ޔޫކްރޭނުގެ އަގުބޮޑު މައުދަނުތަކާ ގުޅޭ އެއްބަސްވުމަކަށް އެމެރިކާއާ އެކު އާދެވިފައިވާ ކަމަށް ޔޫކްރޭނުގެ އިސް އޮފިޝަލަކު ވިދާޅުވެއްޖެއެވެ.

ރަޝިޔާއާ ދެކޮޅަށް ކުރަމުންދާ ހަނގުރާމައިގައި އެމެރިކާއިން ފޯރުކޮށްދީފައިވާ އަސްކަރީ އެހީގެ އަގު އަދާކުރަން، ޔޫކްރޭނުގެ އަގުބޮޑު މައުދަނުތައް ދިނުމުގެ އެއްބަސްވުމަކަށް އެމެރިކާއިން ޔޫކްރޭނަށް ކުރަމުންދާ ޕްރެޝަރު، އެމެރިކާގެ ރައީސް ޑޮނަލްޑް ޓްރަމްޕް އިސްވެ ވަނީ ވަރުގަދަކޮށްފައެވެ.

ޔޫކްރޭނުގެ ރައީސް ވޮލޮޑިމިޔަރ ޒެލެންސްކީ އަކީ "ޑިކްޓޭޓަރެއް"ގެ ގޮތުގައި ސިފަކުރައްވައި، އެމެރިކާގެ ރައީސް ޑޮނަލްޑް ޓްރަމްޕް ފާޑުވިދާޅުވުން ހަރުކަށި ކޮށްފައިވަނީ އެ އެއްބަސްވުމަށް ބާރުއެޅުމަށް ކަމަށް މަސްރަޙް ދިރާސާކުރާ ފަރާތްތަކުން ދަނީ ބުނަމުންނެވެ.

އެމެރިކާ އާއި ޔޫކްރޭނުން އެއްބަސްވެފައިވަނީ، އެމެރިކާގެ އެހީގައި ޔޫކްރޭނުގެ މައުދަނުތަކުން ލިބޭ އާމްދަނީ، ދެ ޤައުމު ގުޅިފައިވާ ފަންޑަކަށް ޖަމާކުރުމަށް ކަމަށް، ނަން ނުޖަހަން އެދި އެ އޮފިޝަލް އޭއެފްޕީ ނޫހަށް ވިދާޅުވެފައިވެއެވެ.

އެމެރިކާއިން ބާރުއެޅިޔަސް، އެފަދަ އެއްބަސްވުމެއް އެކުލަވައިލުމަށް ޔޫކްރޭނުން މީގެކުރިން ދެކޮޅު ހަދާފައިވަނީ، ޔޫކްރޭނަށް ސަލާމަތީ ގޮތުން އެމެރިކާ އިން އެހީތެރިކަން ފޯރުކޮށްދޭނެކަމުގެ ޔަގީންކަން ލިބިފައިނުވާ ކަމަށް ބުނެއެވެ.

ނަމަވެސް، މިހާރު އެކުލަވާލެވިފައިވާ އެއްބަސްވުމުގައި އެފަދަ މާއްދާއެއް ހިމަނާފައިވާ ކަމަށް އޮފިޝަލް ހާމަކުރެއްވިއެވެ. އެކަމަކު ޔޫކްރޭނަށް ސަލާމަތީ ގޮތުން އެމެރިކާއިން ފޯރުކޮށްދެނީ ކޮން ކަހަލަ އެހީތެރިކަމެއް ކަމެއް އަދި ސާފެއް ނޫނެވެ.

މި އެއްބަސްވުމުގައި، އަންނަ ހުކުރު ދުވަހު ޒެލެންސްކީ އެމެރިކާއަށް ކުރައްވާ ދަތުރުފުޅުގައި ސޮއިކުރައްވާނެ ކަމުގެ އިޝާރާތެއް ވެސް އެ އޮފިޝަލް ދެއްވިއެވެ.

އެމެރިކާއަށް ޒެލެންސްކީ ވަޑައިގަންނަވާކަން ޓްރަމްޕް ވެސް ވަނީ ޔަޤީންކޮށްދެއްވައިފައެވެ.

"އަޅުގަނޑަށް އެނގޭ ގޮތުގައި، އެމަނިކުފާނު [ޒެލެންސްކީ] އެބަ ވަޑައިގަންނަވާ ހުކުރު ދުވަހު. މިއީ ވަރަށް ބޮޑު އެއްބަސްވުމެއް،" ޓްރަމްޕް ނޫސްވެރިންނަށް ވިދާޅުވިއެވެ.

އެމެރިކާ އާ އެކު ހަދާ އެއްބަސްވުމުގައި 500 ބިލިއަން އެމެރިކާ ޑޮލަރުގެ މައުދަނު ދޭން ހިމަނާފައި އޮތް މާއްދާއާ މެދު ޔޫކްރޭނުން އިޢުތިރާޒުކުރާތީ، އަލަށް އެކުލަވައިލި އެއްބަސްވުމުގައި ސީދާ އަދަދެއް ހިމަނާފައިނުވާކަން އެނގިފައިވެއެވެ.

ޔޫކްރޭނަކީ، މަތިންދާބޯޓާއި، ބެޓެރި، ހަތިޔާރު އަދި އިލެކްޓްރޯނިކްސް އުފެއްދުމުގައި ބޭނުންކުރާ ގްރެފައިޓް، ލިތިއަމް އަދި ޓައިޓޭނިއަމް ފަދަ އަގުބޮޑު މައުދަނުތަކުން މުއްސަނދި ޤައުމެކެވެ.