އެމެރިކާގެ ރިޔާސީ އިންތިޚާބުގެ ކުރިން ރިޕްބަލިކަން ޕާޓީގެ ރިޔާސީ ކެންޑިޑޭޓް ޑޮނަލްޑް ޓްރަމްޕް އަވަހާރަކޮށްލަން ރޭވިކަމުގެ ތުހުމަތުގައި މީހަކަށް ދައުވާ ކޮށްފިއެވެ. 

ހުކުރު ދުވަހު އެމެރިކާގެ ޖަސްޓިސް ޑިޕާޓްމަންޓުން މެންހަޓަންގެ ފެޑެރަލް ކޯޓަށް ހުށަހެޅި ޖިނާއީ އެ މައްސަލައިގައި ބުނެފައި ވަނީ އީރާނުގެ ރިވޮލިއުޝަނަރީ ގާޑުގެ އޭޖެންޓަކު އޮކްޓޯބަރު މަހު، ޓްރަމްޕް އަވަހާރަކޮށްލުމުގެ ރޭވުމެއް އެކުލަވާލުމަށް އަފްޣާން ރައްޔިތެއް ކަމަށްވާ ފަރުހާދު ޝަކެރީއަށް އަންގާފައިވާ ކަމަށެވެ.

ނަމަވެސް ޝަކެރީ އެކަމަށް އިޖާބަ ނުދިން ކަމަށް ދައުވާގައިވެއެވެ. އެމެރިކާގެ އިންތިޚާބު ބޭއްވި ދުވަސް ކަމަށްވާ މިދިޔަ އަންގާރަ ދުވަހުގެ ކުރިން ހަމަލާ ދިނުމަށް ރިވޮލިޔުޝަނަރީ ގާޑުން އެދިފައިވާ ކަމަށް އަލް ޖަޒީރާއިން ރިޕޯޓުކޮށްފައިވެއެވެ. ޓްރަމްޕް އަވަހާރަކޮށްލަން އުޅުނު މީހެއްގެ މައްޗަށް ޖަސްޓިސް ޑިޕާޓްމަންޓުން ދައުވާ ކޮށްފައިވާ ކަމަށް އެޓާނީ ޖެނެރަލް މެރިކް ގާލަންޑް ނެރުނު ބަޔާނެއްގައި ވިދާޅުވެފައިވެއެވެ.

އަދި އީރާނުން އެމެރިކާގެ ގައުމީ ސަލާމަތަށް ނުރައްކާ ކުރާ ކަމަށް ވެސް އެ ބަޔާނުގައިވެއެވެ.

ނަމަވެސް އެ ތުހުމަތުތައް އީރާނުން ވަނީ ދޮގުކޮށްފައެވެ.

ޝަކެރީއަކީ ނިއުޔޯކް ސިޓީގެ ރައްޔިތުން ކަމަށްވާ ކާލިސެލް ރިވެރާ އާއި ޖޮނަތަން ލޮޑްހޯލްޓާއެކު، އީރާނަށް ފާޑުކިޔާ އެމެރިކާގެ ނޫސްވެރިއަކު މަރާލުމަށް ރޭވި ރޭވުމެއްގައިވެސް ބައިވެރިވެފައިވާ ކަމަށް ތުހުމަތުކުރެވޭ މީހެކެވެ.

ރިވެރާއާއި ލޮޑްހޯލްޓާ އެ ނޫސްވެރިޔާއަށް އެތައް މަހެއް ވަންދެން ފާރަލައި، އެ މައުލޫމާތު ގަވާއިދުން ޝަކެރީއަށް ފޯރުކޮށްދީފައިވާ ކަމަށްވެސް އަލް ޖަޒީރާއިން ބުނެފައިވައެވެ.

ޝަކެރީއަކީ ކުޑައިރު އެމެރިކާއަށް ހިޖުރަކޮށްފައިވާ މީހެއްކަމަށާއި ފޭރުމުގެ ކުށް ސާބިތުވެ 2008 ވަނަ އަހަރު އޭނާ ވަނީ ޑީޕޯޓުކޮށްފައިވާ ކަމަށް ޖަސްޓިސް ޑިޕާޓްމަންޓުން ބުންޏެވެ.

އެފްބީއައި އިން ބުނެފައި ވަނީ ޖުލައި 13 ވަނަ ދުވަހު ޕެންސިލްވޭނިއާގެ ޓްރަމްޕް އަވަހާރަކޮށްލަން ކުރި މަސައްކަތަށް ފަހު ޓްރަމްޕަށް އިންޒާރުތައް އިތުރުވި ނަމަވެސް އެ ހަމަލާއަކީ ބޭރުގެ އެއްވެސް ފަރާތަކާ ގުޅުން ހުރި ހަމަލާއެއް ކަމަށް ނުބެލެވޭ ކަމަށެވެ.

ޓްރަމްޕް އަވަހާރަކޮށްލުމަށް ދެވަނަ ފަހަރަށް ސެޕްޓެމްބަރު މަހު ކުރި މަސައްކަތަކީ ވެސް ބޭރުގެ އެއްވެސް ސަރުކާރަކާ ގުޅުން ހުރި ކަމެއް ނޫން ކަމަށް އޮފިޝަލުން ބުނެއެވެ.

އެހެން ނަމަވެސް އޭގެކުރިން އޮގަސްޓް މަހު ޖަސްޓިސް ޑިޕާޓްމަންޓުން ބުނެފައި ވަނީ އެމެރިކާގައި ބަޔަކު މަރާލުމަށް ރޭވި ކަމަށް ތުހުމަތު ކުރެވޭ ޕާކިސްތާނުގެ ރައްޔިތެއްގެ މައްޗަށް ދައުވާ އުފުލާފައިވާ ކަމަށެވެ.

ޖަސްޓިސް ޑިޕާޓްމަންޓުން، ހުކުރު ދުވަހު ނެރުނު ބަޔާނުގައި ވަނީ އީރާނުން ދުނިޔޭގެ ގައުމުތަކުގައި ދިރިއުޅޭ އެމެރިކާ އާއި އެގައުމުގެ އެކުވެރި ގައުމުތަކުގެ ރައްޔިތުންނަށް ހަމަލާދީ، ރަހީނުކުރުމާއި، މަރާލުން ފަދަ ހަމަލާތައް ދިނުމަށް މަސައްކަތްކުރަމުންދާ ކަމަށެވެ.

އެގޮތުން އީރާނުން އެކަން ކުރަނީ 2020 ވަނަ އަހަރުގެ ޖެނުއަރީ މަހު އެމެރިކާއިން އިސްލާމިކް ރިވޮލިއުޝަނަރީ ގާޑް ކޯޕްސްގެ ކޮމާންޑަރު ޤާސިމް ސުލައިމާނީ އިރާގުގައި މަރާލި މައްސަލައިގެ ބަދަލު ހިފުމަށް ކަމަށްވެސް ބުނެފައިވެއެވެ. އޭރު އެމެރިކާގެ ވެރިކަމުގައި ހުންނެވީ ޓްރަމްޕެވެ.

ރިޔާސީ އިންތިހާބު ކާމިޔާބު ކުރައްވައި އެމެރިކާގެ ރައީސްކަމާ ހަވާލުވެވަޑައިގެންނެވުމަަށް ޓްރަމްޕް ހުންނެވީ ތައްޔާރަށެވެ.