ލ. މާމެންދޫ ކައިރީގައި އޮންނަ ހުޅިމެންދޫގައި ފަސް ތަރީގެ ޓްރެއިނިންގ ރިސޯޓެއް ތަރައްގީ ކުރުމުގެ އެއްބަސްވުމެއްގައި މިއަދު ސޮއިކޮށްފިއެވެ.

އެރަށުގައި ރިސޯޓެއް ތަރައްގީކޮށް، ހޮޓެލް ސްކޫލެއް ގާއިމްކޮށްދެއްވާނެކަން ރައީސް ޑރ. މުއިއްޒު އިއުލާން ކުރެއްވީ ރިޔާސީ ކެމްޕެއިން ތެރޭގައި ސެޕްޓެމްބަރު މަހުގެ ހަތަރު ވަނަ ދުވަހު ބޭއްވި ޖަލްސާގައެވެ.

"އެތަނަކީ ތަމްރީނު ލިބޭ، ތަމްރީނު ދޭ، އޮން ދަ ސްޕޮޓް ޓްރެއިނިން އާއެކު ވަޒީފާއާ އެކު ޓްރެއިނިން ލިބިގެން ހިންގޭ ތަނަކަށް ވެއްޖިއްޔާ ރިސޯޓު ވެސް ހިންގުނީ. އާމްދަނީ ވެސް ލިބުނީ. ރައްޔިތުން ވެސް ތަމްރީނު ކުރެވުނީ. އިތުރު މީހުންނަށް ވަޒީފާ ލިބިގެން ދަނީ،" ރައީސް މުއިއްޒު ވިދާޅުވިއެވެ.

އެމަނިކުފާނުގެ ވައުދުފުޅާއި އެއްގޮތަށް މިއަދު މޯލްޑިވްސް ނޭޝަނަލް ޔުނިޔާސިޓީ (އެމްއެންޔޫ)ގައި ބޭއްވި ހާއްސަ ރަސްމިއްޔާތެއްގައި މިކަމާއި ގުޅޭ އެމްއޯޔޫގައި ވަނީ ސޮއިކޮށްފައެވެ. މި އެއްބަސްވުމުގައި ފަތުރުވެރިކަމާއި ބެހޭ ވުޒާރާގެ ފަރާތުން ސޮއިކުރެއްވީ، ވަޒީރު ފައިސަލް އިބްރާހީމެވެ. އެމްއެންޔޫގެ ފަރާތުން މި އެއްބަސްވުމުގައި ސޮއިކުރެއްވީ، އެމްއެންޔޫގެ ވައިސް ޗާންސެލަރު ޑރ. އާއިޝަތު ޝެހެނާޒް އާދަމެވެ.

މި އެއްބަސްބުމުގައި ސޮއިކުރެއްވުމަށްފަހު ވާހަކަ ދައްކަވަމަން ވަޒީރު ފައިސަލް ވިދާޅުވީ، މިއީ ރާއްޖޭގެ ފަތުރުވެރިކަމުގެ ދާއިރާގެ 53 އަހަރުގެ ސިނާއަތް މިހާރަށްވުރެ ހަރުދަނާކޮށް ރާއްޖެއަކީ ވޯލްޑް ލީޑިންގ ޑެސްޓިނޭޝަންގެ ގޮތުގައި ދެމި އޮންނަން ބޭނުންވާތީ މި ސިނާއަތުގައި މަސައްކަތް ކުރައްވާ ފަރާތްތަކަށް ތައުލީމު އުނގެނުމުގެ ފުރުސަތު ހޯދައިދިނުމުގެ ގޮތުން ފަހިކޮށްދީފައިވާ ފުރުސަތެއް ކަމަށެވެ.

"މިއަދު އަޅުގަނޑުމެންނަށް ގައުމީ ޔުނިވާސިޓީއާއެކު މި ކުރެވުނު ސޮއިކުރެވުމުގެ ތެރޭގައި އަޅުގަނޑުމެންނަށް ޔަގީންވަނީ ދާދި އަވަހަށް އަޅުގަނޑުމެންނަށް މިކަން ހާސިލް ކުރެވި މީގެ ޚިދުމަތް އިރާދަކުރެއްވިއްޔާ ވީ އެންމެ އަވަހަކަށް ޔުނިވާސިޓީގެ އިސްވެރިން މި މަސައްކަތް ކުރުން،" ވަޒީރު ވިދާޅުވިއެވެ.

ވަޒީރު ވިދާޅުވީ، މި ހުޅުވާލެވުނު ފުރުސަތުގެ ސަބަބުން މި ދާއިރާއިން ކުރިއަށްދާން ބޭނުންވާ ފަރާތްތަކަށް ރަނގަޅު ފުރުސަތެއް ލިބި، ޓޫރިޒަމް ސިނާއަތުގެ ތެރެއިން ދިވެހިންނަށް މަންފާ އެންމެ ރަނގަޅަށް ލިބޭނެ ގޮތަކަށް މިސިނާއަތް ބައްޓަންކުރެވިގެންދާނެކަމަށެވެ.

އަދި އެގޮތުން ރައީސްގެ ވިސްނުންފުޅު ހުރީ ޓޫރިޒަމް ނެތް ތަނުގައި އެ ސިނާއަތް ފުޅާކުރުމަށް މަސައްކަތް ކުރުން ކަމަށްވެސް ވަޒީރު ވިދާޅުވިއެވެ.

ވައިސް ޗާންސެލަރ ޝެހެނާޒް ވިދާޅުވީ، މިއަދަކީ ތައުލީމީ ދާއިރާއަށާއި، ފަތުރުވެރިކަމުގެ ދާއިރާއަށް ވަރަށް ފާހަގަކޮށްލެވޭ ދުވަހެއް ކަމަށާއި، މި އެއްބަސްވުމުގެ މައިގަނޑު މަގުސަދަކީ ގައުމީ ޔުނިވާސިޓީން ހުޅިމެންދޫގައި ބައިނަލްއަގުވާމީ ފެންވަރުގެ ރިސޯސްއަކާއެކު ޓްރެއިނިންގ ސްކޫލެއް ގާއިމްކުރުމުގެ މަސައްކަތުގެ ފެށުން ކަމަށެވެ. މިމަޝްރޫއުގެ ސަބަބުން ރާއްޖޭގެ ފަތުރުވެރިކަމުގެ ދާއިރާއަށް ބޭނުންވާ ފަންނީ މީހުން އުފެއްދުމަށް މަގުފަހިވެ، އެކަމަށް ބޮޑު ކުރިއެރުމެއް ލިބިގެންދާނެ ކަމަށް އޭނާ ވިދާޅުވިއެވެ.

"މީގެ އިތުރުން ދިވެހި ދަރިވަރުންނަށް އަމަލީ ތަޖުރިބާ ހޯދުމުގެ ފުރުސަތު ފަހިވެގެންދާނެ. މިމަޝްރޫއަކީ ދިވެހިރާއްޖޭގެ ފަތުރުވެރިކަމުގެ ދާއިރާގެ ތައުލީމީ ފެންވަރު ބައިނަލްއަގުވާމީ މިންގަނޑުތަކާ ހަމަކުރާނެ މަޝްރޫއެއް." ޝެހެނާޒް ވިދާޅުވިއެވެ.

މިމަޝްރޫއުގެ ސަބަބުން ތިމާވެއްޓަށް ކުރާނެ ނޭދެވޭ އަސަރު ވީހާވެސް ކުޑަކުރުމާއި، ހުޅިމެންދޫގެ ތިމާވެށި ރަށްކާތެރިކުރުމަށް އިސްކަން ދިިނުން ހިމެނޭ ކަމަށްވެސް ޝެހެނާޒް ވިދާޅުވިއެވެ.