާރަފްކޮށް، ނައުރޫގެ ރައްޔިތުކަން 105،000 އެމެރިކާ ޑޮލަރަށް މުއްސަނދި ބިދޭސީންނަށް ވިއްކަން ވަނީ ނިންމައިފައެވެ.

"ނައުރޫއަށް މިއީ ހަމައެކަނި މޫސުމަށް އަންނަ ބަދަލުތަކުން އަރައިގަތުމަށް ކުރެވޭ މަސައްކަތެއް ނޫން. އަންނަން އޮތް ޖީލުތަކަށް ދެމެހެއްޓެނިވި އަދި ފާގަތި މުސްތަޤުބަލެއް ކަށަވަރުކޮށްދިނުމަށް ވެސް ކުރަންޖެހޭ ކަމެއް،" ނައުރޫގެ ރައީސް ޑޭވިޑް އޭޑިއެންގް ވިދާޅުވިއެވެ.

ޕާސްޕޯޓު ވިއްކައިގެން ފުރަތަމަ އަހަރު، 5.7 މިލިއަން އެމެރިކާ ޑޮލަރު ލިބޭނެ ކަމަށް ނައުރޫގެ ސަރުކާރުން ލަފާކުރެއެވެ.

މިގޮތުން، 500 މީހުންނަށް ޕާސްޕޯޓު ވިއްކައިގެން، ކުރިއަށް އޮތް އަހަރުތަކުގައި ޖުމްލަ 43 މިލިއަން އެމެރިކާ ޑޮލަރު ހޯދަން ވަނީ އަމާޒުހިފައިފައެވެ.

ރަށް ގިރުމުގެ މައްސަލަ ދިމާވެ، ނައުރޫގެ އުސް ސަރަޙައްދުތަކަށް މީހުން ބަދަލުކުރުމުގެ ބޮޑު މަޝްރޫޢުއެއް ވަނީ ފަށައިފައެވެ. އެ މަޝްރޫޢުގެ ފުރަތަމަ ފިޔަވައްސަށް 60 މިލިއަން އެމެރިކާ ޑޮލަރު ހޭދަވާނެ ކަމަށް ވަނީ ލަފާކޮށްފައެވެ.

ނައުރޫން ބުނާ ގޮތުގައި، އެ ޤައުމުގެ ބާރުގަދަ ޕާސްޕޯޓުގައި ވިސާއާ ނުލައި 89 ޤައުމަށް ދަތުރުކުރެވެއެވެ.

ނަމަވެސް، މި ސްކީމުގެ ނާޖާއިޒު ފައިދާ ނަގައި، ދުނިޔޭގެ ބޮޑެތި ކުށްވެރިންނާއި ޓެރަރިސްޓުން ނައުރޫގެ ޕާސްޕޯޓު ގަތުމުގެ ފުރުޞަތު ބޮޑުކަމަށް ބައެއް ފަރާތްތަކުން ދަނީ ބުނަމުންނެވެ.

މިގޮތުން، 2003 ވަނަ އަހަރު ވެސް ނައުރޫއިން ބިދޭސީންނަށް ރައްޔިތުކަން ވިއްކަން ކުރި މަސައްކަތް ވަނީ ނާކާމިޔާބުވެފައެވެ. އެ ފަހަރު އަލް-ޤައީދާގެ މެމްބަރުންތަކަކަށް ޕާސްޕޯޓު ވިއްކައި، އެ މީހުން އޭޝިޔާގެ ޤައުމަކުން ހައްޔަރުކުރިއެވެ.

ނަމަވެސް، މި ފަހަރު އެފަދަ ޙާލަތެއް މެދުވެރިނުވާނެކަމުގެ ޔަޤީންކަން ނައުރޫއިން ވަނީ ދީފައެވެ. މި ފަހަރު ރައްޔިތުކަން ގަންނަން ހުށަހަޅައި މީހުންގެ މަޢުލޫމާތުތައް ވަރަށް ރަނގަޅަށް ބަލައި، ރެކޯޑުތައް ސާފުކުރާނެ ކަމަށް އެ ޤައުމުން ވަނީ ބުނެފައެވެ.